Kúndelikli nur, 8-oktyabr: Quwanıńlar hám shadlanıńlar!

Men qorqpayman, Ne qıla aladı adamlar maǵan?

Evreyler 13:6

Masiyxtıń súyispenshiliginen bizlerdi kim ayıra aladı? Hesh kim. Qıyınshılıq ta, qayǵı da, quwdalaw da, ashlıq ta, jalańashlıq ta, qáwip te, qılısh ta ayıra almaydı. Biraq, bulardıń hámmesiniń ústinen bizlerdi súyetuǵın Masiyx sebepli úlken jeńiske erisemiz.

Rimliler 8:35, 37

Deneni óltirse de, bunnan soń basqa hesh nárse isley almaytuǵınlardan qorqpańlar! Biraq kimnen qorqıwıńız kerek ekenin aytayın: óltirgennen keyin, dozaqqa taslaytuǵın Qúdireti kúshli Qudaydan qorqıńlar. Awa, sizlerge aytatuǵınım: Onnan qorqıńlar.

Luka 12:4–5

Haqlıq ushın quwdalanǵanlar baxıtlı! Aspan Patshalıǵı olardiki. Adamlar sizlerdi Men sebepli xorlasa, quwdalasa, hár túrli ótirik sózler menen jamanlasa, sizler baxıtlısızlar! Quwanıńlar hám shadlanıńlar! Óytkeni sizlerdiń aspandaǵı sıyıńız úlken.

Matta 5:10–12

Buǵan qaramastan, men óz janımdı ayamayman. Tek óz báygimdi basıp ótip, Qudaydıń miyriminiń Xosh Xabarı tuwralı gúwalıq beriwdi.

Elshiler 20:24

Patshalar aldında shártlerińdi aytaman, Bunnan uyalmayman.

Zabur 118:46

Ayaqlarımdı tastıń ústine bastırdı.

Zabur 39:3

Bul jartas – Masiyx edi.

1 Korinfliler 10:4

Shimon Petr juwap qaytarıp: – Sen – Masiyxsań, tiri Qudaydıń Ulısań, – dedi. ... Men mına tastıń ústine Óz jámáátimdi ornataman, onı ólim kúshleri de jeńe almaydı.

Matta 16:16, 18

Iysadan basqa hesh kim arqalı qutqarılıw joq. Qutqarılıwımız ushın aspan astında adamlarǵa berilgen basqa hesh bir at joq.

Elshiler 4:12

Sol sebepten Onıń qanı menen hújdanımız ayıplaǵan islerden janımızdı tazalap hám denemizdi taza suw menen juwıp, tolıq isenim menen shın júrekten Qudayǵa jaqınlayıq. Ózlerimiz tán alǵan úmitimizdi ekilenbey bekkem saqlayıq.

Evreyler 10:22–23

Isenim menen sorasın. Óytkeni gúmanlanǵan adam samal menen shayqatılıp tınıshsızlanǵan teńiz tolqınına uqsaydı.

Yaqıp 1:6

Masiyxtıń súyispenshiliginen bizlerdi kim ayıra aladı? Hesh kim. Qıyınshılıq ta, qayǵı da, quwdalaw da, ashlıq ta, jalańashlıq ta, qáwip te, qılısh ta ayıra almaydı. Biraq, bulardıń hámmesiniń ústinen bizlerdi súyetuǵın Masiyx sebepli úlken jeńiske erisemiz. bálentlik te, tereńlik te, ulıwma, jaratılǵan hesh bir nárse bizlerdi Qudaydıń bizlerge Iyemiz Masiyx Iysa arqalı bergen súyispenshiliginen ayıra almaydı.

Rimliler 8:35, 37, 39