Wednesday, September 23, 2026

Eger bizler tek bul dúnyadaǵı ómirimizde ǵana Masiyxtan úmit etetuǵın bolsaq, onda bizler hámme adamlar ishindegi eń ayanıshlı adamlar bolǵanımız.

1 Korinfliler 15:19

Biraq, olar jerdegi watannan da jaqsıraǵın, yaǵnıy aspandaǵı watandı árman etetuǵın edi. Sol sebepten Quday olardıń Qudayı bolıwǵa arlanbaydı. Sebebi Ol olar ushın bir qala tayarlap qoyıptı.

Evreyler 11:16

Ol bizlerdi shirimeytuǵın, pák hám eskirmeytuǵın bir miyrasqa eristirdi. Usı miyras sizler ushın aspanda saqlawlı tur.

1 Petr 1:4

Sonlıqtan hesh bir adam adamlar menen maqtanbasın. Óytkeni hámmesi sizlerge tiyisli: Pavel de, Apollos ta, Kifa da, dúnya da, ómir hám ólim de, házirgi hám keleshek zaman da, hámmesi sizlerge tiyisli.

1 Korinfliler 3:21-22

Muxaddes Jazıwda aytılǵanday: «Kóz kórip, qulaq esitpegen, Adamnıń oyına kirip te shıqpaǵan nárselerdi, Quday Ózin súyetuǵınlar ushın tayarlap qoyıptı». Biraq, Quday bunı bizlerge Óziniń Muxaddes Ruwxı arqalı ashıp berdi. Óytkeni Muxaddes Ruwx hámme nárseni, hátte, Qudaydıń tereń oy-pikirlerin de biledi.

1 Korinfliler 2:9-10

Men, aqsaqaldan, Quday tárepinen tańlanǵan xanımǵa hám onıń balalarına sálem! Men sizlerdi shın júrekten súyemen. Tek men emes, al haqıyqattı bilgenlerdiń hámmesi de sizlerdi súyedi. Sebebi bizlerde haqıyqat bar hám ol bizler menen máńgi birge boladı. Ákemiz Qudaydan hám Ákeniń Ulı Iysa Masiyxtan kelgen miyrim, rehim hám tınıshlıq, bizlerde haqıyqatlıq hám súyispenshilik arqalı birge bolsın. Seniń balalarıńnıń arasındaǵı geybirewleriniń Ákemizden alǵan buyrıq boyınsha haqıyqat jolı menen júrgenin bilip, qattı quwandım. Endi sennen ótinemen, qımbatlı xanım, hámmemiz bir-birimizdi súyeyik. Men saǵan jańa buyrıqtı emes, bizler áwel bastan qabıl etken buyrıqtı jazıp atırman. Súyispenshilik – bul Qudaydıń buyrıqları boyınsha jasaw. Áwel bastan esitkenińiz sıyaqlı, Onıń buyrıǵı – súyispenshilik penen jasawdan ibarat. Dúnya júzinde Iysa Masiyxtıń adam denesinde kelgenin tán almaytuǵın kóplegen aldawshılar payda boldı. Bunday adam – aldawshı hám Masiyxqa qarsı turıwshı. Miynetimizdiń jemisin joytpay, ılayıqlı sıylıq alıwıńız ushın ózlerińizge saq bolıńlar. Masiyxtıń tálimatı menen jasamay, shekten shıǵıp ketken adamda Quday joq. Onıń tálimatı menen jasaytuǵın adamda hám Áke, hám Ul bar. Eger kim de kim sizlerge kelip, bul tálimattı ákelmese, onı úylerińizge qabıl almańlar, oǵan sálem de bermeńler. Óytkeni oǵan sálem bergen adam onıń jaman islerine sherik bolǵan boladı. Sizlerge jazatuǵın kóp nárselerim bar, biraq olardı qaǵaz betine sıya menen jazıwdı qálemeymen. Quwanıshımız tolı bolıwı ushın janıńızǵa barıp, júzbe-júz sóylesemen degen úmittemen. Quday tańlaǵan sińlińniń balaları saǵan sálem aytıp atır.

2 Yuxan 1

Minekey, bizlerdi qorshaǵan usınday kóp sanlı gúwalar toparı bar eken. Sonlıqtan bizler de kesent beretuǵın hár bir júkti hám ózlerimizge tez jabısatuǵın gúnanı taslap, Quday aldımızǵa qoyǵan jarısta shıdamlılıq penen juwırayıq.

Evreyler 12:1