1 Muwsa menen Izraildıń aqsaqalları xalıqqa bılay dep buyırdı: «Búgin men sizlerge bergen buyrıqlarǵa ámel qılıńlar. 2 Qudayıńız Jaratqan Iye sizlerge berip atırǵan elge kiriw ushın Iordan dáryasınan kesip ótkenińizden keyin, úlken taslardı ornalastırıp, olardı háklep shıǵıńlar. 3 Ata-babalarıńızdıń Qudayı Jaratqan Iyeniń sizlerge bergen wádesi boyınsha, Ol sizlerge beretuǵın sút hám pal aǵıp turǵan jerge kirgenińizde, bul nızamdaǵı barlıq sózlerdi sol taslarǵa jazıńlar. 4 Iordan dáryasınan kesip ótkennen keyin, búgin sizlerge buyırǵanımday, taslardı Ebal tawına ornatıp, olardı háklep shıǵıńlar. 5 Ol jerde Qudayıńız Jaratqan Iyege arnap basqa taslardan bir qurbanlıq orın qurıńlar. Qurbanlıq orın soǵılatuǵın taslarǵa temir ásbap tiygizbeńler. 6 Qudayıńız Jaratqan Iyeniń sol qurbanlıq ornın jonılmaǵan taslardan qurıńlar. Qurbanlıq orınnıń ústinde Qudayıńız Jaratqan Iyege jandırılatuǵın qurbanlıqlar usınıńlar. 7 Tatıwlıq qurbanlıqların da sol jerde shalıp, jeńler hám Qudayıńız Jaratqan Iyeniń aldında shadlanıńlar. 8 Sol ornatılǵan taslarǵa nızamnıń barlıq sózlerin túsinikli etip jazıp shıǵıńlar».
9 Sonnan keyin, Muwsa menen lebiyli ruwxaniyler pútkil izraillılarǵa: «Háy, Izrail, únsizlik saqlap, qulaq salıńlar! Búgin Qudayıńız Jaratqan Iyeniń xalqı boldıńız. 10 Qudayıńız Jaratqan Iyege qulaq salıńlar, búgin men sizlerge berip atırǵan Onıń buyrıqlarına hám qaǵıydalarına ámel qılıńlar», – dedi.
11 Sol kúni Muwsa xalıqqa bılay dep buyırdı: 12 «Iordan dáryasınan ótkenińizden keyin, xalıqqa aytılatuǵın jarılqawdı tastıyıqlaw ushın, Gerizzim tawında mına urıwlar tursın: Shimon, Lebiy, Yahuda, Issaxar, Yusup hám Benyamin. 13 Al aytılatuǵın náletlerdi tastıyıqlaw ushın, mına urıwlar Ebal tawında tursın: Ruben, Gad, Asher, Zebulon, Dan hám Naftaliy. 14 Lebiyliler pútkil Izrail xalqına bálent dawıs penen bılay dep aytsın:
15 „Jaratqan Iyege jerkenishli bolǵan oyma yamasa quyma buttı ónermentke isletip, onı jasırın túrde ornatqan adam náletiy bolsın!“
Pútkil xalıq: „Awmiyin!“ – dep aytsın.
16 „Ata-anasına húrmetsizlik qılǵan náletiy bolsın!“
Pútkil xalıq: „Awmiyin!“ – dep aytsın.
17 „Óz qońsısınıń jer shegarasın jılıstırǵan adam náletiy bolsın!“
Pútkil xalıq: „Awmiyin!“ – dep aytsın.
18 „Soqır adamdı joldan adastırǵan adam náletiy bolsın!“
Pútkil xalıq: „Awmiyin!“ – dep aytsın.
19 „Kelgindi hám jetim-jesirler húkim etilgende, olardıń huqıqın ayaq astı qılǵan adam náletiy bolsın!“
Pútkil xalıq: „Awmiyin!“ – dep aytsın.
20 „Ákesin shermende qılıp, onıń hayalı menen jatqan adam náletiy bolsın!“
Pútkil xalıq: „Awmiyin!“ – dep aytsın.
21 „Qanday da bir haywan menen jınısıy qatnas islegen adam náletiy bolsın!“
Pútkil xalıq: „Awmiyin!“ – dep aytsın.
22 „Anasınan yamasa ákesinen tuwılǵan ájapası yaki qarındası menen jatqan adam náletiy bolsın!“
Pútkil xalıq: „Awmiyin!“ – dep aytsın.
23 „Qáyin enesi menen jatqan adam náletiy bolsın!“
Pútkil xalıq: „Awmiyin!“ – dep aytsın.
24 „Birewdi jasırın túrde óltirgen adam náletiy bolsın!“
Pútkil xalıq: „Awmiyin!“ – dep aytsın.
25 „Ayıpsız birewdi óltiriw ushın, para alǵan adam náletiy bolsın!“
Pútkil xalıq: „Awmiyin!“ – dep aytsın.
26 „Usı nızamǵa ámel qılmay, bulardı orınlamaǵan adam náletiy bolsın!“
Pútkil xalıq: „Awmiyin!“ – dep aytsın».
35 Solay etip, Eshua pútkil Izrail jámiyetiniń, hayallardıń, balalardıń hám xalıqtıń arasında bolǵan kelgindi adamlardıń aldında Muwsanıń buyrıqlarınan birde bir sóz qaldırmay oqıp berdi.
Nızamnıń qaytalanıwı 27 · Eshua 8:35 · QrqMK22
Қудай Исраилге Ай үстинен толық жеңис берди, бирақ бул олардың өзине исенгенлик пенен баслапқыда тек үш мың жаўынгер менен ерисиўди күткен аңсат жеңиси емес еди.
Жеңиске ерисилгеннен кейин, Ешуа ҳәм халық Мусаның Екинши Нызам 27-бапта буйырғанын иследи. Ешуа үлкен пүтин таслардан қурбанлық орын қурып, онда жаныўшы қурбанлықлар ҳәм тынышлық қурбанлықларын усынды. Тасларды сылап, ол нызамның көширмесин оларға жазды. Соңынан ол барлық Исраилди ҳәм олардың арасында жасап атырған бөгде адамларды жыйнады. Алты қабиле Герзим таўында халыққа бата бериў ушын, ҳәм басқа алты қабиле Ебал таўында қарғыс айтыў ушын турды. Мусаның оқылыўын буйырған барлық нәрсе оларға салтанатлы түрде оқылды.
Оларға баталар ҳәм қарғыслар оқылғанда олар қандай дыққат пенен тыңлаған болыўы керек! Биз буның адамлар Қудай Сөзиниң жеке баспа көширмелерине ийе болыў имканиятына ийе болмастан алдын болғанын еслеўимиз керек, компьютерлер яки басқа электрон қурылмалар ҳаққында айтпағанда да. Олар Қудай Сөзин оқылыўын еситиўге сийрек имканиятқа ийе болған. Жыйналыста кимлер бар екенине де итибар қаратың: Ешуа, барлық Исраил, ақсақаллар, баслықлар, ҳәкимлер, руўханийлер, левилер, ҳаяллар, балалар ҳәм олардың арасында жасап атырған бөгде адамлар.
Биз қандай бахытлымыз! Қудай Сөзи биз ушын аңсатлық пенен қолжетимли. Биз оны қорқынышсыз оқый аламыз. Қудайдың Сөзи қарастырылғанда, Қудайдың ҳәмме, соның ишинде балаларымыз да, бар болыўын қәлейтуғынын қайта-қайта көремиз. Барлық шаңарақларымыз солай баталансын!
