Iyemiz jaqın — May 10, 2026: Йошуа 24:14–15

¹ Eń basta Quday aspan hám jerdi jarattı. ² Jer túr-tússiz qańırap atırǵan bolıp, tuńǵıyıq ústin qarańǵılıq qaplaǵan edi. Al Qudaydıń Ruwxı bolsa, suwlardıń ústinde ushıp júr edi. ³ Sonda Quday: «Jaqtılıq bolsın!» – dep buyırdı hám jaqtılıq payda boldı. ⁴ Quday jaqtılıqtıń jaqsı ekenin kórdi hám onı qarańǵılıqtan ajırattı. ⁵ Solay etip, Quday jaqtılıqtı «kúndiz», al qarańǵılıqtı «tún» dep atadı. Kesh bolıp, tań attı. Bul birinshi kún edi. ⁶ Quday: «Suwlar ortasında bir gúmbez payda bolıp, suwlardı bir-birinen ayırıp tursın!» – dep buyırdı. ⁷ Bul bılay boldı: Quday aspan gúmbezin jaratıp, gúmbez astındaǵı suwlardı gúmbez ústindegi suwlardan ayırdı. ⁸ Quday gúmbezdi «aspan» dep atadı. Kesh bolıp, tań attı. Bul ekinshi kún edi. ⁹ Quday: «Aspan astındaǵı suwlar bir jerge toplanıp, qurǵaqlıq kórinsin!» – dep buyırdı. Solay boldı da. ¹⁰ Quday qurǵaqlıqtı «jer» dep, al toplanǵan suwlardı «teńiz» dep atadı. Quday bunıń jaqsı ekenin kórdi. ¹¹ Quday: «Jer jasıl shóplerdi, tuqım shashatuǵın ósimliklerdi hám tuqımı miywesinde bolǵan jemis aǵashların túr-túrine qaray óndirsin!» – dep buyırdı hám solay boldı da. ¹² Jer jasıl shóplerdi, túr-túrine qaray tuqım shashatuǵın ósimliklerdi hám tuqımı miywesinde bolǵan jemis aǵashların óndirdi. Quday bunıń da jaqsı ekenin kórdi. ¹³ Kesh bolıp, tań attı. Bul úshinshi kún edi. ¹⁴ Quday: «Kúndiz benen túndi bir-birinen ayırıw ushın hám máwsimlerdi, kúnlerdi, jıllardı belgilew ushın, aspan gúmbezinde jaqtırtqıshlar payda bolsın. ¹⁵ Olar aspan gúmbezinde turıp, jer júzin jaqtı qılsın!» – dep buyırdı. Solay boldı da. ¹⁶ Quday úlken eki jaqtırtqıshtı: kúndizdi basqarıw ushın úlken jaqtırtqıshtı hám túndi basqarıw ushın kishi jaqtırtqıshtı, jáne de, juldızlardı da jarattı. 17-18 Jer júzin jaqtı qılıp turıw ushın, kúndiz benen túndi basqarıw ushın hám jaqtılıqtı qarańǵılıqtan ayırıw ushın, Quday olardı aspan gúmbezine jaylastırdı. Quday bunıń da jaqsı ekenin kórdi. 19 Kesh bolıp, tań attı. Bul tórtinshi kún edi. 20 Quday: «Suwlar janlı janıwarlarǵa tolsın! Jer ústinde aspan gúmbezi boylap quslar ushsın!» – dep buyırdı. 21 Quday aybatlı teńiz janıwarların, suwlarda tolıp tasqan pútkil janıwarlardı hám hár túrli quslardı jarattı. Quday bunıń da jaqsı ekenin kórdi. 22 Quday olardı jarılqap: «Ósip-ónip, kóbeyińler, teńiz suwların toltırıńlar. Jer júzinde quslar kóbeysin!» – dedi. 23 Kesh bolıp, tań attı. Bul besinshi kún edi. 24 Quday: «Jer túrli-túrli janlı janıwarlardı: mallardı, jabayı haywanlardı hám jer bawırlawshılardı óndirsin!» – dep buyırdı. Solay boldı da. 25 Quday túrli-túrli haywanlardı, mallardı hám jer bawırlawshılardı jarattı. Quday bulardıń da jaqsı ekenin kórdi. 26 Quday: «Óz kórinisimizdey qılıp, Ózimizge uqsatıp, adamdı jaratayıq. Olar teńizdegi balıqlar, aspandaǵı quslar, mallar, jer bawırlawshılar hám jer betindegilerdiń hámmesi ústinen hákimlik etsin!» – dedi. 27 Quday adamdı Ózine uqsatıp jarattı. Olardı erkek hám hayal etip jarattı. 28 Quday olardı jarılqap: «Ósip-ónip, kóbeyińler. Jer betin toltırıp, onı iyelep alıńlar. Teńizdegi balıqlar, aspandaǵı quslar, jer betinde háreket etiwshi barlıq haywanatlar ústinen hákimlik etińler!» – dedi. 29 Quday jáne bılay dedi: «Mine, Men sizlerge jer júzindegi tuqım shashatuǵın barlıq ósimliklerdi, tuqımı miywesinde bolǵan barlıq jemis aǵashların berdim. Olar sizlerge azıq boladı. 30 Al jer betindegi jabayı haywanlarǵa, aspandaǵı quslarǵa, jer bawırlawshılarǵa, ulıwma jer betinde tirishilik etiwshi barlıq haywanatlarǵa azıq ushın kók shóplerdi berdim». Solay boldı da. 31 Quday barlıq jaratqanlarına qarap, olardıń hámmesiniń de júdá jaqsı ekenin kórdi. Kesh bolıp, tań attı. Bul altınshı kún edi.

¹ Eshua pútkil Izrail urıwların Shexemge toplap, Izraildıń aqsaqalların, tiyre basshıların, qazıların hám qadaǵalawshıların shaqırttı. Olardıń hámmesi kelip, Qudaydıń aldında turdı. ² Sonda Eshua pútkil xalıqqa bılay dedi: – Izraildıń Qudayı Jaratqan Iye bılay deydi: «Sizlerdiń ata-babalarıńız eski zamanlarda Evfrat dáryasınıń arǵı jaǵasında jasap, basqa qudaylarǵa xızmet etetuǵın edi. Olardıń biri Ibrayım menen Naxordıń ákesi Terax edi. ³ Biraq Men babańız Ibrayımdı dáryanıń arǵı jaǵınan alıp, pútkil Qanan jerleri boylap alıp júrdim. Onıń urpaqların kóbeytip, oǵan Ísaqtı berdim. ⁴ Al Ísaqqa bolsa, Yaqıp penen Esawdı berdim. Esawǵa tawlı Seir jerin múlik etip berdim. Yaqıp hám onıń ulları Mısırǵa ketti. ⁵ Keyin Men Muwsa menen Xarondı tayınlap, Mısır xalqınıń basına báleler jawdırdım hám sizlerdi Mısırdan alıp shıqtım. ⁶ Awa, Men ata-babalarıńızdı Mısırdan alıp shıqtım. Olar Qızıl teńizge jetip kelgende, mısırlılar sawash arbaları hám onıń ústindegi áskerleri menen ata-babalarıńızdıń izinen teńizge deyin quwıp bardı. ⁷ Ata-babalarıńız Jaratqan Iyege, Maǵan jalbarınıp, járdem soraǵanda, Men olar menen mısırlılar arasına qarańǵılıq túsirdim. Mısırlılardıń ústine teńiz suwların bastırıp, olardı shóktirdim. Sizler Meniń Mısırda ne islegenimdi óz kózińiz benen kórdińiz. Sizler shólde uzaq waqıt jasadıńız. ⁸ Sońınan Men sizlerdi Iordan dáryasınıń arǵı jaǵasında jasaǵan amorlardıń jerine ákeldim. Olar sizlerge qarsı urısqanda, Men olardı sizlerge táslim ettim. Sizler olardıń jerlerin iyeledińiz. Men olardı sizlerdiń aldıńızdan joq qıldım. ⁹ Moab patshası Sippor ulı Balaq Izrailǵa qarsı urısqa shıqtı hám xabar jiberip, Beor ulı Bilamdı sizlerdi náletlew ushın shaqırttı. ¹⁰ Biraq Men Bilamǵa qulaq salıwdı maqul kórmedim. Sonlıqtan ol sizlerge pátiyasın beriwge májbúr boldı. Solay etip, Men sizlerdi onıń qolınan qutqardım. ¹¹ Sońınan sizler Iordan dáryasınan ótip, Erixoǵa keldińiz. Men sizlerge qarsı urısqan erixolılardı, jáne de amor, periz, qanan, xet, girgash, xiw hám ebus xalıqların sizlerge táslim ettim. ¹² Men sizlerden aldın eshek hárre jiberip, amorlardıń eki patshasın aldıńızdan quwdım. Bul is sizlerdiń qılıshıńız yamasa oq jayıńız járdeminde islenbedi. ¹³ Solay etip, Men sizlerge ózlerińiz miynet etpegen jerdi hám ózlerińiz salmaǵan qalalardı berdim. Sizler bul jerlerde jasap, ózlerińiz otırǵızbaǵan júzim hám záytún baǵlarınıń miywelerin jep atırsızlar». ¹⁴ Eshua dawam etip bılay dedi: – Sonlıqtan Jaratqan Iyeden qorqıńlar, Oǵan shın júrekten hám sadıqlıq penen xızmet etińler. Evfrat dáryasınıń arǵı jaǵasında hám Mısırda ata-babalarıńızdıń xızmet etken qudayların taslap, Jaratqan Iyege xızmet etińler. ¹⁵ Eger Jaratqan Iyege xızmet etkińiz kelmese, onda Evfrat dáryasınıń arǵı jaǵasında ata-babalarıńızdıń xızmet etken qudaylarına yamasa ózlerińiz elinde jasap atırǵan amorlardıń qudaylarına xızmet etkińiz kele me? Búgin usını sheship alıńlar. Al men hám meniń xojalıǵım Jaratqan Iyege xızmet etemiz. ¹⁶ Xalıq juwap berip bılay dedi: – Jaratqan Iyeni taslap, basqa qudaylarǵa xızmet etiwden awlaq bolǵaymız! ¹⁷ Sebebi bizlerdi hám ata-babalarımızdı Mısır elindegi qullıqtan alıp shıqqan, kóz aldımızda ullı káramatlar islep, pútkil jolımızda hám xalıqlar arasınan ótkenimizde bizlerdi saqlaǵan Qudayımız Jaratqan Iyeniń Ózi boladı. ¹⁸ Ol bul elde jasaǵan barlıq xalıqlardı hám amorlardı aldımızdan quwıp jiberdi. Sonlıqtan bizler de Oǵan xızmet etemiz. Óytkeni Ol – bizlerdiń Qudayımız. ¹⁹ Sonda Eshua xalıqqa bılay dedi: – Biraq sizler Jaratqan Iyege xızmet ete almaysızlar. Óytkeni Ol muxaddes hám qızǵanshaq Quday. Ol sizlerdiń jınayatlarıńızǵa hám gúnalarıńızǵa sabır etpeydi. ²⁰ Eger sizler Jaratqan Iyeni taslap, jat qudaylarǵa xızmet etseńiz, Ózi burın sizlerge jaqsılıq qılǵan bolsa da, endi Ol sizlerden júz buradı hám sizlerdi bálege jolıqtırıp, joq etedi. ²¹ Xalıq Eshuaǵa: – Yaq! Bizler Jaratqan Iyege xızmet etemiz, – dep juwap berdi. ²² Sonda Eshua xalıqqa: – Jaratqan Iyege xızmet etemiz dep, tańlaǵanıńızǵa ózlerińiz gúwasızlar, – dedi. – Awa, ózlerimiz gúwamız, – dep juwap berdi xalıq. ²³ Eshua olarǵa: – Olay bolsa, endi ózlerińizdegi jat qudaylardı taslańlar. Júreklerińizdi Izraildıń Qudayı Jaratqan Iyege berińler, – dedi. ²⁴ Xalıq Eshuaǵa: – Bizler Qudayımız Jaratqan Iyege xızmet etip, Onıń sózin tıńlaymız, – dep juwap berdi. ²⁵ Eshua sol kúni Shexemde xalıq ushın bir minnetleme aldı. Olarǵa qaǵıydalar hám nızamlar berdi. ²⁶ Eshua bul sózlerdi Qudaydıń Nızam kitabına da jazıp qoydı. Keyin bir úlken tas alıp, onı sol jerge, Jaratqan Iyeniń Muxaddes mákanı janındaǵı emen aǵashınıń astına ornattı. ²⁷ Soń Eshua pútkil xalıqqa: – Minekey, bul tas bizlerge gúwa bolsın. Sebebi ol Jaratqan Iyeniń bizlerge aytqan barlıq sózlerin esitti. Qudayǵa bergen wádemizde turmasaq, bul tas bizlerge qarsı gúwa boladı, – dedi. ²⁸ Bunnan soń, Eshua xalıqtıń barlıǵın múlik etip alǵan óz jerlerine jiberdi. ²⁹ Usı waqıyalardan keyin, Jaratqan Iyeniń qulı Nun ulı Eshua bir júz on jasında qaytıs boldı. ³⁰ Onı Efrayımnıń tawlı úlkesindegi Gaash tawınıń arqa tárepine, ózine úles etip berilgen Timnat-Seraxqa jerledi. ³¹ Eshuanıń tiri waqtında hám Eshuadan keyin jasap, Jaratqan Iyeniń Izrail ushın islegen barlıq islerin bilgen aqsaqallardıń tiri waqtında Izrail xalqı Jaratqan Iyege xızmet etti. ³² Izrail xalqı Mısırdan ketip baratırıp, Yusuptiń súyegin de ózleri menen birge alıp ketken edi. Olar onı Yaqıptıń Shexemdegi atızına jerledi. Yaqıp bul atızdı Shexemniń ákesi Xamordıń ullarınan júz kesita gúmiske satıp alǵan edi. Sol jer Yusuptiń urpaqlarınıń múlki boldı. ³³ Xaronnıń ulı Elazar da qaytıs boldı. Ol Efrayımnıń tawlı úlkesine, ulı Pinexasqa berilgen Giba qalasına jerlendi.

¹⁴ Eshua dawam etip bılay dedi: – Sonlıqtan Jaratqan Iyeden qorqıńlar, Oǵan shın júrekten hám sadıqlıq penen xızmet etińler. Evfrat dáryasınıń arǵı jaǵasında hám Mısırda ata-babalarıńızdıń xızmet etken qudayların taslap, Jaratqan Iyege xızmet etińler. ¹⁵ Eger Jaratqan Iyege xızmet etkińiz kelmese, onda Evfrat dáryasınıń arǵı jaǵasında ata-babalarıńızdıń xızmet etken qudaylarına yamasa ózlerińiz elinde jasap atırǵan amorlardıń qudaylarına xızmet etkińiz kele me? Búgin usını sheship alıńlar. Al men hám meniń xojalıǵım Jaratqan Iyege xızmet etemiz.

Jaratılıs · Eshua 24 · Eshua 24:14–15 · QrqMK22