1 Patsha Lemueldiń hikmetli sózleri, anasınıń oǵan úyretkenleri:
2 Balam, qursaǵımnan shıqqan balam!
Balam, wáde berip, tilep alǵanım!
3 Kúshińdi hayallarǵa jumsama,
Patshalardı nabıt qılatuǵınlarǵa jaslıǵıńdı sarp qılma.
4 Lemuel, patshalarǵa sharap ishiw jaraspas,
Húkimdarlarǵa ótkir ishimlikti ańsaw jaraspas.
5 Ishkende, olar nızamdı umıtar,
Ezilgenlerden huqıqın tartıp alar.
6 Ótkir ishimlikti ólip baratırǵanǵa,
Sharaptı ruwxı qıynalǵanǵa ber.
7 Ol iship, jarlılıǵın umıtsın,
Qayǵı-hásiretin endi eske almasın.
8 Awzıńdı óz huqıqın qorǵay almaytuǵınlar ushın,
Ezilgenlerdi qorǵaw ushın ash.
9 Awzıńdı ádil húkim shıǵarıw ushın,
Jarlı hám mútájdiń isin qorǵaw ushın ash.
10 Jaqsı hayaldı kim taba alar?
Ol qımbatbaha taslardan da qımbat.
11 Kúyewi oǵan shın júrekten isener,
Hesh nárseden mútájlik kórmes.
12 Ol kúyewine jamanlıq emes,
Bir ómir jaqsılıq qılar.
13 Ol jún hám zıǵır tabar,
Ráhátlenip, óz qolları menen isler.
14 Ol sawdagerdiń kemesine uqsar,
Nanın uzaqtan alıp keler.
15 Ol tań atpay turıp,
Xojalıǵı ushın awqat tayarlar,
Shorılarına da tapsırma berer.
16 Atızdı kózden keshirip, satıp alar,
Eńbeginiń túsiminen júzim otırǵızar.
17 Belin bekkem buwıp,
Qollarına kúshin jıynar.
18 Ol isiniń paydalı ekenin biler,
Shırası túnde de óshpes.
19 Qolların sharıqqa qoyar,
Barmaqları menen urshıq iyirer.
20 Jarlılarǵa qolın sozar,
Mútájlerge qol berer.
21 Úy-ishin oylap, qardan qorqpas,
Úyindegiler qırmızı kiyim kiygen.
22 Ol ózi ushın tósek tiger,
Kiyimleri shım qızıl hasıl zıǵırdan.
23 Kúyewiniń ataǵı keń jayılıp,
El aqsaqalları menen keńes qurar.
24 Hayal zıǵırdan kiyim tigip satar,
Sawdagerlerdi qayıs penen támiyinler.
25 Kúsh hám abıray onıń kiyimi,
Shad bolıp baǵadı erteńgi kúnge.
26 Ol danalıq penen sóyler,
Mehir menen násiyat qılar.
27 Xojalıq islerin baqlap barar,
Miynetsiz nan jemes.
28 Balaları turıp, raxmet aytar,
Kúyewi de bılay dep onı maqtar:
29 «Jaqsı hayallar kóp,
Biraq sen hámmesinen artıqsań».
30 Súykimlilik aldamshı, sulıwlıq ótkinshi,
Biraq Jaratqan Iyeden qorqatuǵın hayal maqtawǵa ılayıq.
31 Oǵan miynetine jarasa sıy berińler,
Isleri qala dárwazası aldındaǵı keńeste táriyiplensin!
16 Qudaydı bilemiz dese de, islegen isleri menen Onnan tanadı. Olar – jerkenishli, Qudaydıń sózine qulaq aspaytuǵın hám hár qanday jaqsı iske jaramsız adamlar.
1 Al saǵan kelsek, sen durıs tálimat boyınsha tálim ber. 2 Úlken jastaǵı er adamlarǵa saldamlı hám húrmetke miyasar bolıwdı, ózlerin tutıp biliwdi, isenimde, súyispenshilikte hám sabırlılıqta bekkem bolıwdı úyret.
3 Sol sıyaqlı, úlken jastaǵı hayallarǵa da húrmetke ılayıqlı ómir súriwdi, ósekshi hám sharaptıń qulı bolmawdı, al jaqsılıqtı úyretiwshi bolıwı kerekligin úyret. 4-5 Sonda úlken jastaǵı hayallar jas hayallarǵa aqıl-násiyat bere aladı. Qudaydıń sózine til tiymewi ushın, olar jas hayallarǵa kúyewlerin hám balaların súyiwdi, ózlerin tutıp biliwdi, pák, xojalıqqa jankúyer, miyrimli bolıwdı hám kúyewlerine boysınıwdı úyrete aladı.
Hikmetler 31 · Titus 1:16 · Titus 2:1–5 · QrqMK22
Bul xattıń avtorı endi Titusqa tikkeley múráját etip, oǵan máshixiylerdiń turmıstıń hár bir tarawındaǵı minez-qulqına sáykes keletuǵın nárselerdi úyretiwdi buyıradı. Yadta saqlań, Titus penen islesip atırǵan ayırım múminler jańadan Másihke ótilgen evreyler edi, biraq kópshiligi butparastlar edi. Ózleriniń burınǵı isenimsiz turmıslarında olar “jigirkenshli, boysınbas hám hár bir jaqsı is ushın jaramas” edi (1:16). Endi olardıń turmısları – hám bizlerdiki – basqasha bolıwı kerek edi.
