Kúndelikli nur, 5-oktyabr: Azap-qayǵı kúnińde shaqır Meni

Azap-qayǵı kúnińde shaqır Meni, Seni qutqaraman, sen de Meni dańqqa bóleyseń.

Zabur 49:15

Ne ushın túskinlikke túseseń, háy janım? Ne ushın tınıshsızlanasań? Qudayǵa úmit bayla, Men Oǵan jáne alǵıs aytaman, Qutqarıwshım hám Qudayıma.

Zabur 41:12

Jaratqan Iye, ezilgenlerdiń tilegin esiteseń, Jigerlendirerseń olardı, Jetim hám ezilgenlerdiń dadına qulaq salıp.

Zabur 9:38

Sen iygilikli hám keshirimliseń, Iye, Seni shaqırǵanlardıń hámmesine súyispenshiligiń ullı.

Zabur 85:5

Sonda Yaqıp xojalıǵına hám janındaǵılardıń hámmesine bılay dedi: – Ózlerińizdegi jat qudaylardıń músinlerin ılaqtırıp taslańlar ... Júrińler, bul jerden ketip, Beyt-Elge barayıq. Qıyın kúnlerimde maǵan juwap bergen hám júrgen jollarımda meniń menen birge bolǵan Qudayǵa arnap, men sol jerde qurbanlıq orın qurayın.

Jaratılıs 35:2–3

Jaratqan Iyege alǵıslar ayt, háy janım! Umıtpa Onıń barlıq jaqsılıqların!

Zabur 102:2

Jaratqan Iyeni súyemen, Ol dadımdı esitedi. Maǵan qulaq túrgeni ushın, Ómirim boyı, Onı shaqıraman. Ólim arqanları meni orap aldı, Óliler mákanınıń qorqınıshı qıynadı, Meni hásiret hám qayǵı bastı. Sonda Jaratqan Iyeniń atın aytıp shaqırdım.

Zabur 114:1–4

Sebebi Quday bir payǵambarı arqalı bılay degen: «Endi az-maz waqıttan keyin, Keletuǵın tez arada keledi, Ol keshikpeydi.

Evreyler 10:37

Taslarǵa anıq qılıp jaz saǵan ayan qılǵanlarımdı, Hár bir adam bir qaraǵannan oqıy alatuǵın bolsın. Bul ayan belgilengen waqıtta ámelge asadı, Sol waqıt tez arada keledi, bul ayan jalǵan emes. Eger de keshikkendey bolıp kórinse, sabır et, Ol álbette keshikpey orınlanadı.

Xabaqquq 2:2–3

Súyikli tuwısqanlarım, tek mınanı esten shıǵarmańlar: Jaratqan Iyeniń názerinde bir kún mıń jılday, mıń jıl bir kúndey. Ayırımlar keshikti dep esaplaǵanday, Iyemiz wádesin orınlawdı keshiktirip atırǵan joq. Kerisinshe, Ol hesh kimniń nabıt bolıwın qálemey, hár bir adam táwbe etsin dep, sizler ushın sabırlılıq penen kútip turıptı.

2 Petr 3:8–9

Iye, rehimli hám miyrimli Qudaysań, Sabır-taqatlı, súyispenshiligiń ullı hám sadıqsań.

Zabur 85:15

Jaratqan Iye, kóklerdi jarıp, tómenge túskenińde edi! ... Ózinen úmit etkenler ushın, Sonday islerdi islegen jalǵız Quday Senseń. Sennen basqa qudaydı ázelden qulaq ta esitpegen, kóz de kórmegen.

Iyshaya 64:1, 4