Kúndelikli nur, 27-oktyabr: Ol keselliklerimizdi Ózine aldı

Ol keselliklerimizdi Ózine aldı, Awırıwlarımızdı Ózine júkledi.

Matta 8:17

Ruwxaniy onı páklew ushın eki hadal tiri qus, kedr aǵashın, qırmızı jip hám mayoran shóbin ákeliwdi buyırsın. Ruwxaniydiń buyrıǵı menen quslardıń birewin taza bulaq suwı quyılǵan ılay ıdıstıń ústinde shalsın. Keyin ruwxaniy tiri qustı, kedr aǵashın, qırmızı jipti hám mayoran shóbin soyılǵan qustıń qanı menen aralastırılǵan taza bulaq suwına batırsın hám teri keselliginen páklenetuǵın adamnıń ústine jeti márte serpsin. Sonnan keyin, ruwxaniy onı hadal dep járiyalap, tiri qustı ashıq dalaǵa jibersin.

Lebiyliler 14:4–7

Teri keselligi pútkil denesin qaplaǵan bir adam keldi. Ol Iysanı kórip, ayaǵına jıǵıldı da: – Iyem! Eger Sen qáleseń, meni kesellikten tazalay alasań, – dep jalındı.

Luka 5:12

Iysanıń janı ashıp, qolın sozıp, oǵan tiygizdi de: – Qáleymen, tazalan! – dedi. Sol waqıtta-aq sol adam teri keselliginen qutılıp, tazalandı.

Mark 1:41–42

Náletlegen adamıńız náletlenetuǵının bilemen.

Sanlar 22:6

– Qudayǵa mútáj ekenligin túsingenler baxıtlı! Aspan Patshalıǵı olardiki!

Matta 5:3

Qayǵırıp júrgenler baxıtlı! Olar jubanısh tabadı. Kishipeyilliler baxıtlı! Olar jer júzine iyelik etedi. Haqlıqtı ańsap, oǵan umtılǵanlar baxıtlı! Quday olardı tolıq qanaatlandıradı. Miyrim-shápáátliler baxıtlı! Olar miyrim-shápáát aladı. Pák kewilliler baxıtlı! Olar Qudaydı kóredi. Jarastırıwshılar baxıtlı! Olar Qudaydıń balaları dep ataladı. Haqlıq ushın quwdalanǵanlar baxıtlı! Aspan Patshalıǵı olardiki. Adamlar sizlerdi Men sebepli xorlasa, quwdalasa, hár túrli ótirik sózler menen jamanlasa, sizler baxıtlısızlar! Quwanıńlar hám shadlanıńlar! Óytkeni sizlerdiń aspandaǵı sıyıńız úlken.

Matta 5:4–12

Qudaydıń sózin tıńlap, onı orınlawshılar onnan da baxıtlı! – dedi.

Luka 11:28

Ómir tereginen jewge huqıq alıw ushın hám qalaǵa dárwaza arqalı kiriw ushın kiyimlerin juwǵanlar qanday baxıtlı!

Ayan 22:14