Батпақ ҳәм терең суўлар

Ийса Мәсих Калвари тәрепинде гүна ушын қурбанлық болғанда, Оның азабының тереңлигин қаншелли аз түсинемиз ямаса сеземиз. Жаңа Ўәсиятта Оның хашқа шегеленген ўақтындағы азап-қайғылары ҳаққында Забур 69-баптағыдай сөзлерди таппаймыз. Биз Ески Ўәсиятқа үлкен миннетдармыз, ол Оның жанына терең батқан қайғы ҳәм азап-қайғыларға бир қанша көз жүгиртиўге имканият береди, себеби Ол тек ғана адамлардың ашшы ҳәм қатыгез қуўғын-сүргүнлерине емес, бәлким, бизлердиң гүналарымыз ушын Қудайдың тоқтамаған ҳүкимине дуўшар болған еди. Азап-қайғыларының ортасында Қудайға налып, Ол батпақтан — Ол ушын өлген бизлердиң гүналарымыздың батпағынан қутқарылыўын сорайды. Ол сондай-ақ, Өзин жек көретуғынлардан ҳәм терең суўлардан қутқарылыўын сорайды. Әлбетте, Ол Өзин қуўғын-сүргүн етип атырған душпанларының қатыгезлигин сезген, сол ўақытта Қудай Оны бизлердиң гүналарымыз ушын ҳүким етип атырған еди. Дәл Қудайдың бул ҳүкими «терең суўларды» келтирип шығарды. Биз Оның «күшли даўыс ҳәм көз жаслары менен дуўалар ҳәм жалбарыўлар еткенин» (Евр. 5:7) оқыймыз, ҳәм Ол еситилди. Оның қурбанлығы толық қабыл етилди. Қудай Оны еситти ҳәм қутқарды, Оны өлимнен тирилтип, Өзиниң оң қолына даңққа отырғызды. Бизлердиң гүналарымыздың батпағы Оған енди ҳеш қашан тийисе алмайды, себеби Ол барлық гүналарымыз ушын толық төлем етти. Оны жек көретуғынлар толық жеңилди ҳәм Оның үстинен енди ҳеш қашан ҳеш қандай күшке ийе бола алмайды. Ал сол суўлардың тереңлиги ҳаққында не айтамыз? Гәрше бир ўақытлары Ол оларға батып, Қудайдың қатты ҳүкиминиң азабын көтерген болса да, бул енди ҳеш қашан қайталанбайды. Ийса Мәсих Қудайдың әдалатлы ҳүкимин толық таўысты ҳәм мәңгиликке басқа ҳеш ким ийе бола алмайтуғын шексиз жоқары даңқ пенен сыйлықланды.