Kúndelikli nur, 1-oktyabr: Olar qanshelli aqılsız!

Adam ómirinde jetistiretuǵın Muxaddes Ruwxtıń jemisi – súyispenshilik ... múláyimlilik hám ózin tutıp biliw.

Galatiyalılar 5:22–23

Jarısqa qatnasatuǵınlardıń hámmesi ózlerin barlıq nárseden tıyadı. Olar bunı ótkinshi tajdı alıw ushın isleydi. Al bizler máńgilik tajdı alıw ushın háreket etemiz. Sonlıqtan men maqsetsiz juwırǵan adam sıyaqlı juwırmayman. Judırıǵımdı biykarǵa siltep, hawanı urǵan adam sıyaqlı bolmayman. Al, basqalarǵa Xosh Xabardı járiyalap, ózim ılayıqsız adam bolıp qalmawım ushın, ózimdi tıyıp, denemdi baǵındırıp atırman.

1 Korinfliler 9:25–27

Sharap iship, más bolmańlar, bul adamnıń buzılıwına alıp keledi. Al bunıń ornına, Muxaddes Ruwxqa tolıńlar.

Efesliler 5:18

Kim de kim Maǵan ergisi kelse, ózinen keshsin hám óz atanaq aǵashın arqalap, Meniń izime ersin.

Matta 16:24

Sonlıqtan basqalar sıyaqlı uyıqlamayıq, al oyaw hám sergek bolayıq. Óytkeni uyıqlaytuǵınlar túnde uyıqlaydı, más bolatuǵınlar da túnde más boladı. Al kúndizge tiyisli bolǵan bizler sergek bolayıq.

1 Salonikalılar 5:6–8

Bul miyrim bizlerge qudaysızlıqtan hám dúnyanıń jaman háweslerinen waz keship, házirgi dáwirde ózlerimizdi tıyıp biliwdi, haq bolıwdı hám Qudaydıń jolına ılayıqlı ómir súriwdi úyretedi. Jáne de, ol bizlerge házirshe, múbárek úmitimizdiń, yaǵnıy ullı Qudayımız hám Qutqarıwshımız bolǵan Iysa Masiyxtıń saltanat penen keliwin kúttiredi.

Titus 2:12–13

Deneniń bası bolǵan Masiyxqa qaray hár tárepleme ósip barayıq.

Efesliler 4:15

Dáslep kók shıǵıp, sońınan masaq, al onnan soń masaq ishinde dán ónedi.

Mark 4:28

Nátiyjede bizlerdiń hámmemiz Qudaydıń Ulına iseniwde hám Onı biliwde birlikke erisip, Masiyxtıń tolıq minsizligine deyin ósip baramız.

Efesliler 4:13

Olar ózlerin óz ólshemleri menen bahalaydı hám ózlerin ózleri menen ǵana salıstıradı. Olar qanshelli aqılsız! Muxaddes Jazıwda aytılǵanday: «Maqtanatuǵın adam Jaratqan Iye menen maqtansın». Sebebi ózin ózi maqtaǵan adam emes, al Iyemiz maqtaǵan adam haqıyqattan qádirleniwge ılayıqlı.

2 Korinfliler 10:12, 17–18

Al haqıyqatlıq bolsa Masiyxta. Jalǵan kishipeyillikten hám perishtelerge sıyınıwdan lázzet alatuǵın hesh kim sizlerdi sıyıńızdan ayırmasın. Olar tek ózleri kórgen ayanlarǵa ǵana berilip, óz gúnakar tábiyatınıń aqılı menen sebepsiz kókirek kóteredi. Bundaylar iseniwshiler jámáátiniń bası bolǵan Masiyx penen baylanıstı úzgen. Áne usı bastan pútkil dene buwın hám sińirdiń járdemi menen kúsh alıp hám birlesip, Qudaydıń qálegen jolı menen ósip baradı.

Kolosalılar 2:17–19

Iyemiz hám Qutqarıwshımız Iysa Masiyxtıń miyrimine bólenip, Onı biliwde ósip barıńlar.

2 Petr 3:18