Kúndelikli nur, 28-oktyabr: Óz qolı Onı jeńiske eristirdi

Jaratqan Iye hesh kimniń joqlıǵın kórdi, Aralasatuǵın hesh kimniń joqlıǵına hayran qaldı. Óz qolı Onı jeńiske eristirdi.

Iyshaya 59:16

Sen qurbanlıq hám sadaqalardı qálemediń, Jandırılatuǵın hám gúna qurbanlıqların talap qılmadıń, Biraq boysınıwım ushın qulaqlarımdı ashtıń. Sonda men bılay dedim: «Mine, men keldim, Orama kitapta men haqqında jazılǵan. Seniń erkińdi orınlawdan ráhátlenemen, Qudayım, Júregimniń tórindedur Seniń nızamıń».

Zabur 39:7–9

Sonlıqtan Ákem Meni súyedi. Janımdı Mennen hesh kim tartıp ala almaydı. Biraq Men onı Ózim beremen. Mende onı beriwge de, qaytıp alıwǵa da biylik bar.

Yuxan 10:17–18

Mennen basqa quday joq, Men ádil Qudayman hám Qutqarıwshıman, Mennen basqası joq. Pútkil dúnya, Maǵan júz burıń, qutqarılasız! Men Qudayman, basqası joq.

Iyshaya 45:21–22

Qutqarılıwımız ushın aspan astında adamlarǵa berilgen basqa hesh bir at joq.

Elshiler 4:12

Sebebi sizler Iyemiz Iysa Masiyxtıń miyrimin bilesizler: Ol Ózi bay bola tura, sizler ushın bul dúnyada jarlı boldı. Onıń jarlılıǵı menen sizler ruwxıy baylıqqa iye boldıńız.

2 Korinfliler 8:9

Dushpannıń pútkil kúsh-qúdiretin jeńiwge biylik berdim.

Luka 10:19

Saq hám sergek bolıńlar. Dushpanıńız shaytan kimdi jutsam eken dep, aqırǵan arıslanday bolıp gezip júr.

1 Petr 5:8

Shaytanǵa qarsı turıńlar, sonda ol sizlerden qashıp ketedi.

Yaqıp 4:7

Shaytannıń hiylelerine qarsı tura alıw ushın, Qudaydıń barlıq sawıt-saymanları menen qurallanıńlar. Óytkeni urısımız qan hám etten ibarat bolǵan adam balasına qarsı emes, al bul dúnyadaǵı kózge kórinbeytuǵın hákimlerge, biylewshilerge, bul qarańǵı zamannıń kúshlerine hám aspandaǵı jawız ruwxlarǵa qarsı. Sonlıqtan jaman kúnde olarǵa qarsılıq kórsete alıwıńız ushın hám tolıq jeńiske eriskenińizden soń, bekkem tura alıwıńız ushın, Qudaydıń barlıq sawıt-saymanları menen qurallanıńlar. Solay etip, ornıńızda bekkem turıńlar. Belińizdi haqıyqat belbewi menen buwıp, kókiregińizge haqlıq sawıtın kiyińler. Tınıshlıq Xosh Xabarın járiyalaw tayarlıǵın ayaqlarıńızǵa ayaq kiyim qılıp kiyińler. Bulardıń hámmesine qosa shaytannıń barlıq otlı oqların óshire alatuǵın isenim qalqanın qollarıńızǵa alıńlar.

Efesliler 6:11–16

Jaǵdayımdı kórip, shad bolmań, háy, dushpanlarım! Jıǵılsam da, ózim turaman. Qarańǵılıqta qalsam da, Jaratqan Iye maǵan nur boladı.

Mixa 7:8