Kúndelikli nur, 30-sentyabr: Ol bizlerdiń qanday jaralǵanımızdı biledi

Biraq Quday men tutqan joldı jaqsı biledi, Ol meni sınaqqa salǵanda, altınday pák bolıp shıǵaman.

Ayup 23:10

Ol bizlerdiń qanday jaralǵanımızdı biledi.

Zabur 102:14

Adamzattı jazalap, azar berse de, Bulardı Ol júrek qálewi menen qılmaydı.

Joqlaw 3:33

Biraq Quday salǵan kúshli negiz bekkem turıptı. Sol negiz «Jaratqan Iye Ózine tiyisli bolǵanlardı biledi» hám «Jaratqan Iyege tiyislimen, degen hár bir adam jamanlıqtan awlaq júrsin», – degen sózler menen tastıyıqlanǵan. Úlken bir úyde tek altın hám gúmis ıdıslar emes, al aǵash hám ılay ıdıslar da bar. Olardıń birewleri sıylı, al birewleri sıysız is ushın qollanıladı. Solay etip, eger kim de kim ózin jamanlıqlardan tazalasa, onda ol sıylı, muxaddes qılınǵan, xojayınına paydalı hám hár bir jaqsı iske tayın ıdıs boladı.

2 Timofey 2:19–21

Ol gúmisti eritip tazalap alatuǵın adam sıyaqlı húkim taxtına otırıp, lebiylilerdi pákleydi. Awa, altın hám gúmisti tazalaǵanday etip, tazalaydı. Sonda olar Jaratqan Iyege tuwrı jol menen qurbanlıqlar usınatuǵın boladı.

Malaxiya 3:3

Olardı gúmistey eritip, tazalayman, Altındı sınaǵanday ... Men de olarǵa juwap beremen, „Bular Meniń xalqım“, – deymen, Olar da Meni: „Jaratqan Iye – bizlerdiń Qudayımız“, – deydi.

Zexariya 13:9

Jaratqan Iye, jollarıńdı kórset, Óz soqpaqlarıńdı túsindir maǵan.

Zabur 24:4

Sońınan Muwsa Jaratqan Iyege bılay dedi: – Sen maǵan: «Bul xalıqtı baslap alıp júr», – deyseń ... Eger men Seniń miyrimińe erisken bolsam, ótinemen, maǵan Óz jolıńdı kórset. Seni ele de jaqsı bilip, miyrimińe erisip barayın ... Jaratqan Iye Muwsaǵa: – Ózim Seniń menen birge baraman hám seni tınıshlıqqa eristiremen, – dedi.

Shıǵıw 33:12–14

Óz jolların Muwsaǵa, Islerin izraillılarǵa kórsetti.

Zabur 102:7

Kishipeyillerdi ádillik jolı menen alıp júrer, Olarǵa Óz jolın úyreter. Kim Jaratqan Iyeden qorqsa, Jaratqan Iye oǵan tańlaytuǵın joldı kórseter.

Zabur 24:9, 12

Jaratqan Iye meni qorǵaǵanı sebepli, Jataman, uyıqlayman, jáne aman-esen turaman. Hár tárepten qorshap turǵan, On mıńlaǵan jawlardan qorqpayman.

Zabur 3:6–7

Ómir jolın maǵan kórseteseń, Mol quwanısh bardur Seniń dárgayıńda, Oń qolıń máńgi baxıt alıp keler maǵan.

Zabur 15:11

Jaratqan Iye bılay deydi: «Saǵan aqıl-násiyat beremen, Júretuǵın jolıńdı kórsetemen, Másláhát berip, názerimnen qashırmayman.

Zabur 31:8

Ádildiń jolı tań shuǵlasına uqsaydı, Ol túske deyin jarqıraǵan sayın jarqıraydı.

Hikmetler 4:18