Kúndelikli nur, 22-oktyabr: Júregim Saǵan sadıq, Quday

Júregim Saǵan sadıq, Quday.

Zabur 107:2

Dawıttıń jırı Jaratqan Iye meniń nurım hám qutqarıwshım, Men kimnen qorqaman? Jaratqan Iye ómirimniń qorǵanı, Meni kim qorqıta aladı?

Zabur 26:1

Saǵan úmit artqanı ushın, Pikirin Saǵan baǵıshlaǵandı, Tolıq tınıshlıqta saqlaysań.

Iyshaya 26:3

Ol jaman xabardan qorqpaydı, Jaratqan Iyege isengen júregi bekkem. Onıń júregi mıqlı, qorqıw degendi bilmeydi, Dushpanlarınıń jeńilisin kóredi.

Zabur 111:7–8

Qorqqanımda, Saǵan úmit baylayman.

Zabur 55:4

Apatta qalǵan kúnlerimde, Ol meni Óz panasında aman saqlaydı. Shatırınıń ishine jasırıp meni, Bálent jartas ústine alıp shıǵadı. Sonda átirapımdaǵı dushpanlarım ústinen, Basım joqarı kóteriledi. Jaratqan Iyeniń shatırında qurbanlıq beremen, Shadlanıp, alǵıslaw qurbanlıǵın beremen, Saz shertip, Onı jırlayman.

Zabur 26:5–6

Pútkil miyrimniń tiykarı bolǵan Quday sizlerdi Iysa Masiyx arqalı Óziniń máńgilik saltanatına shaqırdı. Qısqa ómirińizde azap shegip atırǵan bolsańız da, Ol sizlerdi jetilistiredi, bekkemleydi, kúsh-quwat beredi hám tıyanaqlı qıladı. Qúdiret máńgi-baqıy Onıki bolsın! Awmiyin.

1 Petr 5:10–11

Jaratqan Iye Óz taxtın kóklerge ornattı, Onıń patshalıǵı hámme jerdi óz ishine aladı.

Zabur 102:19

Kiyimniń shalǵayına shek taslanar, Onıń sheshimi Jaratqan Iyeden beriler.

Hikmetler 16:33

Xalıqtı qorqınısh baspay ma? Jaratqan Iye jibermese, Qalaǵa apat kele me?

Amos 3:6

Men – Jaratqan Iyemen, basqası joq. Mennen basqa quday joq. Meni tanımasań da, saǵan kúsh beremen. Shıǵıstan batısqa deyingi adamlar, Mennen basqasınıń joq ekenin bilip qoysın. Men – Jaratqan Iyemen, basqası joq. Nurdı dóretken, qarańǵılıqtı jaratqan Men bolaman, Abadanlıqtı beretuǵın, apatshılıqtı jiberetuǵın da Menmen. Bulardıń hámmesin isleytuǵın Men, Jaratqan Iyemen.

Iyshaya 45:5–7

Ol aspandaǵı kúshlerdiń hám dúnyada jasap atırǵanlardıń ústinen, Óziniń qálegen húkimin shıǵarar. Hesh kim Onı toqtata almas, Oǵan «Ne qılıp atırsań?» – dep hesh kim ayta almas.

Daniel 4:32

Eger Quday bizlerdi jaqlasa, bizlerge kim qarsı tura aladı?

Rimliler 8:31

Sebebi Quday barlıq dushpanların Masiyxtıń ayaǵınıń astına bastırmaǵansha, Masiyx patshalıq etiwi tiyis.

1 Korinfliler 15:25

Háy, kishkene pada, qorqpa! Ákeńiz sizlerge Patshalıqtı beriwdi maqul taptı.

Luka 12:32