Iyemiz jaqın — February 3, 2026: Asıl Bereyalılar sıyaqlı Kúndelikli Jazıwlardı Izertlew

1-² Húrmetli Teofil! Men birinshi kitabımda Iysanıń islegen isleri hám úyretiwge kiriskeninen baslap, Ózi tańlaǵan elshilerine Muxaddes Ruwx arqalı buyrıqlar bergennen soń, aspanǵa alınǵan kúnine deyin bolǵan waqıyalardıń hámmesin jazǵan edim.

¹¹ Beriyadaǵı yahudiylerdiń Salonikadaǵı yahudiylerge qaraǵanda pikiri keńirek edi. Olar Qudaydıń sózin úlken qızıǵıwshılıq penen qabıl etip, Pavel menen Silanıń aytqan sózleriniń durıs ekenin biliw ushın, hár kúni Muxaddes Jazıwlardı izertleytuǵın edi. ¹² Solay etip, yahudiylerdiń kóbisi hám kóplegen abıraylı grek hayalları menen er adamları isendi.

¹ Iysa shákirtlerine bılay dedi: – Júreklerińiz ǵam shekpesin. Qudayǵa isenińler, Maǵan da isenińler. ² Ákemniń úyinde orın kóp. Eger olay bolmaǵanda, sizlerge aytpas edim. Óytkeni Men sizler ushın orın tayarlawǵa ketip baratırman. ³ Men barıp, sizler ushın orın tayarlaǵanımnan soń, sizler de Men bolatuǵın jerde bolıwıńız ushın, jáne kelip, sizlerdi Óz janıma alıp ketemen. ⁴ Men baratuǵın jerge aparatuǵın joldı sizler bilesizler. ⁵ Tomas Iysaǵa: – Iyem, Seniń qayaqqa baratuǵınıńdı bilmeymiz-ǵo. Joldı qalay bile alamız? – dedi. ⁶ Iysa oǵan bılay dedi: – Men jol, haqıyqat hám ómirmen. Men arqalı bolmasa, hesh kim Ákege bara almaydı. ⁷ Eger Meni bilseńler, Ákemdi de bilesizler. Awa, Onı bilesizler, sebebi Onı kórdińler. ⁸ Filip Iysaǵa: – Iyem, bizlerge Ákeni kórset, bizlerge sonıń ózi jetkilikli, – dedi. ⁹ Iysa oǵan bılay dedi: – Filip, Men sonsha waqıttan beri sizler menen birge bolsam da, Meni ele bilmeyseń be? Meni kórgen Ákeni kórgen boladı. Sen ne ushın: «Bizlerge Ákeni kórset», – dep aytıp atırsań? ¹⁰ Meniń Ákede, Ákeniń Mende ekenine isenbeyseń be? Sizlerge aytqan sózlerimdi Ózligimnen aytıp turǵan joqpan, al Mende jasap atırǵan Áke Óz islerin islep atır. ¹¹ Meniń Ákede, Ákeniń Mende ekenine isenińler. Hesh bolmasa, islegen islerim arqalı Maǵan isenińler. ¹² Sizlerge shının, haqıyqatın aytaman: Maǵan isengen adamnıń ózi de Men islegen islerdi isleydi, hátte, olardan da úlkenirek islerdi isleydi. Sebebi Men Ákeme baratırman. ¹³ Áke Ulı arqalı ullılanıwı ushın, Meniń atım menen ne sorasańlar da, hámmesin orınlayman. ¹⁴ Meniń atım menen bir nárse sorasańlar, Men onı orınlayman. ¹⁵ – Eger Meni súyseńler, Meniń buyrıqlarımdı orınlaysızlar. ¹⁶ Men Ákemnen sorayman hám Ol sizler menen máńgi birge bolıwı ushın basqa Jaqlawshını jiberedi. ¹⁷ Ol – Haqıyqat Ruwxı. Dúnya Onı qabıl ete almaydı. Óytkeni Onı kórmeydi de, tanımaydı da. Biraq sizler Onı bilesizler. Sebebi Ol sizler menen birge jasaydı, Ol ishińizde boladı. ¹⁸ Sizlerdi jetim qılıp qaldırmayman, sizlerge qaytıp kelemen. ¹⁹ Birazdan keyin, dúnya Meni qaytıp kórmeydi. Biraq sizler Meni kóresizler. Óytkeni Men qayta tirilemen, sizler de qayta tirilesizler. ²⁰ Sol kúni sizler Meniń Ákemde, sizlerdiń Mende hám Meniń sizlerde ekenimdi bilesizler. ²¹ Meniń buyrıqlarımdı bilip, olardı orınlaǵan adam – Meni súyetuǵın adam. Meni súygen adamdı Ákem de súyedi. Men de onı súyip, oǵan Ózimdi kórsetemen. ²² Isqariotlı emes basqa Yahuda Iysaǵa: – Iyem, bul qalay bolǵanı, Ózińdi dúnyaǵa emes, bizlerge kórsetejaqsań ba? – dedi. ²³ Iysa oǵan bılay dep juwap berdi: – Kim de kim Meni súyse, Meniń sózimdi orınlaydı. Ákem de onı súyedi. Bizler oǵan kelip, onıń menen birge jasaymız. ²⁴ Meni súymegen adam sózlerimdi orınlamaydı. Sizler esitip atırǵan sózler Meniki emes, al Meni jibergen Ákemdiki. ²⁵ Men ele sizler menen birge bolǵan waqtımda sizlerge bulardı ayttım. ²⁶ Ákemniń Meniń atımnan jiberetuǵın Jaqlawshısı, Muxaddes Ruwx sizlerge hámmesin úyretedi. Ol Meniń sizlerge aytqanlarımnıń hámmesin eslerińizge túsiredi. ²⁷ Men sizlerge tınıshlıq qaldıraman. Óz tınıshlıǵımdı sizlerge beremen. Men beretuǵın tınıshlıq dúnya beretuǵın tınıshlıqqa uqsamaydı. Júreklerińiz ǵam shekpesin, qorqpańlar. ²⁸ Sizler Meniń: «Sizlerden ketemen hám jáne sizlerge qaytıp kelemen», – degenimdi esittińler. Eger sizler Meni súygenińizde: «Ákemniń janına baratırman», – degenime quwanar edińler. Sebebi Ákem Mennen ullı. ²⁹ Bular júz bergende iseniwińiz ushın, ele júz bermesten burın, sizlerge házirden ayttım. ³⁰ Sizler menen endi kóp sóylespeymen. Óytkeni bul dúnyanıń hákimi kiyatır. Onıń Meniń ústimnen hesh qanday biyligi joq. ³¹ Biraq bul dúnya Meniń Ákemdi súyetuǵınımdı hám Onıń Maǵan buyırǵanlarınıń hámmesin orınlaytuǵınımdı biliwi tiyis. Qáne turıńlar, bul jerden keteyik.

Elshiler 1:1 · Elshiler 17:11–12 · Yuxan 14 · QrqMK22