Izrail óz dushpanlarına qarsı gúresken edi. Bul urısta olarda qos basshılıq bar edi: payǵambar hám hákim Debora áskeriy háreket maqsetinde Barak atlı adam menen kúshlerin biriktirgen edi.
Quday olardı jeńiske eristirgen soń, bul ekew qosıq aytqan edi. Onda olar, basqa nárseler menen birge, Izrail qáwimleriniń hár biri urıs shaqırıǵına qalay juwap bergenin bahalaǵan edi. Mine, eki unamlı, ruwxlandırıwshı mısal:
Zebulun pútkil millettiń jaqsılıǵı ushın ózin qurban etiwge tayın edi. Bul qáwim “ómirlerin ólim dárejesine shekem qáwip astına qoyǵan edi”. Qudaydıń mápleri olar ushın sonsha qımbat edi! Adamgershilik jaǵınan aytqanda, jeńis hesh qanday kepillengen emes edi. Dushpan sanı hám úskeneleri jaǵınan pútkilley ústem edi. Bul jerde jeńiske úmit etiw – bunı tek ǵana isenim qıla alar edi.
Elshi Pawıl Rimde usıǵan uqsas qásiyetlerge iye erli-hayaldı atap ótedi. Priskilla hám Akila “meniń ómirim ushın óz moyınların qáwip astına qoyǵan edi” (Rim. 16:4). Kórinetuǵın bolǵanınday, olar belgili bir jaǵdayda onıń ómirin saqlap qalǵan hám bunıń ushın óz ómirlerin qurban etiwge tayın bolǵan edi.
Naftali qáwimi Izrailliklerdiń urısında ózlerin “urıs maydanınıń biyikliklerinde” jaylastırǵan edi. Bular urıs maydanınıń ashıq jerleri bolıp, ol jerde adam jaqsı kórinip, ańsat hújimge ushırawı múmkin edi. Biraq bul biyikliklerdi iyelep, ustap tura alǵan adam jeńiske ádewir jaqın edi. Bálkim bul hár kimniń wazıypası emes. Biraq búgingi kúnde de taslap ketilmesligi kerek bolǵan ruwxıy pozitsiyalar bar; qanday jaǵdayda da ustap turıwımız kerek bolǵan Bibliyalıq haqıyqatlar bar.
Búgin kim Qudaydıń haqıyqatı ushın, Onıń xalqınıń abadanlıǵı ushın hám Rabbı isiniń mápleri ushın ózin beriwge hám bekkem turıwǵa tayın?
