Kúndelikli nur, 3-oktyabr: Onıń jaraqatları arqalı shıpa taptıńız

óliler arasınan birinshi bolıp tirilgen hám jer júzi patshalarınıń Húkimdarı bolǵan Iysa Masiyxtan miyrim hám tınıshlıq sizlerge berilsin! Ol bizlerdi súyip, Óz qanı menen gúnalarımızdan azat etti.

Ayan 1:5

Suwlar da muhabbattı óshire almas, Dáryalar da onı aǵızıp kete almas. ... Óytkeni muhabbat ólimdey qúdiretli.

Qosıqlar qosıǵı 8:7, 6

Dosları ushın óz janın bergen adamnıń súyispenshiliginen artıq súyispenshilik joq.

Yuxan 15:13

Bizlerdiń gúna ushın ólip, haq bolıp jasawımız ushın, Ol gúnalarımızdı atanaq aǵashta Óz denesine júkledi. Onıń jaraqatları arqalı shıpa taptıńız.

1 Petr 2:24

Masiyx penen qatnasta bolǵan bizler Onıń qanı arqalı qutqarıldıq, yaǵnıy Qudaydıń bay miyrimi boyınsha gúnalarımız keshirildi.

Efesliler 1:7

Biraq, sizler Iyemiz Iysa Masiyxtıń atı menen hám Qudayımızdıń Ruwxı menen tazalandıńız, muxaddes boldıńız hám aqlandıńız.

1 Korinfliler 6:11

Biraq sizler Quday tárepinen tańlanǵan adamlar, Patshanıń ruwxaniyleri, muxaddes millet hám Qudayǵa tiyisli xalıqsız. Sizler ózlerińizdi qarańǵılıqtan Óziniń ájayıp nurına shaqırǵan Qudaydıń tań qalarlıq islerin járiyalaw ushın tańlandıńlar.

1 Petr 2:9

Solay etip, háy tuwısqanlarım, Qudaydıń miyrim-shápááti haqı sizlerge jalbarınaman: denelerińizdi Qudayǵa unaytuǵın muxaddes hám tiri qurbanlıq qılıp, Oǵan baǵıshlańlar. Bul sizlerdiń Quday aldındaǵı ılayıqlı xızmetińiz boladı.

Rimliler 12:1

Hár túrli xızmetler bar, biraq bizler xızmet etetuǵın Iyemiz jalǵız.

1 Korinfliler 12:5

Patshaǵa tiyisli qaznalarǵa qaraw Adiel ulı Azmawetke, al qala átirapındaǵı ... Egislik jerlerdi tárbiyalaytuǵın diyxanlarǵa Kelub ulı Ezriy, júzim baǵlarına ramalı Shimey ... Bulardıń hámmesi Dawıt patshanıń mal-múlki ústinen qaraytuǵın xızmetkerler edi.

1 Jılnama 27:25–27, 31

Quday iseniwshiler jámáátinde birinshiden elshilerdi, ekinshiden payǵambarlardı, úshinshiden muǵallimlerdi, sońınan káramat kórsetetuǵınlardı, awırıwlarǵa shıpa beretuǵın sıyǵa iye bolǵanlardı, basqalarǵa járdem beriwshilerdi, jaqsı shólkemlestiriwshilerdi hám ruwxıy tillerde sóyleytuǵınlardı tayınladı. Bulardıń hámmesin iske asırıwshı bir nárse hám anıq sol Muxaddes Ruwx. Muxaddes Ruwx bul sıylardı Óz qálewi boyınsha hár kimge bólip beredi.

1 Korinfliler 12:28, 11

Hár birińiz jaqsı xızmetshi sıpatında Qudaydıń sizlerge miyrimlilik penen bergen hár túrli ruwxıy sıyların qollana otırıp, bir-birińizge xızmet etińler. Adamlar aldında sóylegen adam Qudaydıń sózine say sóylesin. Basqalarǵa xızmet etetuǵın adam Qudaydıń bergen kúshi menen xızmet etsin. Usılayınsha, Iysa Masiyx arqalı Quday hár bir iste alǵıslansın. Ullılıq hám qúdiret máńgi-baqıy Masiyxtiki.

1 Petr 4:10–11