Kúndelikli nur, 30-oktyabr: Jaratqan Iyeniń qutqarıwın

Jaratqan Iyeniń qutqarıwın, Únsiz kútken jaqsı.

Joqlaw 3:26

Quday rehim etiwdi umıtqanı ma? Miyrim-shápáátiniń ornın ǵázep basqanı ma?

Zabur 76:10

Qorqınıshqa túsip, bılay dedim: «Seniń dárgayıńnan shıǵarıldım!» Biraq járdemge shaqırǵanımda Seni, Esittiń meniń jalbarınıwımdı.

Zabur 30:23

Solay eken, Quday Ózine kúni-túni jalbarınıp atırǵan, Ózi tańlap alǵan adamlarınıń huqıqın qorǵamay ma? Olardı kóp kúttirip qoya ma? Sizlerge aytatuǵınım: kóp keshikpey olardıń huqıqın qorǵaydı.

Luka 18:7–8

Jaratqan Iyege tapsırıp kút, Ol seni qutqarar.

Hikmetler 20:22

Jaratqan Iyeniń aldında sabırlı bol, Oǵan úmit bayla, Háwes qılma óz jolında áwmetli bolıp, Jawız niyetlerin ámelge asırǵanlarǵa.

Zabur 36:7

Biraq sizler urıspaysız. Tek barıp, ornıńızdı iyelep turıp, Jaratqan Iyeniń qutqarıwın kóresiz. Háy.

2 Jılnama 20:17

Solay eken, jaqsılıq islewden jalıqpańlar. Eger hálsizlenip qalmasaq, waqtı kelgende jemisin orıp alamız.

Galatiyalılar 6:9

Sabırlı bolıńlar! Áne, diyxan sabırlılıq etip, birinshi hám sońǵı jawınlar jawǵansha, jerdiń qımbatlı zúráátin kútip atır.

Yaqıp 5:7

Bizge túlkilerdi, Júzimzarlardı wayran etip atırǵan, Túlkisheklerdi uslap beriń. Júzim baǵlarımız gúl ashpaqta.

Qosıqlar qosıǵı 2:15

Kim óz qátesin kóre aladı? Bilmey qılǵan gúnalarımnan Óziń pákle.

Zabur 18:13

Arańızdaǵı hesh birińizdiń Qudaydıń miyriminen ayırılıp qalmawı ushın hám arańızda sizlerge zıyan tiygizip, kóplerdi záhárleytuǵın ashshı tamır kógerip shıqpawı ushın, bir-birińizge jaqsılap qarańlar.

Evreyler 12:15

Sizler jaqsı baratır edińler. Haqıyqatqa boysınıwdı dawam etiwden sizlerdi kim aynıttı?

Galatiyalılar 5:7

Sizlerdiń arańızda jaqsı isti baslaǵan Qudaydıń bunı Masiyx Iysanıń kúnine shekem tolıq tamamlaytuǵınına anıq isenemen. Tek jasap atırǵan ómirińiz Masiyxtıń Xosh Xabarına ılayıqlı bolsın.

Filipliler 1:6, 27

Til de deneniń kishkene bir múshesi bolsa da, kóp maqtanadı. Kishkene bir ushqın sonshelli úlken toǵaydı jandırıp jibere aladı. Til – bul ot, denemizdiń músheleri arasında bir jamanlıq dúnyası. Ol pútkil denemizdi iplaslaydı hám ómirimizdi jandıradı. Onıń ózi de dozaq otında janadı. Biraq tildi hesh bir adam boysındıra almaydı. Ol toqtatıp bolmaytuǵın jamanlıq bolıp, óltiriwshi záhárge tolı.

Yaqıp 3:5–6, 8

Sózińiz hámme waqıtta jaǵımlı hám duzlı bolsın.

Kolosalılar 4:6