Kúndelikli nur, 17-oktyabr: Tákirarlap aytaman: quwanıńlar

Kúni boyı Seniń atıń sebepli shadlanadı, Ádilligiń arqalı joqarı kóteriledi.

Zabur 88:17

Ádalat hám kúsh, Jalǵız Jaratqan Iyede“, – deydi. Oǵan ǵázeplengenlerdiń hámmesi, Aldına kelip, uyalıp qaladı. Biraq Izraildıń pútkil násili, Jaratqan Iyede aqlanıp, Onıń menen maqtanadı.

Iyshaya 45:24–25

Háy, haq adamlar, Jaratqan Iyede quwanıp, shadlanıń, Háy, júregi pák bolǵanlar, Hámmeńiz shadlanıp baqırıń!

Zabur 31:11

Qudaydıń adamdı aqlaytuǵın ádilligi Muxaddes Nızamǵa baylanıslı bolmay-aq ashıq kórsetildi. Muxaddes Nızam da, payǵambarlardıń Jazıwları da bul haqqında gúwalıq beredi. Qudaydıń ádilligi adamlardı olardıń Iysa Masiyxqa degen isenimi arqalı aqlaydı. Bunı Ol isenetuǵın hár bir adam ushın isleydi. ... Jáne de, házirgi waqıtta Ol ádilligin dálillep, Óziniń haq ekenin hám Iysaǵa isengen hár bir adamdı aqlaytuǵının kórsetti.

Rimliler 3:21–22, 26

Iyemiz benen qatnasta bolıp, bárqulla quwanıńlar. Tákirarlap aytaman: quwanıńlar.

Filipliler 4:4

Sizler Masiyxtı kórmegen bolsańız da, Onı súyesizler. Házir Onı kóre almasańız da, Oǵan isenip, sóz benen aytıp jetkiziwge qıyın bolǵan bir ájayıp hám ullı quwanısh penen shadlanbaqtasızlar.

1 Petr 1:8

Sebebi Patshalıq ta, qúdiret te, ullılıq ta máńgilikke Seniki.

Matta 6:13

Jaratqan Iye patshalıq qılmaqta! ... Seniń taxtıń ázelden ornatılǵan, Sen ázelden barsań.

Zabur 92:1–2

Jaratqan Iye sabır-taqatlı, Biraq Ol kúshli.

Naxum 1:3

Eger Quday bizlerdi jaqlasa, bizlerge kim qarsı tura aladı?

Rimliler 8:31

Bizler sıyınatuǵın Quday bizlerdi ot janıp turǵan peshten de, siziń qolıńızdan da qutqara aladı.

Daniel 3:17

Olardı Maǵan bergen Ákem – hámmeden ullı. Ákemniń qolınan olardı hesh kim tartıp ala almaydı.

Yuxan 10:29

Sebebi sizlerdegi Muxaddes Ruwx dúnyadaǵı ruwxtan ullı.

1 Yuxan 4:4

Bizlerdiń emes, Jaratqan Iye, bizlerdiń emes, Súyispenshiligiń hám sadıqlıǵıń haqı.

Zabur 113:9

Jaratqan Iye, ullılıq, qúdiret, dańq, Jeńis hám saltanat Seniki. Aspanda hám jerde bolǵan hár bir nárse Seniki. Patshalıq ta Seniki, Jaratqan Iye! Sen hár bir nárseden joqarısań. Endi, Qudayımız, Seni táriyiplep, Ájayıp atıńa alǵıs-maqtawlar aytamız. Biraq Saǵan ıqtıyarlı sadaqalar bere alatuǵınday, men kimmen, xalqım kim bolıptı? Hár bir nárse Sennen shıǵadı, bizler tek Seniń qolıńnan alǵanlarımızdı ǵana Saǵan berip atırmız.

1 Jılnama 29:11, 13–14