Iyemiz jaqın — September 10, 2026: Екинши нызам 2:7

⁷ Qudayıńız Jaratqan Iye, yaǵnıy Men sizlerdiń qol urǵan hár bir isińizdi jarılqadım. Usı ushı-qıyırı joq shólde aylanıp júrgenińizde, sizlerdi qorǵadım. Men qırıq jıl dawamında sizler menen birge boldım hám sizlerdiń hesh qanday mútájligińiz bolmadı“.

¹ Jaratqan Iyege alǵıslar ayt, háy janım! Qudayım Jaratqan Iye, Sen oǵada ullısań! Saltanat hám ullılıqqa bólengenseń, ² Shapanday etip nurǵa oranǵansań, Kóklerdi shatırday etip jayǵansań, ³ Sarayıńdı joqarıdaǵı suwlardıń ústine qurǵansań, Bultlardı Ózińe sawash arbası qılǵansań, Samal qanatlarına minip keteseń. ⁴ Samallardı Ózińe xabarshı, Ot jalınların xızmetker qılasań. ⁵ Sen jerdi tiykar ústine ornattıń, Ol máńgi-baqıy ornınan qozǵalmas. ⁶ Oǵan tuńǵıyıqtı kiyim sıyaqlı kiygizdiń, Hátteki, tawlardıń joqarısın da suw qaplaǵan. ⁷ Seniń keyislerińnen suwlar qashtı, Gúrkiregen dawısıńnan olar shegindi. ⁸ Tawlardan asıp, oypatlıqlarǵa tústi, Solar ushın Óziń belgilegen jerlerge aqtı. ⁹ Suwlar tasımasın, jer júzin jáne qaplamasın dep, Olar ushın shegara qoydıń. ¹⁰ Bulaqlardı saylarǵa qaray, Tawlar arası menen aǵızasań. ¹¹ Olar barlıq jabayı haywanlardı suwǵaradı, Qulanlardıń shólin qandıradı. ¹² Quslar suw boylarında jasaydı, Putalar arasınan olar sayraydı. ¹³ Kóktegi úyińnen tawlardı suwǵarasań, Jer júzi islerińniń miywesinen toyadı. ¹⁴ Mallardı shópler menen támiyinleyseń, Adamlar miynet penen azıǵın alsın dep, Jerge eginler ósireseń. ¹⁵ Kewillerin kóteretuǵın sharaptı, Júzlerine nur beretuǵın záytún mayın, Kúsh-quwat beretuǵın nandı Sen bereseń. ¹⁶ Jaratqan Iyeniń terekleri, Ózi tikken Lebanondaǵı kedr aǵashları suwǵa qanadı. ¹⁷ Quslar tereklerde uya quradı, Láylektiń uyası bar sárwi aǵashlarında. ¹⁸ Taw eshkileri biyik tawlarda jasaydı, Jartaslarda damanlardıń inleri bar. ¹⁹ Waqıttı belgilesin dep, aydı, Batatuǵın waqtın biletuǵın quyashtı jarattıń. ²⁰ Qarańǵılıq shóktirgenińde, tún boladı, Sonda toǵay haywanları gezip júredi. ²¹ Arıslanlar aqırıp, olja izleydi, Qudaydan azıǵın soraydı. ²² Quyash shıqqanda, olar izine qaytadı, Ózleriniń inlerine barıp jatadı. ²³ Adam óz jumıslarına shıǵadı, Keshke deyin jumısı menen bánt boladı. ²⁴ Qanshelli isler qıldıń, Jaratqan Iye! Hámmesin danalıq penen jarattıń, Jer júzi jaratqanlarıń menen tolı. ²⁵ Mine, ushı-qıyırı joq teńizler, Ishinde qaynaǵan sansız janzatlar, Úlken-kishi janıwarlar. ²⁶ Ol jerde kemeler júzedi, Ishinde oynasın dep, jarattıń Liwyatandı. ²⁷ Waqtında ırısqımızdı bersin, dep, Olardıń hámmesi Saǵan kóz tigedi. ²⁸ Írısqısın bergenińde, olar jıynap aladı, Qollarıńdı ashqanıńda, olar jep toyadı. ²⁹ Júzińdi jasırǵanıńda, olar sasqalaqlap qaladı, Janların alsań, olar ólip, topıraqqa qaytadı. ³⁰ Jan berseń, olar jaratıladı, Jańadan ómir bereseń jer júzine. ³¹ Jaratqan Iyeniń saltanatı máńgi dawam etsin! Jaratqan Iye shadlansın Óz jaratqanlarına! ³² Ol jer betine kóz taslasa, jer titireydi, Tawlarǵa qol tiygizse, tawlar túteydi. ³³ Ómirim boyı Jaratqan Iyeni jırlayman, Bar ekenmen, saz shertip, Qudayıma alǵıslar aytaman. ³⁴ Oy-pikirlerim Oǵan maqul bolsın, Jaratqan Iyede quwanaman! ³⁵ Jer júzinen gúnakarlar joq bolsın, Bunnan bılay jawızlar bolmasın! Jaratqan Iyege alǵıslar ayt, háy janım! Haliluya!

¹⁶ Elge ashlıq jiberdi, Bir tislem nanǵa zar qıldı. ¹⁷ Olardıń aldınan bir adamdı jiberdi, Awa, Yusup qul bolıp satıldı. ¹⁸ Onıń ayaqları shınjırlandı, Moynına buǵaw salındı. ¹⁹ Onıń aytqanları orınlanǵansha, Jaratqan Iyeniń sózi onı sınadı. ²⁰ Patsha adam jiberip, Yusupti bosattı, Xalıqlardıń húkimdarı onı azat qıldı. ²¹ Onı óz sarayınıń basqarıwshısı, Pútkil iyeliginiń húkimdarı etip tayınladı. ²² Qálese, xızmetkerimdi shınjırlasın, Aqsaqallarıma danalıq úyretsin, dedi. ²³ Keyin Izrail Mısırǵa keldi, Yaqıp Mısırǵa, yaǵnıy Xam úlkesine ornalastı.

Nızamnıń qaytalanıwı 2:7 · Zabur 103:1–35 · Zabur 104:16–23 · QrqMK22