Kúndelikli nur, 14-oktyabr: Awa, Masiyx hámme ushın óldi

Usı maqsette Masiyx ólip, ólimnen qayta tirildi. Sonlıqtan Ol ólilerdiń de, tirilerdiń de Iyesi boldı.

Rimliler 14:9

Onıń jábirlenip, azap shegiwi, Jaratqan Iyeniń qálewi edi. Onıń janı gúna ushın qurbanlıq etip berilgen waqıtta, Ol óz urpaqların kórip, ómiri uzayadı. Ol arqalı Jaratqan Iyeniń erki orınlanadı. Jan azabınan soń ol nurdı kóredi, Óz bilimi arqalı qanaatlanadı. Meniń ádil qulım kóplerdi aqlaydı, Olardıń qılmısların ózine aladı.

Iyshaya 53:10–11

Masiyx usı azaplardı shegip, Óz saltanatına kiriwi kerek emes pe edi?

Luka 24:26

Yaǵnıy Masiyx hámme ushın ólgenlikten, hámme Onıń ólimine sherik bolǵan boladı, degen juwmaqqa keldik. Awa, Masiyx hámme ushın óldi. Solay eken, jasap atırǵanlar endi ózleri ushın emes, al ózleri ushın ólgen hám qayta tirilgen Masiyx ushın jasawı shárt.

2 Korinfliler 5:14–15

Pútkil Izrail xalqı anıq bilip qoysın: Quday sizler atanaq aǵashqa shegelegen sol Iysanı hám Iyemiz, hám Masiyx qıldı.

Elshiler 2:36

Quday dúnyanı jaratpastan burın usı maqset penen Masiyxtı tańlap alıp, Onı bul aqırǵı kúnlerde sizler ushın jiberdi. Onı ólimnen tiriltip, dańqqa eristirgen Qudayǵa Ol arqalı isenesiz.

1 Petr 1:20–21

Bizlerge búgin de kúndelikli nanımızdı bere gór.

Matta 6:11

Men jas edim, endi qartaydım, Haq adamnıń taslap ketilgenin, Onıń urpaǵınıń nan soraǵanın kórmedim.

Zabur 36:25

Onıń nanı mol bolıp, hesh qashan suwsız qalmaydı.

Iyshaya 33:16

Ǵarǵalar hár kúni azanda hám keshte oǵan nan menen gósh ákelip turdı, ol suwdı saydan ishti.

3 Patshalar 17:6

Meniń Qudayım sizlerdiń hár bir mútájligińizdi Masiyx Iysa arqalı Óziniń saltanatlı baylıǵı menen qanaatlandıradı.

Filipliler 4:19

Ózlerińizde barǵa qanaat etińler. Óytkeni Quday bılay degen: «Seni hesh qashan taslap ketpeymen, hesh qashan qaldırmayman».

Evreyler 13:5

Ol sizlerdi ash qaldırıp, boysındırdı. Keyin ózlerińiz de ... Bunı adamnıń tek ǵana nan menen emes, al Jaratqan Iyeniń awzınan shıqqan hár bir sóz benen jasaytuǵının sizlerge úyretiw ushın isledi.

Nızamnıń qaytalanıwı 8:3

Iysa olarǵa: – Sizlerge shının, haqıyqatın aytaman: sizlerge aspannan nan bergen Muwsa emes, al aspannan haqıyqıy nandı sizlerge berip turǵan – Meniń Ákem. Sebebi Qudaydıń nanı aspannan kelip, dúnyaǵa ómir beredi, – dedi. Xalıq Iysaǵa: – Mırza, bizlerge bunday nandı hámme waqıt berip tur, – dedi.

Yuxan 6:32–34