Tuesday, January 20, 2026

Sóz adam bolıp aramızda jasadı. Bizler Onıń ullılıǵın, Ákeden kelgen, miyrimge hám haqıyqatqa tolı bolǵan jalǵız Uldıń ullılıǵın kórdik.

Yuxan 1:14

Qashan otırıp, qashan turatuǵınımdı bileseń, Niyetimdi uzaqtan túsinip turasań.

Zabur 138:2

«Mine, qız hámiledar bolıp Ul tuwadı. Onıń atın Immanuel dep qoyadı». Immanuel – «Quday bizler menen birge» degen mániste.

Matta 1:23

Máriyam ul tuwadı. Sen onıń atın Iysa dep qoyasań, sebebi Ol Óz xalqın gúnalarınan qutqaradı, – dedi.

Matta 1:21

Solay etip, hámme adam Ákeni húrmet etkeni sıyaqlı, Uldı da húrmet etsin. Uldı húrmet etpegen Onı jibergen Ákeni de húrmet etpegen boladı.

Yuxan 5:23

Sonlıqtan da, Quday Onı eń biyik mártebege eristirdi hám Oǵan barlıq atlardan joqarı turatuǵın attı berdi.

Filipliler 2:9

Quday Masiyxtı barlıq hákimshilik hám biylikten, pútkil qúdiret hám húkimdarlıqtan, tek usı zamanda emes, al keleshek dáwirde de atalatuǵın hámme atlardan joqarı qoydı. Hámme nárseni Oǵan boysındırıp, baǵındırdı. Onı pútkil barlıqtıń ústinen qoyıp, iseniwshiler jámáátiniń bası qıldı.

Efesliler 1:21-22

Onıń kózleri lawlap janǵan otqa uqsaǵan bolıp, al basında bolsa kóp sanlı taj bar edi. Onda Ózinen basqa hesh kim bilmeytuǵın bir at jazılǵan edi.

Ayan 19:12

Onıń kiyiminde hám sanında: «Patshalar Patshası hám húkimdarlar Húkimdarı», degen at jazılǵan edi.

Ayan 19:16

Bizler Qúdireti kúshli Qudayǵa jete almaymız, Onıń qúdireti hám ádilligi ullı, Ádalatlıǵı sheksiz, Ol hesh nahaqlıq qılmaydı.

Ayup 37:23

Kim bir ret bolsa da, kóklerge kóterilgen yamasa tómen túsken? Kim alaqanına samaldı jıynap alǵan? Kim suwdı kiyimine orap alǵan? Kim jerdiń shegin ornatqan? Onıń atı kim? Ulınıń atı kim? Bilseń, maǵan ayt!

Hikmetler 30:4