Sunday, January 18, 2026

Biraq bizler perishtelerden az waqıtqa tómenirek qoyılǵan Iysanıń ólim azabın shekkeni ushın, dańq-húrmet tajın kiygenin kórip turmız. Awa, Ol Qudaydıń miyrimi menen hámme adamlar ushın ólimdi basınan keshirgen edi.

Evreyler 2:9

Usılay islewge bizlerdi Masiyxtıń súyispenshiligi májbúr etedi. Óytkeni bir Adam, yaǵnıy Masiyx hámme ushın ólgenlikten, hámme Onıń ólimine sherik bolǵan boladı, degen juwmaqqa keldik.

2 Korinfliler 5:14

Bir adamnıń boysınbaǵanı sebepli kóp adamlar gúnakar bolıp qalǵanınday, bir adamnıń boysınǵanı sebepli kóp adamlar aqlanadı.

Rimliler 5:19

Óytkeni Muxaddes Jazıwda bılay delingen: «Birinshi adam – Adam-ata tiri jan boldı». Al sońǵı Adam – Iysa Masiyx ómir beriwshi ruwx boldı. Biraq, birinshi bolıp ruwxıy dene emes, al tábiyǵıy dene keldi. Ruwxıy dene keyninen keledi.

1 Korinfliler 15:45-46

Quday: «Óz kórinisimizdey qılıp, Ózimizge uqsatıp, adamdı jaratayıq. Olar teńizdegi balıqlar, aspandaǵı quslar, mallar, jer bawırlawshılar hám jer betindegilerdiń hámmesi ústinen hákimlik etsin!» – dedi. Quday adamdı Ózine uqsatıp jarattı. Olardı erkek hám hayal etip jarattı.

Jaratılıs 1:26-27

Quday áyyemgi zamanlarda payǵambarlar arqalı kóp mártebe hám hár túrli jollar menen ata-babalarımızǵa sóylegen edi. Al bul sońǵı waqıtlarda bolsa, Quday bizlerge Óz Ulı Iysa arqalı sóyledi. Quday Óz Ulın pútkil barlıqtıń miyrasxorı etip belgilep, Ol arqalı pútkil dúnyanı jaratqan edi. Qudaydıń Ulı – Qudaydıń saltanatınıń jarqıraǵan nurı bolıp, Ol Qudaydıń tábiyatınıń haqıyqattan qanday ekenin kórsetedi. Ul Óziniń qúdiretli sózi menen pútkil barlıqtı saqlap tur. Ol Ózin qurban etip, bizlerdi gúnalarımızdan tazalaǵannan soń, joqarıdaǵı qúdiretli Qudaydıń oń jaǵına otırdı.

Evreyler 1:1-3

Sebebi Seniń Oǵan bergen adamlarıńnıń hámmesine Ol máńgilik ómir bersin dep, Sen Oǵan pútkil adamzat ústinen biylik berdiń.

Yuxan 17:2

Birinshi adam jerden, yaǵnıy topıraqtan boldı. Ekinshi adam aspannan keldi. Topıraqtan bolǵan Adam-ata qanday bolsa, topıraqtan bolǵan adamlar da sonday boladı. Aspannan kelgen Iysa Masiyx qanday bolsa, aspanǵa tiyisli bolǵan adamlar da sonday boladı.

1 Korinfliler 15:47-48