Kúndelikli nur, 23-oktyabr: Ruwx ómir beredi (Yuxan 6:63)

Sońınan xalıqqa: – Abaylańlar, dúnyaxorlıqtan saq bolıńlar! Óytkeni adamnıń ómiri onıń mal-múlkiniń kópligine baylanıslı emes, – dep.

Luka 12:15

Haq adamnıń az zatı, Napáktiń baylıǵınan góre abzaldur.

Zabur 36:16

Kóp baylıq penen táshiwishte jasaǵannan góre, Az baylıq penen Jaratqan Iyeden qorqıp jasaǵan abzalıraq.

Hikmetler 15:16

Ózińde barǵa qanaat etip, Qudaydıń jolı menen júriw – úlken jetiskenlik. Jeytuǵın hám kiyetuǵın nárselerimiz bolsa, usılarǵa qanaat eteyik.

1 Timofey 6:6, 8

Jarlılıq ta, baylıq ta bermeshi maǵan, Tek bere gór kúndelikli nanımdı. Toyınıp ketip, Sennen bas tartıp: «Jaratqan Iye degen kim ózi?» – dep aytpayın, Jarlılanıp qalıp urlıq islep, Seniń atıńa daq túsirip júrmeyin.

Hikmetler 30:8–9

Bizlerge búgin de kúndelikli nanımızdı bere gór.

Matta 6:11

– Sonlıqtan sizlerge aytatuǵınım: janıńız ushın ne iship, ne jeymiz dep, deneńiz ushın ne kiyemiz dep táshiwishlenbeńler. Jan awqattan, dene kiyimnen artıq emes pe?

Matta 6:25

Men sizlerdi shıjlansız, dorbasız, ayaq kiyimsiz jibergenimde, ne nárseden kemshilik kórdińler? – dedi. – Hesh nárseden, – dep juwap berdi olar.

Luka 22:35

Aqshanı súyiwden awlaq bolıp jasańlar. Ózlerińizde barǵa qanaat etińler. Óytkeni Quday bılay degen: «Seni hesh qashan taslap ketpeymen, hesh qashan qaldırmayman».

Evreyler 13:5

Ruwx ómir beredi.

Yuxan 6:63

Óytkeni Muxaddes Jazıwda bılay delingen: «Birinshi adam – Adam-ata tiri jan boldı». Al sońǵı Adam – Iysa Masiyx ómir beriwshi ruwx boldı.

1 Korinfliler 15:45

Deneden tuwılǵan – dene, Muxaddes Ruwxtan tuwılǵan – ruwx boladı.

Yuxan 3:6

Ol bizlerdi qılǵan haq islerimiz sebepli emes, al Óz miyrim-shápááti menen qutqardı. Bizlerdi Muxaddes Ruwxı arqalı gúnadan tazalap, qaytadan tuwıldırdı hám jańaladı.

Titus 3:5

Kim de kim Masiyxtıń Ruwxına iye bolmasa, ol Masiyxqa tiyisli emes. Al eger ishińizde Masiyx jasap atırǵan bolsa, deneńiz gúna sebepli óletuǵın bolsa da, ruwxıńız aqlanǵanıńız sebepli tiri boladı. Iysanı ólimnen qayta tiriltken Qudaydıń Ruwxı ishińizde jasap atırǵan bolsa, onda Masiyx Iysanı ólimnen qayta tiriltken Quday ishińizde jasap atırǵan Óz Ruwxı arqalı óletuǵın deneńizdi de tiriltedi.

Rimliler 8:9–11

Endi jasap atırǵan men emes, al mende Masiyx jasap atır. Házir denede jasap atırǵan ómirimde meni súygen hám men ushın Ózin qurban etken Qudaydıń Ulına degen isenimim menen jasap atırman.

Galatiyalılar 2:20

Sonlıqtan sizler de ózlerińizdi gúna ushın óli dep, al Masiyx Iysa menen qatnasta bolıp, Quday ushın tiri dep esaplańlar.

Rimliler 6:11