Қудай әдалатлы. Жақсылық та, жаманлық та Қудайдан өзлериниң әдалатлы жазасын алады. Хожаға исенген бизлер Мәсихтиң Ҳүким тахты алдында турып, Оны разы етиў ушын қылған барлық ислеримиз ушын әдалат тажына ийе болатуғын күн жақынлап атыр. Мың жылдан аслам ўақыт өткеннен кейин, барлық исеними жоқ адамлар Уллы Ақ Тахт алдында турып, гүналары ушын, әсиресе жалғыз Қутқарыўшыны бийкар еткен гүналары ушын өзлериниң жазасын алады.
Патша Ахашверош ҳәм Ҳаман Патшайым Эстер менен кешки аўқатланған еди. Патша Эстерден және бир мәрте оның өтиниши ҳәм сораўы не екенин сорады. Ол өз өмири ушын өтиниш еткен ҳәм өз халқы ушын сораған еди. Патшаның оларды жоқ етиўге ким батыллық еткени ҳаққындағы сораўына жуўап берип, ол: «Душпан ҳәм қас душпан бул жаман Ҳаман!» – деди.
Қандай үлкен шок! Патша ашшыўланып орнынан турды ҳәм баққа шықты. Қайтып киргенде, ол Ҳаманды Эстер жатқан диванға жығылып, өмири ушын жалбарып атырғанын көрди. Бул көринис патшаны және де ашшыўландырды. Оған Ҳаманның Мордехай ушын жасаған дарын ҳаққында айтылғанда, ол Ҳаманды сол дарга асыўды буйырды. Бул дереў орынланды. Солай етип, Қудайдың Сөзи алдыннан айтқанындай, әдалат орынланды.
Қудайдың Сөзи анық айтады: «Гүна қылған жан өледи» (Езек. 18:20), бирақ сондай-ақ «биз әли гүнакар болып турғанымызда, Мәсих биз ушын өлди» ҳәм «Хожаның атын шақырған ҳәр бир адам қутқарылады» (Рим. 5:8; 10:13). Кеш болмастан буны ҳәзир қылың!
