14 Olar basqa shákirtlerine qaytıp kelgende, shákirtlerdi qorshaǵan kóp xalıqtı hám olar menen tartısıp turǵan diniy muǵallimlerdi kórdi. 15 Pútkil xalıq Iysanı kóriwden tań qalıstı hám juwırısıp kelip, Oǵan sálem berdi. 16 Iysa olardan:
– Olar menen ne haqqında tartısıp tursızlar? – dep soradı.
17 Xalıq arasınan bir adam Oǵan juwap berip:
– Ustaz! Men Saǵan tilsiz ruwx urǵanlıqtan gúńelek bolıp qalǵan balamdı alıp keldim. 18 Balamdı ruwx tutqanda, jerge jıǵadı. Onıń awzında kóbik payda boladı hám ol tislerin qayrap, qatıp qaladı. Men Seniń shákirtlerińnen jawız ruwxtı quwıp shıǵarıwdı ótingen edim, biraq olardıń qolınan kelmedi, – dedi.
19 Sonda Iysa olarǵa:
– Háy, isenbeytuǵın áwlad! Men qashanǵa deyin sizler menen birge bolaman? Qashanǵa deyin sizlerge shıdayman? Balanı Maǵan alıp kelińler, – dedi.
20 Olar balanı Iysaǵa alıp keldi. Iysanı kóriwden ruwx balanı dárriw qaltırattı. Bala jerge jıǵıldı da, awzınan kóbigi aǵıp, awnap jattı. 21 Sonda Iysa balanıń ákesinen:
– Bunday bolǵanına qansha waqıt boldı? – dep soradı.
Ákesi:
– Kishkene bala waqtınan usınday. 22 Ruwx onı óltirmekshi bolıp, neshe márte otqa da, suwǵa da tasladı. Eger qolıńnan kelse, bizlerdi ayap, járdem ete gór, – dedi.
23 Iysa oǵan:
– Eger qolıńnan kelse, deyseń be? Isenetuǵın adamǵa hámme nárse múmkin, – dedi.
24 Balanıń ákesi dárhal jılap jiberip:
– Men isenemen, az isenimimniń bekkem bolıwına járdem et! – dep baqırdı.
25 Xalıqtıń juwırısıp kiyatırǵanın kórgende Iysa jawız ruwxqa keyip:
– Háy, tilsiz hám gereń ruwx! Buyıraman: onnan shıǵıp ket hám qaytıp oǵan kiriwshi bolma, – dedi.
26 Sonda ruwx shıńǵırıp, balanı qattı qaltırattı da, onnan shıǵıp ketti. Bala ólidey bolıp jatırǵanlıqtan, adamlardıń kóbisi:
– Ol ólip qaldı, – dedi.
27 Biraq Iysa onı qolınan uslap turǵızǵanda, ol ornınan turdı.
28 Iysa úyge kirgennen keyin, shákirtleri awlaqta Onnan:
– Bizler nege jawız ruwxtı quwıp shıǵara almadıq? – dep soradı.
29 Iysa olarǵa juwap berip:
– Jinlerdiń bunday túrin tek duwa etiw arqalı quwıp shıǵarıwǵa boladı, – dedi.
10 Olardan keyingi bólekti, óz úyiniń qarama-qarsısın Xarumaf ulı Edaya, al onnan keyingi bólekti Xashabniya ulı Xattush dúzetti.
Yaqıp 5:16 · Mark 9:14–29 · Nexemiya 3:10 · QrqMK22
Йедая деген ат «Қудайға жалбарыўшы» дегенди аңлатады. Ол өз шаңарағы ушын дуўа ететуғын адамның сүўрети. Еркеклер, қаншамыз шаңарақларымыз ушын дуўа етиўге ўақыт бөлемиз? Тек ғана «Раббым, шаңарағыма берекет бер» емес, ал ҳақыйқатында да дуўада азап шегип, шаңарақларымызды шаңарақлық қурбанлық үстелинде Раббымыздың алдына алып келемиз бе? Қаншамыз балаларымызға тизе бүгип, Атамызға сөйлегенде бизди еситиўге рухсат беремиз, шаңарағымыз ушын дуўада үстемлик етип, душпанның режеси болса да, шаңарақларымызды Раббымызға тапсырғанда Ол Өз режесин әмелге асыратуғынын билемиз бе? Шаңарағымыз ушын Раббымызға дуўа еткенде, тек ғана Раббымыз олардың сыртына қорғаныс тосқаўылын қойыўын емес, ал олардың ишки жақтан да беккемлениўин сораўды умытпаўымыз керек. Биз оларды душпаннан айыра алмаймыз, бирақ биз оларды душпаннан дуўада егилген Қудай Сөзи арқалы оқшаўлай аламыз.
Нехемиядағы буладам, Йедая, жалбарыўшы, дуўа дийўалын қурды. Өмиримизде қыйын, аўыртпалықлы, жүзлесиўи өте қыйын нәрселер болады. Булар тек ғана дуўа ҳәм ораза арқалы шешилетуғын нәрселер. Ийса қутылған жин кирип алған баланың жағдайы да сондай еди. Мине, бир адам, оның әкеси, бул үлкен мүтәжлик болғанда улын қайда алып барыўды билди. Ҳәм ол дәл солай иследи. Ол улын Ийса Мәсихке алып келди ҳәм Раббымыздан оны емлеўин сорады. Раббымыз оның дуўасын еситти ҳәм улын емледи (Марк 9:14–29). Биз балаларымызды Қудайдың алдына алып барыўымыз ҳәм олар ушын мәрҳамәт тахтында дуўа етиўимиз керек.
Биз үйлеримиздиң алдына, шаңарақларымыздың, ҳаялларымыздың ҳәм балаларымыздың қәўипсизлиги ушын дуўа дийўалын қурыўымыз керек, миннетлимиз, тийислимиз. «Әдил адамның нәтийжели, ықласлы дуўасы көп нәрсеге күши жетеди» (Жак. 5:16).
