Kúndelikli nur, 24-oktyabr: Quwılǵanman Seniń aldıńnan

Sonda men bılay dedim: „Quwılǵanman Seniń aldıńnan, Biraq kóremen jáne muxaddes Ibadatxanańdı“.

Yunus 2:5

Sion bolsa bılay deydi: „Jaratqan Iye meni tárk etti, Iyem meni umıttı“. Ana emiziwli balasın umıta ma? Ózi tuwǵan balasına rehimi túspey me? Hátte, ana óz balasın umıtsa da, Men seni umıtpayman.

Iyshaya 49:14–15

Baxıttıń ne ekenin umıttım. Ózime ózim: «Shıdamım tawısıldı, Jaratqan Iyege bolǵan úmitim sóndi», – dedim.

Joqlaw 3:17–18

Tur, Iye! Nege uyıqlap atırsań? Oyan, máńgige bizlerdi taslap ketpe!

Zabur 43:24

Háy, Yaqıp, háy, Izrail, qalayınsha sen: «Jolım Jaratqan Iyeden jasırın, Qudayım huqıqımdı qorǵamaydı», – deyseń?

Iyshaya 40:27

Qáhárlengenimde, sennen bir máwrit júzimdi jasırǵan edim, Biraq máńgilik súyispenshiligim menen, Saǵan rehim etemen, – deydi Ámeńgeriń Jaratqan Iye.

Iyshaya 54:8

Ne ushın túskinlikke túseseń, háy janım? Ne ushın tınıshsızlanasań? Qudayǵa úmit bayla, Men Oǵan jáne alǵıs aytaman, Qutqarıwshım hám Qudayıma.

Zabur 42:5

Bizler hár tárepleme qısqıdamız, biraq ezilmeymiz. Albıraymız, biraq úmitsizlikke berilmeymiz. Quwdalanamız, biraq Quday bizlerdi taslap ketpeydi. Bizlerdi jıǵıltadı, biraq joq bolıp ketpeymiz.

2 Korinfliler 4:8–9

Jarlı hám kámbaǵal suw izleydi, Biraq suw joq. Shólden tańlayları kewip qaladı. Men Jaratqan Iye olarǵa juwap beremen.

Iyshaya 41:17

«Kim bizlerge jaqsılıq qıladı?» – dep aytatuǵınlar kóp.

Zabur 4:7

Quyash astında islegen miynetinen hám urınıwlarınan adam nege erisedi? Onıń barlıq kúnleri dártke, jumısları qayǵıǵa tolı, hátte, júregi túnde de tınıshlanbaydı. ... Hámmesi biyhuda, samaldıń izinen quwǵanday nárse eken.

Wazshı 2:22–23, 17

Meni, tiri suw bulaǵın tárk etti, Ózlerine suw turmaytuǵın, buzıq suw saqlaǵıshlardı qazıp aldı.

Eremiya 2:13

Maǵan kelgenlerdi hesh qashan quwıp shıǵarmayman.

Yuxan 6:37

Kewip qalǵan jerge suw jiberip, Qurǵaq jerlerge saylar aǵızaman.

Iyshaya 44:3

Haqlıqtı ańsap, oǵan umtılǵanlar baxıtlı! Quday olardı tolıq qanaatlandıradı.

Matta 5:6

Quday, Sen meniń Qudayımsań, Seni barlıǵım menen izleymen, Janım Seni ańsaydı, Kewip, quwrap hám suwsız qalǵan jerde, Denem Saǵan intizar.

Zabur 62:2