Rabbiy jaqın — April 9, 2025: Колосалықларға 3:3

³ Sebebi sizler bul dúnya ushın ólgensizler hám jańa ómirińiz Masiyx penen birge Qudayda jasırılǵan.

¹ Solay etip, Masiyx penen birge tirilgen bolsańız, onda aspandaǵı nárselerdi izleńler. Masiyx sol jerde, Qudaydıń oń jaǵında otırıptı. ² Jerdegi emes, al aspandaǵı nárselerdi oylańlar. ³ Sebebi sizler bul dúnya ushın ólgensizler hám jańa ómirińiz Masiyx penen birge Qudayda jasırılǵan. ⁴ Ómirińiz bolǵan Masiyx kelgende, sizler de Onıń menen birge saltanat penen kórinesiz. ⁵ Sonlıqtan ózlerińizdegi jerge tiyisli bolǵan jaman ádetlerdi: buzıqshılıqtı, haramılıqtı, nápsiqumarlıqtı, jaman qálewlerdi hám nápsiqawlıq bolǵan butparazlıqtı joq qılıńlar. ⁶ Bular sebepli, sózge qulaq aspaytuǵınlarǵa Qudaydıń ǵázebi keledi. ⁷ Burın sizler de usınday adamlardıń arasında jasaǵanıńızda, sonday is-háreketlerdi isledińler. ⁸ Biraq endi hámmesin: ashıw, ǵázep hám jek kóriwshilikti qoyıńlar. Awzıńızdan hesh qanday ósek hám sógis sóz shıqpasın. ⁹ Bir-birińizge ótirik sóylemeńler. Óytkeni sizler eski tábiyatıńızdı onıń jaman isleri menen taslap, ¹⁰ jańa tábiyatqa bólendińler. Bul jańa tábiyatqa iye adam Qudaydı tolıq biliw ushın, óz Jaratıwshısına uqsap baradı. ¹¹ Solay etip, jańa tábiyatqa iye adamlar arasında grek hám yahudiy, súnnetli hám súnnetsiz, varvar hám skif, qul hám azat adam bolıp bóliniw joq. Al eń áhmiyetlisi, hámme iseniwshilerde jasaytuǵın tek Masiyx ǵana bar. ¹² Qudaydıń tańlap alǵan muxaddes hám súyikli adamları sıpatında rehimlilik, jaqsılıq, kishipeyillik, múláyimlilik hám sabırlılıq penen jasańlar. ¹³ Bir-birińizge shıdamlı hám keshirimli bolıńlar. Eger kim de kim birewden ókpeli bolsa, Iyemizdiń sizlerdi keshirgeni sıyaqlı, sizler de bir-birińizdi keshirińler. ¹⁴ Bulardıń hámmesine qosımsha súyispenshilik penen jasańlar. Ol minsiz birlikke eristiredi. ¹⁵ Júreklerińizde Masiyxtıń tınıshlıǵı húkimdarlıq etsin. Sizler bir deneniń músheleri bolıp, usı tınıshlıqqa shaqırıldıńız. Jáne de, shúkirlik bildirińler. ¹⁶ Masiyxtıń sózi pútkil baylıǵı menen ishińizde jasasın. Bir-birińizge tolıq danalıq penen tálim berip, aqıl-násiyat etińler. Qudayǵa shúkirlik bildirip, Oǵan Zabur jırların, alǵıs-maqtaw qosıqların hám Muxaddes Ruwxtıń ilhamı menen jazılǵan qosıqlardı shın júrekten aytıńlar. ¹⁷ Sózińiz yamasa isińiz benen qılǵan hár bir nárseni Iyemiz Iysanıń atı ushın, Ol arqalı Ákemiz Qudayǵa shúkirlik etip isleńler. ¹⁸ Háy hayallar, kúyewlerińizge boysınıńlar. Bul Iyemizge tiyisli bolǵan hayallarǵa minásip. ¹⁹ Háy kúyewler, hayallarıńızdı súyińler. Olarǵa qopal qatnasta bolmańlar. ²⁰ Háy balalar, hámme nársede ata-anańızǵa boysınıńlar! Sebebi bul Iyemizge unaydı. ²¹ Háy ákeler, ruwxı túspewi ushın, balalarıńızdıń ashıwın keltirmeńler. ²² Háy qullar, dúnyadaǵı xojayınlarıńızǵa hámme nársede boysınıńlar. Bunı tek olarǵa jaǵınıw ushın kózabaǵa emes, al Iyemizden qorqıp, shın júrekten isleńler. 23-24 Iyemizden sıylıq retinde miyras alatuǵınıńızdı bilip, ne isleseńiz de adamlar ushın emes, al Iyemiz ushın islep atırǵanday bolıp, shın júrekten isleńler. Óytkeni sizler Iyemiz Masiyxqa xızmet etip atırsızlar. 25 Nahaq is islegen adamǵa nahaqlıǵına ılayıq qaytarıladı. Quday hesh kimdi ayırmaydı.

¹ Solay etip, Qudaydıń súyikli balaları bolǵan sizler Oǵan elikleńler! ² Masiyx bizlerdi súyip, bizler ushın Qudayǵa unaytuǵın xosh iyisli sadaqa hám qurbanlıq bolıp, Ózin Qudayǵa baǵıshladı. Sol sıyaqlı, sizler de usınday súyispenshilik penen jasańlar. ³ Hesh qanday buzıqshılıq, haramılıq hám nápsiqawlıq arańızda tilge de alınbasın. Bul muxaddeslerge minásip emes. ⁴ Arańızda uyat hám pátiwasız gápler, turpayı házil de bolmasın. Bul sizlerge minásip emes. Bunıń ornına, Qudayǵa shúkirlik bildirińler. ⁵ Mınanı anıq bilip qoyıńlar: hesh bir buzıq, haram, nápsiqaw, yaǵnıy butparaz adam Masiyxtıń hám Qudaydıń Patshalıǵın miyras etip almaydı. ⁶ Hesh kim sizlerdi ótirik sózler menen aldamasın. Joqarıda aytılǵan isler sebepli, Ózine boysınbaytuǵınlarǵa Qudaydıń ǵázebi keledi. ⁷ Sonlıqtan bundaylarǵa sherik bolmańlar. ⁸ Sizler bir waqıtları qarańǵılıq edińiz, biraq endi bolsa, Iyemiz arqalı nur boldıńlar. Sol sebepten nurǵa tiyisli adamlarǵa say jasańlar. ⁹ Óytkeni nurdaǵı ómirdiń jemisi – hár túrli jaqsılıq, haqlıq hám haqıyqatlıqtan ibarat. ¹⁰ Iyemizge neniń unaytuǵının ayırıp bilińler. ¹¹ Qarańǵılıqtaǵı ómirdiń jemissiz islerine qatnaspańlar. Kerisinshe, olardı áshkara etińler. ¹² Qarańǵılıqtaǵı adamlardıń jasırın qılǵan islerin aytıwdıń ózi qattı uyat. ¹³ Biraq, qarańǵılıqqa nur shashılsa, hámme nárse anıq kórinedi. ¹⁴ Sebebi Qudaydıń nurında kóringen hár bir adam – nur. Sol sebepten bılay delingen: «Oyan, háy uyqıda jatqan, Óliler ishinen tiril! Masiyx saǵan nur shashar». ¹⁵ Solay etip, qalay jasaw kerekligine dıqqat awdarıp, nadan adamlar sıyaqlı emes, al dana adamlar sıyaqlı jasańlar. ¹⁶ Waqıttan únemli paydalanıńlar. Óytkeni házirgi kúnler jawızlıqqa tolı. ¹⁷ Sol sebepten aqılsız bolmay, Iyemizdiń qálewiniń ne ekenin túsinińler. ¹⁸ Sharap iship, más bolmańlar, bul adamnıń buzılıwına alıp keledi. Al bunıń ornına, Muxaddes Ruwxqa tolıńlar. ¹⁹ Zabur jırlarındaǵı, alǵıs-maqtaw qosıqlarındaǵı hám ruwxıy qosıqlardaǵı sózlerdi bir-birińizge aytıp, Iyemizdi qosıq-namalar menen shın júrekten alǵıslańlar. ²⁰ Bárqulla hámme nárse ushın, Iyemiz Iysa Masiyxtıń atı menen Ákemiz Qudayǵa shúkirlik bildirińler. ²¹ Masiyxqa degen húrmetińiz sebepli, bir-birińizge boysınıńlar. ²² Háy hayallar, Iyemizge boysınatuǵınıńız sıyaqlı, kúyewlerińizge de boysınıńlar! ²³ Sebebi Masiyx iseniwshiler jámáátiniń bası bolǵanı sıyaqlı, kúyewi de hayalınıń bası. Masiyx Óz denesiniń, yaǵnıy iseniwshiler jámáátiniń Qutqarıwshısı. ²⁴ Iseniwshiler jámááti Masiyxqa boysınatuǵını sıyaqlı, hayallar da hámme iste kúyewlerine boysınsın. ²⁵ Háy kúyewler, Masiyx iseniwshiler jámáátin súyip, onıń ushın Ózin qurban etkeni sıyaqlı, sizler de hayallarıńızdı súyińler. ²⁶ Masiyx iseniwshiler jámáátin suw menen juwıp hám Qudaydıń sózi menen tazalap, onı muxaddes qılıw ushın, Ózin qurban etti. ²⁷ Bunı Ol ústinde hesh bir daq, jıyrıq yamasa buǵan uqsaǵan bir nársesi joq, muxaddes hám minsiz bolǵan saltanatlı jámáátti Ózine alıw ushın isledi. ²⁸ Sol sıyaqlı, kúyewler de hayalların óz denesin súygendey súyiwi shárt. Óz hayalın súygen ózin súygen boladı. ²⁹ Hesh kim hesh qashan óz denesin jek kórmegen. Kerisinshe, Masiyx iseniwshiler jámáátine ǵamxor bolǵanı sıyaqlı, adam óz denesin azıqlandırıp, oǵan ǵamxorlıq qıladı. ³⁰ Óytkeni bizler Masiyxtıń denesiniń múshelerimiz. ³¹ «Sonlıqtan er adam ata-anasın qaldırıp, óz hayalına qosıladı hám ekewi bir dene boladı». ³² Bul sır ullı. Men bunı Masiyxqa hám iseniwshiler jámáátine baylanıslı aytıp atırman. ³³ Solay etip, hár birińiz óz hayalın ózin súygendey súysin. Hayal da kúyewin húrmet etsin.

Kolosalılar 3:3 · Kolosalılar 3 · Efesliler 5 · QrqMK22