Iyemiz jaqın — April 5, 2026: Ҳәўарийлердиң ислери 19

¹¹ Súyispenshilik hám sadıqlıq ushırasadı, Ádillik penen tınıshlıq súyisedi.

¹ Apollos Korinfte bolǵanda, Pavel tawlı úlkelerden ótip, Efeske keldi. Ol jerde ayırım shákirtler menen ushırasıp, ² olardan: – Isengen waqtıńızda Muxaddes Ruwxtı aldıńız ba? – dep soradı. – Muxaddes Ruwxtıń bar ekenin bizler hesh esitpedik te, – dep juwap berdi olar. ³ – Olay bolsa, qanday shomıldırıw menen shomıldırıldıńlar? – dep soradı Pavel. – Yaqıyanıń tálimine tiykarlanıp, suwǵa shomıldırıldıq, – dedi olar. ⁴ Pavel bılay dedi: – Yaqıya xalıqtı táwbe ettirip hám suwǵa shomıldırıp, olarǵa ózinen soń Keletuǵınǵa, yaǵnıy Iysaǵa iseniwdi aytqan edi. ⁵ Olar bunı esitkende, Iyemiz Iysanıń atı menen suwǵa shomıldırıldı. ⁶ Pavel olardıń ústilerine qolların qoyıp duwa etkende, olarǵa Muxaddes Ruwx tústi hám olar ruwxıy tillerde sóylep, payǵambarshılıq ete basladı. ⁷ Olar barlıǵı bolıp shama menen on eki adam edi. ⁸ Pavel májilisxanaǵa bardı. Ol sol jerde úsh ay dawamında Qudaydıń Patshalıǵı tuwralı tálim berdi hám olardı isendiriwge tırısıp, batıllıq penen sóyledi. ⁹ Biraq, geybirewleri qasarısıp isenbedi hám Iysanıń jolın xalıq aldında jamanlay basladı. Sonlıqtan Pavel olardı qaldırıp, shákirtlerdi ózi menen birge aldı da, hár kúni Tiranustıń mektebinde tálim beriwin dawam etti. ¹⁰ Bul awhal eki jılǵa sozıldı. Solay etip, yahudiy bolsın, grek bolsın, Aziya úlkesinde jasaǵan hár bir adam Iyemizdiń sózin esitti. ¹¹ Quday Pavel arqalı tań qalarlıq káramatlar isledi. ¹² Hátte, Paveldiń denesine tiygen bet oramallar yamasa aljapqıshlar nawqaslarǵa qoyılǵanda, olar dártlerinen azat bolıp, ishlerinen jawız ruwxlar shıǵatuǵın edi. ¹³ El aralap, jawız ruwxlardı quwıp júrgen geybir yahudiy duwaxanlar da jawız ruwx urǵan adamlarǵa Iyemiz Iysanıń atın qollana basladı. Olar: «Pavel járiyalap júrgen Iysanıń atı menen buyıramız, shıǵıp ket!» – deytuǵın edi. ¹⁴ Bas ruwxaniy Skeva atlı bir yahudiydiń jeti ulı da usılay islep júrgen edi. ¹⁵ Biraq jawız ruwx olarǵa: – Iysanı bilemen, Paveldi tanıyman, al sizler kimsiz? – dep juwap berdi de, ¹⁶ jawız ruwx urǵan adam olarǵa táp berip jıǵıp, olardan ústin shıqtı. Olar úyden jaradar hám jalańash bolıp qashıp ketti. ¹⁷ Bul xabar Efeste jasaytuǵın barlıq yahudiyler menen greklerge jetip bardı. Hámmesin qorqınısh biylep, Iyemiz Iysanıń atı úlken húrmetke eristi. ¹⁸ Isengenlerdiń kóbisi kelip, islegen jaman islerin ashıq moyınladı. ¹⁹ Sıyqırshılıq penen shuǵıllanatuǵın kóp adamlar da kitapların jıynap, hámmeniń kóz aldında jaǵıp jiberdi. Kitaplardıń bahasın esaplaǵanda, eliw mıń gúmis teńge boldı. ²⁰ Solay etip, Iyemizdiń sózi qúdiret penen jayılıp, tásiri artıp bardı. ²¹ Bul waqıyalardan soń, Pavel Makedoniya hám Axaya úlkelerinen ótip, Erusalimge barıwǵa qarar etti. «Ol jerge barǵanımnan soń, Rimdi de kóriwim kerek», – dedi ol. ²² Sonlıqtan ózi bir neshe waqıt Aziya úlkesinde qalıp, járdemshilerinen ekewin – Timofey menen Erastustı Makedoniyaǵa jiberdi. ²³ Sol waqıtları Iyemiz Iysanıń jolına qarsı kúshli kóterilis payda boldı. ²⁴ Dimitriy atlı bir zerger gúmisten Artemida ibadatxanasınıń kishkene úlgilerin soǵıp, óz ónermentshilerine kóp payda keltiretuǵın edi. ²⁵ Dimitriy óz ónermentshileri menen ózindey zergerlerdi bir jerge jıynap, olarǵa bılay dedi: – Doslar, usı kásibimiz arqalı kóp payda alatuǵınımızdı bilesizler. ²⁶ Biraq Pavel degen mına bir adamnıń qoldan soǵılǵan qudaylardıń haqıyqıy qudaylar emes ekenin aytıp, tek Efeste emes, al pútkil Aziyada kóp sanlı adamlardı úgitlep azǵırǵanın kórip hám esitip atırsızlar. ²⁷ Bul bizlerdiń ónerimizdiń qádirine qáwip tuwdırıp ǵana qoymay, al ullı hayal quday Artemidanıń ibadatxanasınıń arzımaytuǵın nársege aylanıp, pútkil Aziya úlkesi menen pútkil dúnya sıyınatuǵın hayal qudaydı ullılıǵınan ayırıw qáwpi bar. ²⁸ Olar bunı esitkende, qattı ǵázeplenip: «Efeslilerdiń Artemidası ullı!» – dep baqıra basladı. ²⁹ Pútkil qala tártipsizlikke tolıp ketti. Adamlar Paveldiń joldasları makedoniyalı Gayus penen Aristarxtı uslap alıp, tamasha maydanına qaray súyredi. ³⁰ Pavel xalıqtıń arasına barmaqshı boldı, biraq shákirtler oǵan jol qoymadı. ³¹ Paveldiń dosları bolǵan Aziya úlkesiniń ayırım basshıları da oǵan xabar jollap, tamasha maydanında kórinbewin ótindi. ³² Jıynalǵanlardıń birewi anaw, birewi mınaw dep baqırıp, jıynalıs biytártip boldı. Kóbisi ne ushın jıynalǵanın da bilmeytuǵın edi. ³³ Yahudiyler Iskender atlı bir adamdı iyterip ortaǵa shıǵarǵanlıqtan, ayırım adamlar bolǵan waqıya ushın onı ayıpker dep sheshti. Iskender qolı menen isharat etip, ózin xalıq aldında qorǵamaqshı boldı. ³⁴ Biraq xalıq onıń yahudiy ekenin bilgende, hámmesi bir awızdan shama menen eki saattay: «Efeslilerdiń Artemidası ullı!» – dep baqırıp turdı. ³⁵ Qala xatkeri xalıqtı tınıshlandırıp bılay dedi: – Efesliler! Ullı Artemidanıń aspannan túsken músininiń hám onıń ibadatxanasınıń qorǵawshısı – Efes qalası ekenin kim bilmeydi? ³⁶ Bulardı hesh kim biykarlay almaydı. Sonıń ushın tınıshlanıp, oylanıp is tutıwıńız kerek. ³⁷ Sizlerdiń bul jerge ákelgen adamlarıńız ibadatxananı da tonamaǵan, hayal qudayımızǵa da til tiygizbegen. ³⁸ Sonlıqtan Dimitriydiń hám onıń ónermentshi joldaslarınıń birewge qarsı qanday da bir shaǵımı bar bolsa, qazıxanalar ashıq, qazılar da bar. Bir-biriniń ústinen sol jerde shaǵım etsin. ³⁹ Al eger taǵı basqa másele bolsa, ol rásmiy jıynalısta sheshiliwi tiyis. ⁴⁰ Búgingi bolǵan waqıyalar sebepli ayıplanıw qáwpindemiz. Bunday topalańdı aqlay alıwǵa bizlerde sebep te joq. Ol usı sózlerdi aytıp, jıynalǵanlardı tarqatıp jiberdi.

¹⁹ Sıyqırshılıq penen shuǵıllanatuǵın kóp adamlar da kitapların jıynap, hámmeniń kóz aldında jaǵıp jiberdi. Kitaplardıń bahasın esaplaǵanda, eliw mıń gúmis teńge boldı.

Zabur 84:11 · Elshiler 19 · Elshiler 19:19 · QrqMK22