1 «Sol waqıtta, – deydi Jaratqan Iye, – Men Izrail tiyreleriniń hámmesiniń Qudayı bolaman, olar Meniń xalqım boladı».
2 Jaratqan Iye bılay deydi:
«Qılıshtan aman qalǵan xalıq,
Shólde miyrim tabadı.
Men Izraildı tınıshlandırıwǵa kelemen.
3 Burınıraqta Jaratqan Iye Izrailǵa kórinip, bılay degen edi:
Máńgilik súyispenshilik penen seni súyip,
Saǵan miyrim kórsetiwdi dawam ettim.
4 Seni jáne ayaqqa turǵızaman,
Sen ayaqqa turasań, pák qız Izrail!
Jáne dápler menen bezenip,
Kewil kótergenler menen ayaq oyınǵa túseseń.
5 Samariya tawlarında jáne júzimzarlar otırǵızasań,
Baǵ otırǵızǵanlar onıń miywesinen dám tatadı.
6 Sonday kúnler keledi,
Efrayım tawlı úlkesindegi gúzetshiler:
„Turıńlar, Sionǵa,
Qudayımız Jaratqan Iyeniń janına shıǵayıq“, – dep baqıradı».
7 Jaratqan Iye bılay deydi:
«Yaqıp ushın quwanısh penen qosıq aytıń,
Milletlerdiń basshısı ushın dawıslap alǵıs aytıń.
Alǵıslap bılay deńler:
„Jaratqan Iye, qutqar xalqıńdı,
Izraildan aman qalǵanların“.
8 Mine, Men olardı arqadaǵı ellerden,
Dúnyanıń tórt tárepinen jıynayman.
Olardıń arasında soqır, aqsaq,
Hámiledar hám endi bosanǵanlar da boladı.
Olar ullı jıyın bolıp bul jerge qaytadı.
9 Olar jılap-sıqlap keledi,
Alıp kiyatırǵanımda jalbarınadı.
Olardı aǵın suwlar boylap jeteleymen,
Súrnikpesin dep, tegis jollardan alıp júremen.
Men Izraildıń ákesi ekenmen,
Efrayım da Meniń tuńǵıshım.
10 Háy, milletler! Jaratqan Iyeniń sózin tıńlap,
Onı uzaqtaǵı jaǵalawlarda járiyalap bılay deńler:
„Izraildı tarqatıp jibergen, onı toplayjaq,
Shopannıń óz súriwin qorǵaǵanınday onı qorǵaydı“.
11 Sebebi Jaratqan Iye Yaqıptı azat etip,
Onı ózinen kúshli bolǵannıń qolınan qutqaradı.
12 Olar kelip, Sionnıń bálent tóbesinde,
Quwanıp, qosıq aytadı,
Jaratqan Iye bergen bereketke,
Biyday, sharap, záytún mayı,
Qoy súriwleri hám mal padaları sebepli,
Júzlerinen nur jawadı.
Olar suwǵarılǵan baǵ kibi,
Endi hasla solımaydı.
13 Sonda jas qızlar shadlanıp, ayaq oyınǵa túsedi,
Óspirim hám úlken jastaǵı erkekler birge quwanadı.
Men olardıń qayǵısın quwanıshqa aylandıraman,
Hásiretine táselle berip, quwanısh baǵıshlayman.
14 Ruwxaniylerin sıpatlı azıq penen toydıraman,
Xalqım bereketime toyadı», – deydi Jaratqan Iye.
15 Jaratqan Iye bılay deydi:
«Ramadan bir dawıs esitiledi,
Jılaǵan hám páriyad qılǵan dawıslar!
Balaların joqlap jılar Rahila,
Jubanǵısı kelmes,
Óytkeni joq endi olar».
16 Jaratqan Iye bılay deydi:
«Dad salıwdı toqtat, kóz jaslarıńdı súrt,
Shekken azabıńnıń esesi tólenedi,
– deydi Jaratqan Iye, –
Balalarıń dushpan jurtınan qaytıp keledi.
17 Seniń keleshegińnen úmit bar,
– deydi Jaratqan Iye, –
Balalarıń óz jurtına qaytıp keledi.
18 Men Efrayımnıń hásiretli dawısın esittim:
„Men qırsıq bir tana sıyaqlı edim,
Meni tárbiyaladıń, men de sabaq aldım.
Meni qayta tikle, aldıńa qaytıp barayın,
Óytkeni Qudayım Jaratqan Iye – Senseń.
19 Adasqannan keyin, ókinip táwbe qıldım,
Aqılım kirgende, sanıma urıp jıladım.
Jaslıǵımda islegen ayıp islerim sebepli,
Uyalıp, shermende boldım“.
20 Efrayım Meniń áziz ulım emes pe?
Ol Meniń súyikli balam emes pe?
Oǵan awır sóz aytqan waqtımda da,
Onı yadımnan shıǵarmay, súyispenshilik penen esleymen.
Qálbim onı kúseydi,
Oǵan sózsiz rehim etemen,
– deydi Jaratqan Iye. –
21 Óziń ushın jol belgilerin qoy,
Jol kórsetetuǵın sútinler ornat.
Júrgen jolıńa dıqqat qoy.
Pák qız Izrail, izge qayt,
Ózińniń qalalarıńa qayt.
22 Qashanǵa deyin gezip júrmekshiseń, háy biyopa qız?
Jaratqan Iye dúnyada burın bolmaǵan nárse jarattı:
Hayal erkektiń dıqqatın tartadı».
23 Álemniń Jaratqan Iyesi, Izraildıń Qudayı bılay deydi: «Men olardıń abadanshılıǵın qayta tiklegenimde, olar Yahuda jerinde hám onıń qalalarında mına sózlerdi aytadı:
„Jaratqan Iye seni jarılqasın,
Ádillik mákanı, muxaddes taw!“
24 Diyxanlar hám mal izindegi shopanlar Yahudada hám onıń qalalarında birge jasaydı. 25 Men sharshaǵanlardıń shólin qandırıp, ruwxıy túńilgenlerdi ruwxlandıraman.
26 Sonda men oyanıp ketip qarasam, ház etip uyıqlaǵan ekenmen.
27 Sonday kúnler keledi, – deydi Jaratqan Iye, – Men Izrailda hám Yahudada adamlardı hám haywanlardı kóbeytemen. 28 Burın Men olardı qadaǵalap turǵan, suwırıp taslap, wayran qılǵan, awdarıp taslap, jer menen jeksen etken, baslarına apat keltirgen bolsam, endi Men qurıw hám bekkemlew ushın olarǵa názer salaman, – deydi Jaratqan Iye. 29 – Sol kúnlerde adamlar bılay dep aytpaytuǵın boladı:
„Ákeler qıshqıl júzim jeydi,
Al balalardıń tisi qamasadı“.
30 Endi hár bir adam óz ayıbı ushın ózi óledi. Kim qıshqıl júzim jese, sonıń tisi qamasadı».
31 «Mınaday kúnler keledi, – deydi Jaratqan Iye. – Men Izrail hám Yahuda xalqı menen jańa kelisim dúzemen. 32 Bul kelisim Men olardıń ata-babalarınıń qolınan uslap, Mısır elinen alıp shıqqan waqtımda olar menen dúzgen kelisimdey bolmaydı. Men olardıń xojayını bolsam da, olar sol kelisimdi buzdı, – deydi Jaratqan Iye.
33 Biraq sol kúnlerden keyin, Izrail xalqı menen dúzetuǵın kelisimim mınaw, – deydi Jaratqan Iye, – Men Óz nızamımdı olardıń sana-sezimine ornalastırıp, júreklerine jazıp qoyaman. Men olardıń Qudayı bolaman, olar Meniń xalqım boladı. 34 Bunnan bılay hesh kim óz dostına yamasa óz tuwısqanına: „Jaratqan Iyeni tanıp bil“, – dep úyretpeytuǵın boladı. Sebebi kishkenesinen úlkenine deyin hámmesi Meni tanıytuǵın boladı, – deydi Jaratqan Iye. – Men olardıń qılmısların keshiremen, gúnaların qaytıp esime almayman».
35 Kúndiz jaqtı bolsın dep, quyashtı bergen, túnde jarıq bolsın dep, ay hám juldızlarǵa qaǵıyda bergen, tolqınlarınıń shuwıldasıwı ushın teńizdi óshegistirgen Jaratqan Iye, atı Álemniń Jaratqan Iyesi bolǵan bılay deydi:
36 «Eger bul qaǵıydalar Meniń aldımda háreketten toqtasa, – deydi Jaratqan Iye, – onda Izrail násili de millet bolıwdan máńgige ayırıladı».
37 Jaratqan Iye bılay deydi: «Joqarıdaǵı aspandı ólshewge bolmaytuǵınday, tómendegi jerdiń tiykarın tabıw múmkin bolmaytuǵınday, islegen barlıq isleri ushın, pútkil Izrail násilin Men de tárk ete almayman, – deydi Jaratqan Iye.
38 Sonday kúnler keledi, – deydi Jaratqan Iye, – Xananel minarasınan Múyesh dárwazasına shekem qala Men ushın qayta qurıladı. 39 Jerdi ólsheytuǵın jip sol jerden tuwrı Gareb tóbeshigine deyin sozılıp, Goaǵa burıladı. 40 Óli deneler hám kúller taslanǵan pútkil oypatlıq, Kidron sayına shekemgi barlıq atızlar, shıǵıstaǵı At dárwazasınıń múyeshine shekemgi jerler Jaratqan Iye ushın muxaddes boladı. Qala endi hesh qashan wayran qılınbaydı hám qulamaydı».
3 Meni shaqır, juwap beremen. Sen bilmegen ullı hám jumbaqlı sırlardı saǵan aytaman.
3 Sorasańız da almay atırsızlar. Sebebi jaman niyet penen, óz nápsińizge paydalanıw ushın sorap atırsızlar.
Eremiya 31 · Eremiya 33:3 · Yaqıp 4:3 · QrqMK22
