Rabbiy jaqın — October 2, 2025: Даўыттың ата сыпатындағы қәтелери ҳәм бүгинги күн ушын сабақлар

⁶ Ákesi Dawıt hesh qashan oǵan: «Nege bulay islediń?» – dep, onı tártipke shaqırıp turmaytuǵın edi. Adoniya Abshalomnan keyin tuwılǵan bolıp, ol da júdá sımbatı kelisken jigit edi.

¹ Kelesi jılı báhárde, patshalar urısqa shıǵatuǵın waqıtta, Dawıt óz áskerbasıların hám pútkil Izrail áskerlerin Ioabtıń basshılıǵında urısqa jiberdi. Olar ammonlardı qırıp taslap, Rabba qalasın qamal qıldı. Biraq Dawıttıń ózi Erusalimde qalǵan edi. ² Bir kúni keshke qaray Dawıt tóseginen turdı da, saraydıń úshegine shıǵıp, arman-berman júre basladı. Ol sol jerden qarap, shomılıp atırǵan bir hayaldı kórdi. Hayal júdá sulıw edi. ³ Dawıt hayaldıń kim ekenin bilip keliw ushın, adam jiberdi. Sol adam qaytıp kelip, hayaldıń Eliamnıń qızı, xet xalqınan bolǵan Uriyanıń hayalı Bat-Sheba ekenligin ayttı. ⁴ Dawıt hayaldı alıp keliw ushın xızmetshilerin jiberdi. Hayal Dawıttıń aldına keldi. Dawıt etek kirinen endi tazalanǵan hayal menen jattı. Sońınan hayal úyine qayttı. ⁵ Hayal hámiledar bolıp qalǵan edi. Sonlıqtan ol Dawıtqa: «Men hámiledarman», – dep xabar jiberdi. ⁶ Sonda Dawıt Ioabqa: «Xet xalqınan bolǵan Uriyanı maǵan jiber», – degen xabar jolladı. Ioab Uriyanı Dawıttıń aldına jiberdi. ⁷ Uriya aldına kelgende, Dawıt onnan Ioab penen áskerlerdiń jaǵdayı hám urıstıń barısı haqqında soradı. ⁸ Sońınan Uriyaǵa: – Úyińe barıp, dem al, – dedi. Uriya saraydan shıqqannan soń, patsha onıń izinen sıy jiberdi. ⁹ Degen menen, Uriya úyine qaytpay, patshanıń barlıq xızmetshileri menen birge saray dárwazası aldında uyıqladı. ¹⁰ Dawıtqa Uriyanıń úyine qaytpaǵanı haqqında xabar jetkende, Dawıt Uriyanı shaqırtıp: – Sen uzaq waqıt sırtta boldıń-ǵo, nege úyińe qaytpadıń? – dep soradı. ¹¹ Uriya Dawıtqa: – Qudaydıń sandıǵı da, Izrail hám Yahuda áskerleri de ordada qaldı. Sárkárdam Ioab penen siziń adamlarıńız bolsa, qır dalada túnep atır. Solay eken, iship-jep, hayalım menen jatıw ushın, men úyime bara alaman ba? Aldıńızda ant iship aytaman: men hasla bulay islemeymen, – dep juwap berdi. ¹² Sonda Dawıt Uriyaǵa: – Búgin de usı jerde qal, erteń seni qaytarıp jiberemen, – dedi. Uriya sol kúni Erusalimde qaldı. Erteńine ¹³ Dawıt Uriyanı shaqırıp alıp, ishkizip-jegizdi hám onı más qıldı. Biraq keshte Uriya jáne úyine barmay, patshanıń xızmetshileri menen birge uyıqlaw ushın burınǵı jatqan ornına bardı. ¹⁴ Sonlıqtan kelesi kúni azanda Dawıt Ioabqa bir xat jazıp, onı Uriyanıń qolına berip jiberdi. ¹⁵ Ol xatta bılay dep jazǵan edi: «Uriyanıń jaradar bolıp óliwi ushın, onı sawashtıń eń qızǵan jerine qoyıp, bir ózin qaldır». ¹⁶ Solay etip, Ioab qalanı qorshap alǵanda, dushpanlardıń márt áskerleriniń qay jerde turatuǵının bilgenlikten, Uriyanı sol jerge qoydı. ¹⁷ Qala xalqı shıǵıp, Ioabtıń áskerleri menen sawashqa tústi. Sawashta Dawıttıń áskerlerinen ayırımları qaza taptı. Qazalanǵanlar arasında xet xalqınan bolǵan Uriya da bar edi. ¹⁸ Sawashtıń barısı haqqında xabarlaw ushın, Ioab Dawıtqa adam jiberdi. ¹⁹ Ol xabarshıǵa bılay dep buyırdı: – Sen sawashtıń barısı haqqında patshaǵa jetkergenińde, ²⁰ patsha ǵázeplenip, saǵan: «Olar menen urısıw ushın qalaǵa nege bunshelli jaqınlastıńız? Olardıń qala diywalınan oq atatuǵının bilmeytuǵın ba edińiz? ²¹ Erubbeshettiń ulı Abimelexti qalay óltirgenin bilmeytuǵın ba edińiz? Tebeste bir hayal diywaldan Abimelextiń ústine digirman tasın taslap jiberip, onı óltirgeni esińizde joq pa edi? Solay eken, nege diywalǵa bunshelli jaqın bardıńlar?» – degende, sen oǵan: «Xet xalqınan bolǵan qulıńız Uriya da óldi», – dep aytarsań. ²² Xabarshı jolǵa shıqtı. Ol Dawıtqa barǵanda, Ioabtıń ózine aytqanlarınıń hámmesin oǵan jetkizip bılay dedi: ²³ – Dushpan bizlerden ústin shıqtı. Olar qaladan shıǵıp, bizler menen qır dalada urıstı. Biraq bizler olardı qala dárwazasına shekem quwıp bardıq. ²⁴ Sonda mergenler siziń adamlarıńızǵa qaray diywaldan oq attı. Patshanıń adamlarınıń ayırımları qaza taptı, xet xalqınan bolǵan qulıńız Uriya da qaza taptı. ²⁵ Dawıt xabarshıǵa: – Ioabqa bılay dep ayt: «Bolǵan waqıyaǵa qapa bolma. Sawashta kimniń óletuǵının bilip bolmaydı. Qalaǵa qarsı hújimdi kúsheytip, onı jer menen jeksen qılıńlar». Usı sózlerdi aytıp, oǵan jiger ber, – dedi. ²⁶ Uriyanıń hayalı kúyewiniń qaza tapqanın esitip, ol ushın aza tuttı. ²⁷ Aza tutıw waqtı tamam bolǵanda, Dawıt hayaldı sarayǵa aldırdı. Hayal Dawıtqa turmısqa shıǵıp, oǵan bir ul tuwıp berdi. Biraq Dawıttıń bul isi Jaratqan Iyeniń názerinde jaman is boldı.

⁶ Solay etip, Amnon tósekke jatıp alıp, ózin awırıp atırǵanday etip kórsetti. Patsha onı kóriwge kelgende, Amnon patshaǵa: – Aǵa, ótinish, qarındasım Tamara kelip, kóz aldımda bir-eki taba nan pisirip bersin. Men onıń qolınan nan jeyin, – dedi. ⁷ Sonda Dawıt sarayda jasap atırǵan Tamaraǵa: «Ájaǵań Amnonnıń úyine barıp, oǵan jeytuǵın bir nárse pisirip ber», – dep xabar jiberdi.

3 Patshalar 1:6 · 2 Patshalar 11 · 2 Patshalar 13:6–7 · QrqMK22