Kúndelikli nur, 19-oktyabr: Olay bolsa, buǵan ne deymiz?

Jaratqan Iye seniń súyenishiń bolıp, Ayaqlarıńdı duzaqqa túsiwden saqlaydı.

Hikmetler 3:26

Adamzattıń ǵázebi Seniń dańqıńa aylanar, Qalǵan ǵázebin Óziń basasań.

Zabur 75:11

Patshanıń júregi Jaratqan Iyeniń qolındaǵı suw aǵısına uqsar, Ol patshanı qálegen jaǵına baǵıtlar.

Hikmetler 21:1

Adamnıń jolı Jaratqan Iyege maqul bolsa, Ol onı dushpanları menen de jarastırar.

Hikmetler 16:7

Jaratqan Iyege intizarman, Janım Jaratqan Iyege intizar, Úmit baylayman Onıń sózine. Tańdı kútken saqshılardan kóbirek, Awa, tańdı kútken saqshılardan da kóbirek, Janım Iyeni kútedi.

Zabur 129:5–6

Jaratqan Iyege jalbarındım, Ol juwap berdi maǵan, Meni azat etti barlıq qáwip-qáterden.

Zabur 33:5

Ázelden bar bolǵan Quday seniń panańdur, Seni Ol Óziniń máńgilik qollarında alıp júrer. Dushpanlarıńdı aldıńnan quwıp shıǵarıp, Saǵan: „Olardı qırıp tasla!“ – dep aytadı.

Nızamnıń qaytalanıwı 33:27

Jaratqan Iyege úmit baylaǵan, Oǵan súyengen adam qanday baxıtlı!

Eremiya 17:7

Olay bolsa, buǵan ne deymiz? Eger Quday bizlerdi jaqlasa, bizlerge kim qarsı tura aladı?

Rimliler 8:31

Súyispenshilikten payda bolǵan jubanısh, Muxaddes Ruwx penen qarım-qatnas.

Filipliler 2:1

Hayaldan tuwılǵan insannıń, Ómiri qısqa, azapqa tolı boladı. Ol gúl sıyaqlı ósedi, solıp qaladı, Kóleńke sıyaqlı tez ótip ketedi, turıp qalmaydı.

Ayup 14:1–2

Men Ákemnen sorayman hám Ol sizler menen máńgi birge bolıwı ushın basqa Jaqlawshını jiberedi.

Yuxan 14:16

Men Ákemnen sorayman hám Ol sizler menen máńgi birge bolıwı ushın basqa Jaqlawshını jiberedi. Ákemniń Meniń atımnan jiberetuǵın Jaqlawshısı, Muxaddes Ruwx sizlerge hámmesin úyretedi.

Yuxan 14:16, 26

Qudayǵa, yaǵnıy Iyemiz Iysa Masiyxtıń Ákesine alǵıslar bolsın! Ol bizlerdiń rehimli Ákemiz hám tolıq jubanısh beriwshi Quday. Quday bizlerge barlıq qıyınshılıqlarımızda jubanısh beredi. Solay etip, bizler de Qudaydan alǵan jubanısh penen hár qıylı qıyınshılıqlarda bolǵan adamlarǵa jubanısh bere alamız.

2 Korinfliler 1:3–4

Sebebi bizler Iysanıń ólip, qayta tirilgenine isenemiz. Sol sıyaqlı, Iysaǵa isenip, bul dúnyadan kóz jumǵanlardı Quday Onıń menen birge qayta alıp keletuǵınına da isenemiz. ... Solay etip, hámme waqıt Iyemiz benen birge bolamız. Mine, usı sózler menen bir-birińizdi jubatıńlar.

1 Salonikalılar 4:14, 17–18