Kúndelikli nur, 9-oktyabr: Biraq Sen keshiretuǵın, miyrimli

Biraq Sen keshiretuǵın, miyrimli, rehimli.

Nexemiya 9:17

Ayırımlar keshikti dep esaplaǵanday, Iyemiz wádesin orınlawdı keshiktirip atırǵan joq. Kerisinshe, Ol hesh kimniń nabıt bolıwın qálemey, hár bir adam táwbe etsin dep, sizler ushın sabırlılıq penen kútip turıptı.

2 Petr 3:9

Súyikli tuwısqanımız Paveldiń de ózine berilgen danalıǵı menen sizlerge jazǵanınday.

2 Petr 3:15

Men gúnakarlardıń ishindegi eń jamanı bolsam da, Masiyx Iysa maǵan rehim etti. Keyinirek Ózine isenip, máńgilik ómirge erisetuǵınlarǵa órnek bolıwım ushın, Ol maǵan sheksiz sabırlıǵın kórsetti.

1 Timofey 1:16

Burın Muxaddes Jazıwlarda aytılǵanlardıń hámmesi de bizlerge tálim beriw ushın jazılǵan. Solay etip, bizler olar arqalı sabırlılıq hám jubanısh tawıp, úmit penen jasay alamız.

Rimliler 15:4

Ya bolmasa, Qudaydıń keń peyilliliginiń seni táwbege alıp keletuǵının bilmey, Onıń sheksiz keń peyilliligin, sabırlılıǵın hám shıdamlılıǵın pisent etpeyseń be?

Rimliler 2:4

Kiyimińizdi emes, júreklerińizdi jırtıń». Qudayıńız Jaratqan Iyege qaytıń. Sebebi Jaratqan Iye miyrimli, rehimli, Sabır-taqatlı hám súyispenshiligi ullı. Jazalawdan waz keshetuǵın Quday.

Ioel 2:13

Jaratqan Iyeniń sózleri pákdur.

Zabur 11:7

Sóziń sonday pák, Qulıń onı súyedi.

Zabur 118:140

Jaratqan Iyeniń pármanları durıs, Júrekti shadlıqqa toltırar. Jaratqan Iyeniń buyrıqları anıq, Olar kózlerge nur berer.

Zabur 18:9

Qudaydıń hár bir sózi haq, Ol Ózin panalaytuǵınlardıń qalqanı. Onıń sózlerine hesh nárse qospa, Qossań, Ol seni áshkaralar, ótirikshi bolıp qalarsań.

Hikmetler 30:5–6

Saǵan qarsı gúna islemewim ushın, Júregimde saqladım sózlerińdi. Pármanlarıń haqqında tereń oy juwırtaman, Seniń jollarıńa dıqqat qılaman.

Zabur 118:11, 15

Tuwısqanlarım, juwmaqlap aytqanda, tek ǵana nelerdiń haqıyqıy, nelerdiń húrmetli, nelerdiń haq, nelerdiń pák, nelerdiń unamlı, nelerdiń maqtawǵa turarlı, jáne de, neniń jaqsı hám neniń alǵısqa ılayıqlı ekeni haqqında tereń oylańlar.

Filipliler 4:8

Jańa tuwılǵan nárestelerdiń ana sútine qushtar bolǵanınday, sizler de ruwxıy taza sút bolǵan Qudaydıń sózine qushtar bolıńlar. Sonda azıq alıp ósip, qutqarılasızlar.

1 Petr 2:2

Óytkeni óz paydası ushın Qudaydıń sózin satıp beretuǵın kóp adamlar bar. Biraq, bizler onday adamlar emespiz. Bizler Quday tárepinen jiberilgen hám Masiyxqa tiyisli bolǵan adamlar sıpatında Xosh Xabardı Quday aldında haq kewil menen járiyalaymız.

2 Korinfliler 2:17

Qudaydıń sózin burmalamay, haqıyqattı ashıq aytıwımız arqalı ózimizdi Quday aldında hár bir adamnıń hújdanına tapsıramız.

2 Korinfliler 4:2