Үш әтирдиӊ орталық әтири болған алоэ, барлық азап шегиўлердиӊ артында жатқан сүйиў ҳаққында сөйлейди. Ол басқа барлық әтирлерден гөре хош ийсли ҳәм қымбатлы еди; сырлы Шығыстан ҳеш қашан оныӊ менен салыстырылатуғын нәрсе шықпаған. Мен ески сөзликте оныӊ ҳаққында төмендеги мағлыўматты таптым: «Бул Ҳиндистанда өсетуғын ағаштыӊ ишки ағашы, яки жүреги еди, өте хош ийсли, салмағынан да қымбатлырақ, ҳәм барлық әззилик ҳәм нерв кеселликлери ушын үстин дәри деп айтылған». Егер сол сөзликтиӊ билимли дүзиўшиси Мәсихтиӊ сүйиўин сүўретлеўди қәлеген болса, ол буннан жақсырақ ислей алмас еди.
Алоэ ағашыныӊ хош ийси ашылыўы ушын оныӊ жүрегине шекем жарылыўы керек еди, ҳәм Қалварий крестинде, Қудайдыӊ биздиӊ гүнамызға қарсы ҳүкиминиӊ қылышы менен жарылғанда, Мәсихтиӊ жүреги Өзиниӊ сүйиўиниӊ барлық уллылығын ашты, ҳәм әлемде буннан да хош ийсли нәрсе жоқ, Мәсихтиӊ билиўден өткен сүйиўи. Буннан тысқары, Оныӊ сүйиўи алтыннан да қымбатлырақ. Егер дүнья барлық алтынын берип, оны бизге Мәсихтиӊ сүйиўин билиўге айырбаслаўды усынса, бизден биреў сол билимди сол үлкен баҳаға айырбаслай ма? Биз айырбасламас едик, себеби Оныӊ сүйиўи алтыннан да қымбатлырақ. Оны сатып алыў мүмкин емес, бирақ Ол Өзиниӊ баҳасыз байлығын биз ушын шексиз төкти.
Ол барлық әззиликлер ушын үстин дәри деп айтылады. Биз бизди даңқлы тәғдиримизге, Қозыныӊ тойына алып баратуғын зыяратшы жолында шаршап, әззилеймиз бе? Бундай жағдай ушын үстин дәри бар, келиӊ, Сүйклимизниӊ қолына ҳәм жүрегине сүйенип, Оныӊ сүйиўиниӊ дәрисин жаӊадан татып көрейик.
