Iyemiz jaqın — February 11, 2026: Шығыў 3

¹ Muwsa qáyin atası, Midyan ruwxaniyi Itronıń qoyların baǵatuǵın edi. Bir kúni ol súriwdi shóldiń túpkirine jayıp júrip, Qudaydıń tawı Xorebke kelip qaldı. ² Sonda Jaratqan Iyeniń perishtesi oǵan sheńgel putası arasında janıp turǵan ottıń jalını ishinde kórindi. Muwsa putanıń janıp turǵanın, biraq janıp joq bolıp ketpegenin kórdi. ³ Muwsa: «Barıp, bul tań qalarlıq nárseni kóreyin. Puta nege janıp, joq bolıp ketpey tur eken?» – dep oyladı. ⁴ Jaratqan Iye Muwsanıń qaraw ushın jaqınlap kiyatırǵanın kórgende, putanıń ishinen: – Muwsa, Muwsa! – dep shaqırdı. – Lábbáy! – dep juwap berdi ol. ⁵ Quday oǵan: – Bunnan artıq jaqınlaspa. Ayaq kiyimińdi shesh, sebebi sen turǵan jer – muxaddes. ⁶ Men seniń ákeńniń Qudayıman, Ibrayımnıń Qudayı, Ísaqtıń Qudayı hám Yaqıptıń Qudayıman, – dedi. Muwsa Qudayǵa qarawǵa qorqqanlıqtan, júzin japtı. ⁷ Sonda Jaratqan Iye Muwsaǵa bılay dedi: – Men xalqımnıń Mısırda jábir shegip atırǵanın kórdim hám qul jumsawshıları sebepli dad salıp atırǵanın esittim. Men olardıń azap shegip atırǵanın da bilemen. ⁸ Sonlıqtan Men olardı mısırlılardıń qolınan qutqarıw ushın keldim. Olardı sol elden shıǵarıp, keń hám ónimdar bolǵan jerge, sút hám pal aǵıp turǵan jerge – qanan, xet, amor, periz, xiw hám ebus xalıqlarınıń ellerine aparaman. ⁹ Mine, izraillılardıń dadı Maǵan jetip keldi hám mısırlılardıń olardı qalay ezip atırǵanın Ózim de kórdim. ¹⁰ Endi Men seni xalqım bolǵan izraillılardı Mısırdan alıp shıǵıw ushın, faraonǵa jiberemen. ¹¹ Biraq Muwsa Qudayǵa: – Faraonǵa barıp, izraillılardı Mısırdan alıp shıǵatuǵınday, men kim bolıppan, – dep juwap berdi. ¹² Al Quday oǵan: – Men seniń menen birge bolaman. Seni Meniń jibergenimniń belgisi mınaw boladı: xalıqtı Mısırdan alıp shıqqanıńnan soń, usı tawda Maǵan sıyınasızlar, – dedi. ¹³ Sonda Muwsa Oǵan: – Men Izrail xalqına barıp: «Meni sizlerge ata-babalarıńızdıń Qudayı jiberdi», – desem, olar mennen: «Onıń atı kim?» – dep sorasa, men olarǵa ne deymen? – dedi. ¹⁴ Quday Muwsaǵa: – Men máńgige bar Bolıwshıman. Sen izraillılarǵa: «Meni sizlerge máńgige bar Bolıwshı jiberdi», – dep ayt, – dedi. ¹⁵ Quday Muwsaǵa jáne bılay dedi: – Sen izraillılarǵa taǵı: «Meni sizlerge ata-babalarıńızdıń Qudayı Jaratqan Iye: Ibrayımnıń Qudayı, Ísaqtıń Qudayı hám Yaqıptıń Qudayı máńgige bar Bolıwshı jiberdi», – dep ayt. Meniń atım máńgige usı boladı. Áwladtan-áwladqa Meniń atımdı usılay shaqırsın. ¹⁶ Sen bar da, Izrail aqsaqalların jıynap, olarǵa bılay de: «Ata-babalarıńız Ibrayımnıń, Ísaqtıń hám Yaqıptıń Qudayı bolǵan máńgige bar Bolıwshı maǵan kórinip, mınalardı ayttı: „Mısırda sizlerge neler islenip atırǵanın kórip, sizlerge názerimdi túsirdim. ¹⁷ Sizlerdi Mısırdaǵı eziwshilikten qutqarıp, qanan, xet, amor, periz, xiw hám ebus xalıqlarınıń jerlerine, sút hám pal aǵıp turǵan jerge aparıwdı sheshtim“». ¹⁸ Izraildıń aqsaqalları saǵan qulaq asadı. Sen olar menen birge Mısır patshasına barıp, oǵan bılay deńler: «Evreylerdiń Qudayı Jaratqan Iye bizlerge kórindi. Endi shólde úsh kúnlik jol júrip barıp, Qudayımız Jaratqan Iyege qurbanlıq beriwge ruxsat ber». ¹⁹ Biraq Men bilemen, kúshli bir qol májbúrlemegenshe, Mısır patshası ketiwińizge ruxsat bermeydi. ²⁰ Sonlıqtan Men qolımdı sozaman hám olardıń arasında káramatlar islep, Mısırdı jazalayman. Sonnan keyin, ol sizlerdi azat qıladı. ²¹ Xalıqtı mısırlılarǵa unamlı qılıp kórsetemen. Sizler ketken waqtıńızda, qurı qol ketpeysiz. ²² Hár bir hayal mısırlı qońsılarınan hám olardıń úyinde jasaytuǵın mısırlı hayaldan gúmis hám altın bezeniw buyımların, kiyim-kenshekler sorap aladı. Ul-qızlarıńızdı olar menen bezendiresizler hám sol tárizde mısırlılardı tonap ketesizler.

¹² Jaratqan Iyeniń perishtesi oǵan kórinip: – Háy, batır jigit, Jaratqan Iye seniń menen birge, – dedi.

¹³ Gideon oǵan: – O, mırzam, eger Jaratqan Iye bizler menen birge bolsa, onda bulardıń barlıǵı ne ushın basımızǵa tústi? Ata-babalarımız bizlerge: «Jaratqan Iye bizlerdi Mısırdan alıp shıqtı», – dep aytıp bergen edi. Jaratqan Iyeniń sol ájayıp isleri qayda qaldı? Jaratqan Iye bizlerdi taslap ketti hám midyanlılarǵa táslim qıldı, – dedi.

Shıǵıw 3 · Biyler 6:12 · Biyler 6:13 · QrqMK22