Шам. 6000 жыл бурын Кудай Адам ата менен Ҳаўа ананы жәннеттеги әжайып орталыққа орналастырды, онда олар ҳеш нәрсеге мүтәж болмады. Бирақ олардың Жаратыўшысының сүйиспеншилик пенен ғамхорлығы ҳәр күни көз алдында болса да, олар Оның оларға болған сүйиспеншилигине гүман етти ҳәм Оның еркине қарсы әмел етиўге аңлы түрде қарар қабыл етти. Олар Кудай менен бир дәрежеде болғысы келди — Оған уқсас болыўды — ҳәм Одан ғәрезсиз қарарлар қабыл етиўди қәледи. Бул сизге таныс па? Кудай бизден жақсы деп ойлаған нәрсемизди жасырғысы келеди деп қорқатуғынымыз көп жағдайда солай емес пе? Кейде биз Кудайдың ерки биздиң еркимиз бенен туўра келмейди деп қорқамыз, сонлықтан биз басқарыўды Оған бериўден ҳәм Оның басшылық етиўине рухсат бериўден тартынамыз.
Бирақ бүгин, биринши адамларға салыстырғанда, Кудайдың биз ушын тек ең жақсы режелери бар екенине исениў ушын бизде көп себеплер бар. Неге? Себеби Ол Өз сүйиспеншилигин Голгофада теңдеси жоқ түрде дәлилдеди! Исеним буннан не жуўмақ шығарады? «Өз Улын аямаған, бирақ Оны бәримиз ушын берген Ол, Оны менен бирге бизге барлық нәрсени де еркин бермей ме?» (Рим. 8:32). Егер Ол бизден Өзиндеги ең үлкен ҳәм ең қымбатлы ғәзийнени жасырмаған болса, Ол бизге жақсы болған басқа барлық нәрсени береди — ҳәм Ол буны бизден әлдеқайда жақсы биледи! Егер биз бир жағынан жанларымыздың мәңгилик қутылыўы ушын Кудайға исенсек, бирақ екинши жағынан Оның күнделикли нәрселерге де ғамхорлық ететуғынына белгили бир гүман етсек ҳәм сонлықтан өзимизди қорғаў ушын қолымыздан келгенше ҳәрекет етиўимиз керек болса, бул ақылға сыймайтуғын ҳәм туўра келмейтуғын ис емес пе?
Ийса Мәсих Өз Әкесиниң сүйиспеншилигинде тынышланды. Бул сүйиспеншилик ҳаққындағы күнделикли хабардарлық Оның қуўанышының дереги еди (Юҳ. 15:10–11). Ол Оған ҳәр дайым исенди ҳәм сонлықтан «Ҳаў, Әке» (Мат. 11:25–26 esv) дей алды, ҳәтте қыйын ўақытларда да. Ол күн-түн демей Кудайға басшылық ушын мүрәжат етти ҳәм Оны Өз турмысының ҳәр бир қарарына қослы (салыстырың: Заб. 16:7–8).
