Rabbiy jaqın — December 14, 2024: Galatiyalıqlarǵa 2:20

²⁰ Men Masiyx penen birge atanaq aǵashqa shegelengenmen. Endi jasap atırǵan men emes, al mende Masiyx jasap atır. Házir denede jasap atırǵan ómirimde meni súygen hám men ushın Ózin qurban etken Qudaydıń Ulına degen isenimim menen jasap atırman.

¹ Jaratqan Iye Muwsaǵa bılay dedi: ² – Izrail xalqına bılay dep ayt: «Eger kim de kim Men buyrıqlarımda qadaǵan qılǵan bir nárseni islep, bilmey gúna qılsa, tómende kórsetilgenlerge ámel qılsın: ³ Eger bas ruwxaniy gúna islep, xalqın ayıpker qılsa, islegen gúnası ushın Jaratqan Iyege gúna qurbanlıǵı etip minsiz bir buǵa usınsın. ⁴ Ol buǵanı Ushırasıw shatırınıń aldına, Jaratqan Iyeniń aldına alıp kelsin. Sońınan qolın buǵanıń basına qoysın hám Jaratqan Iyeniń aldında onı shalsın. ⁵ Bas ruwxaniy buǵanıń qanınan biraz alıp, Ushırasıw shatırınıń ishine kirsin. ⁶ Ol barmaǵın qanǵa batırıp, qandı Jaratqan Iyeniń aldında, Eń muxaddes bólmeni bólip turǵan perdege qaray jeti ret serpsin. ⁷ Sońınan ol shatırdaǵı, Jaratqan Iyeniń aldındaǵı xosh iyisli tútetki tútetiletuǵın orınnıń shaqlarına qandı súrtsin. Buǵanıń awısqan qanın shatırdıń kirer awzınıń aldındaǵı jandırılatuǵın qurbanlıq orınnıń túbine tóksin. ⁸ Keyin gúna ushın berilgen buǵanıń pútkil mayın: isheklerin qaplaǵan sharbı mayları menen ish mayların, ⁹ eki bótekesin, olardıń mayların hám bawırınıń tómengi ushın ¹⁰ tatıwlıq qurbanlıǵı sıpatında berilgen maldıń mayın ayırǵanday, ayırıp alsın. Bas ruwxaniy olardı jandırılatuǵın qurbanlıq beriletuǵın orınnıń ústinde tútetip jandırsın. ¹¹ Al buǵanıń qalǵan bóleklerin: terisin, góshin, gellesin, tuyaqların hám ishek-qarnı menen dárisin ¹² ordanıń sırtındaǵı kúl tógiletuǵın taza jerge aparıp, olardı otınnıń ústine qoyıp, jaǵıp jibersin. ¹³ Eger pútkil Izrail jámiyeti Jaratqan Iyeniń buyrıqlarında qadaǵan etilgen nárseni islep, bilmey gúna qılsa, olar bári bir ayıplı sanaladı. ¹⁴ Islegen gúnası belgili bolǵanda, olar jámiyet atınan gúna qurbanlıǵı etip bir buǵa usınıp, onı Ushırasıw shatırınıń aldına alıp kelsin. ¹⁵ Jámiyet aqsaqalları Jaratqan Iyeniń aldında qolların buǵanıń basına qoyıp, onı Jaratqan Iyeniń aldında shalsın. ¹⁶ Bas ruwxaniy buǵanıń qanınan biraz alıp, Ushırasıw shatırınıń ishine kirsin. ¹⁷ Ruwxaniy barmaǵın qanǵa batırıp, qandı Jaratqan Iyeniń aldında, Eń muxaddes bólmeni bólip turǵan perdege qaray jeti ret serpsin. ¹⁸ Sońınan ruwxaniy qandı shatırdaǵı, Jaratqan Iyeniń aldındaǵı tútetki tútetiletuǵın orınnıń shaqlarına súrtsin. Buǵanıń awısqan qanın shatırdıń kirer awzınıń aldındaǵı jandırılatuǵın qurbanlıq orınnıń túbine tóksin. ¹⁹ Buǵanıń pútkil mayın alıp, onı qurbanlıq orınnıń ústinde tútetip jandırsın. ²⁰ Ruwxaniy óz gúnası ushın bergen buǵaǵa ne islegen bolsa, bul buǵaǵa da sonı islesin. Usılayınsha ruwxaniy jámiyetti gúnadan pákleydi hám olardıń gúnaları keshiriledi. ²¹ Aldınǵı buǵanı qalay jandırǵan bolsa, bul buǵanı da ordanıń sırtına alıp shıǵıp, jaǵıp jibersin. Bul – jámiyettiń gúnası ushın qurbanlıq boladı. ²² Eger basshılardıń biri Qudayı Jaratqan Iyeniń buyrıqlarında qadaǵan etilgen bir nárseni islep, bilmey gúna qılsa, ol ayıplı sanaladı. ²³ Islegen gúnası ózine áshkara etilgen waqıtta, ol qurbanlıqqa minsiz bir teke alıp kelsin. ²⁴ Keyin ol qolın tekeniń basına qoyıp, onı jandırılatuǵın qurbanlıqlar shalınatuǵın jerde, Jaratqan Iyeniń aldında shalsın. Bul – gúna qurbanlıǵı. ²⁵ Ruwxaniy barmaǵın gúna qurbanlıǵınıń qanına batırıp, qandı jandırılatuǵın qurbanlıq orınnıń shaqlarına súrtsin. Awısqan qandı qurbanlıq orınnıń túbine tóksin. ²⁶ Keyin tekeniń pútkil mayın tatıwlıq qurbanlıǵınıń mayı sıyaqlı, qurbanlıq orınnıń ústinde tútetip jandırsın. Usılayınsha, ruwxaniy sol kósemdi gúnasınan pákleydi hám onıń gúnası keshiriledi. ²⁷ Eger xalıq arasınan birew Jaratqan Iyeniń buyrıqlarında qadaǵan etilgen bir nárseni islep, bilmey gúna qılsa, ol ayıplı sanaladı. ²⁸ Islegen gúnası ózine áshkara bolǵanda, ol gúnası ushın qurbanlıqqa minsiz bir eshki ákelsin. ²⁹ Soń ol qolın gúna ushın berilgen qurbanlıqtıń basına qoyıp, onı jandırılatuǵın qurbanlıq shalınatuǵın jerde shalsın. ³⁰ Ruwxaniy qurbanlıqtıń qanına barmaǵın batırıp, jandırılatuǵın qurbanlıq orınnıń shaqlarına súrtsin. Awısqan qandı qurbanlıq orınnıń túbine tóksin. ³¹ Qurbanlıq bergen adam eshkiniń pútkil mayın tatıwlıq qurbanlıǵınıń mayı sıyaqlı ayırıp alsın. Ruwxaniy maydı Jaratqan Iyege xosh iyisli sıy qılıp, qurbanlıq orında tútetip jandırsın. Usılayınsha, ruwxaniy sol adamdı gúnasınan pákleydi hám onıń gúnası keshiriledi. ³² Eger birew gúna qurbanlıǵı ushın qoy bermekshi bolsa, qoy minsiz bolsın. ³³ Ol qolın qurbanlıqtıń basına qoysın hám onı jandırılatuǵın qurbanlıqlar shalınatuǵın jerde shalsın. ³⁴ Keyin ruwxaniy barmaǵın shalınǵan qoydıń qanına batırıp, jandırılatuǵın qurbanlıq orınnıń shaqlarına súrtsin. Al awısqan qandı qurbanlıq orınnıń túbine tóksin. ³⁵ Tatıwlıq qurbanlıǵı ushın berilgen qoy sıyaqlı, adam bul qurbanlıqtıń da pútkil mayın ayırıp alsın. Ruwxaniy onı qurbanlıq orında Jaratqan Iyege arnap jaǵılıp atırǵan sıylardıń ústine qoyıp, tútetip jandırıp jibersin. Usılayınsha, ruwxaniy adamdı gúnasınan pákleydi hám onıń gúnası keshiriledi». 1 «Eger kim de kim kórgen-bilgenleri haqqında gúwalıq beriwge shaqırılsa, biraq ol bunnan bas tartsa, onda ol óz ayıbınıń jazasın tartadı. 2 Kim de kim bilmey, haram sanalǵan bir nársege: jabayı ya úy haywanınıń yamasa jer bawırlawshı bir haywannıń óligine bir jerin tiygizip alsa, ol haramlanǵan bolıp, ayıplı sanaladı. 3 Birew bilmey, adamnıń denesinen shıqqan ózin haramlaytuǵın qanday da bir nársege bir jerin tiygizse, keyin ne islegenin túsingen waqıtta, ol ayıplı sanaladı. 4 Eger kim de kim qanday da bir isti isleymen dep, oylanbastan ant iship, onı orınlamay qalsa, onda ol ayıplı sanaladı. 5 Eger kim de kim usı aytılǵan islerdiń birewinde ayıplı bolsa, islegen gúnasın ashıq moyınlasın. 6 Ol gúnasınıń qunı sıpatında Jaratqan Iyege gúna qurbanlıǵın bersin. Bul qurbanlıq mayda maldan bir qoy yamasa bir eshki bolsın. Sonda ruwxaniy adamdı gúnasınan pákleydi. 7 Eger adamnıń qoy ákeliwge jaǵdayı bolmasa, onda ol gúnasınıń qunı sıpatında Jaratqan Iyege eki qumırı yamasa eki jas kepter ákelsin. Olardıń biri gúna qurbanlıǵı ushın, al ekinshisi jandırılatuǵın qurbanlıq ushın beriledi. 8 Olardı ruwxaniyge alıp kelsin. Ruwxaniy dáslep gúna qurbanlıǵın berip, qustıń moynın sındırsın, biraq onıń basın julıp taslamasın. 9 Keyin qustıń qanınıń birazın qurbanlıq orınnıń qaptalına serpip, awısqan qandı qurbanlıq orınnıń túbine tóksin. Bul – gúna qurbanlıǵı. 10 Sonnan soń, ruwxaniy ekinshi qustı jandırılatuǵın qurbanlıq etip, qaǵıyda boyınsha bersin. Usılayınsha ruwxaniy adamdı gúnasınan pákleydi hám ol keshiriledi. 11 Eger adamnıń eki qumırı yamasa eki kepter ákeliwge jaǵdayı kelmese, onda ol islegen gúnası ushın efanıń onnan bir mólsherindegi sapalı biyday unınan ákelsin. Ol unnıń ústine záytún mayın quymasın hám xosh iyisli shayır da qospasın. Sebebi bul – gúna qurbanlıǵı. 12 Adam undı ruwxaniyge alıp kelsin. Ruwxaniy tolıq sadaqanıń belgisi retinde unnan bir uwıs alıp, onı qurbanlıq orında, Jaratqan Iyege arnap jaǵılıp atırǵan sıylardıń ústine qoyıp, tútetip jandırıp jibersin. Bul – gúna qurbanlıǵı. 13 Solay etip, ruwxaniy aytıp ótilgen gúnalardıń birin islegen adamdı gúnasınan pákleydi hám onıń gúnası keshiriledi. Ǵálle sadaqası sıyaqlı, sadaqanıń jandırılmaǵan bólegi ruwxaniyge tiyisli boladı». 14 Jaratqan Iye Muwsaǵa bılay dedi: 15 – Eger kim de kim Jaratqan Iyege arnalıp, muxaddeslengen nárselerdi bılǵap, bilmey gúna islese, ol ayıp qurbanlıǵı sıpatında Jaratqan Iyege mayda maldan bir minsiz qoshqar usınsın. Qoshqardıń qunı shekel awırlıǵındaǵı gúmis penen, Muxaddes orın ólshemi menen bahalansın. 16 Adam muxaddes nársege keltirgen zıyanınıń qunın tólep, jáne sol qunnıń ústine besten birin qosıp, ruwxaniyge bersin. Ruwxaniy ayıp qurbanlıǵı ushın berilgen qoshqar menen sol adamdı gúnasınan pákleydi hám ol keshiriledi. 17 Eger kim de kim Jaratqan Iyeniń buyrıqlarında qadaǵan etilgen nárseni islep, gúna qılsa, ol bilmey islese de, óz ayıbınıń jazasın tartadı. 18 Ol ruwxaniyge ayıp qurbanlıǵı sıpatında mayda maldan bir qoshqar usınsın. Qoshqar minsiz hám qunı belgilengen bolıwı tiyis. Ruwxaniy adamdı bilmey islegen gúnasınan pákleydi hám ol keshiriledi. 19 Bul – ayıp qurbanlıǵı, óytkeni adam Jaratqan Iyege qarsı ayıp islegen edi.

²¹ Iysa oǵan súyispenshilik penen qarap: – Saǵan bir nárse jetispeydi. Barıp barlıq mal-múlkińdi satıp, aqshasın jarlılarǵa ber, sonda seniń ǵáziyneń aspanda boladı. Sońınan kelip, Meniń izime er, – dedi.

Galatiyalılar 2:20 · Lebiyliler 4–5 · Mark 10:21 · QrqMK22