19 Muxaddes Nızamda aytılǵanlardıń hámmesi Muxaddes Nızam astında bolǵanlarǵa aytılǵanın bilemiz. Solay etip, hár bir til baylanıp, pútkil dúnya Qudaydıń aldında esap beredi.
24 Biraq, adamlar Qudaydıń miyrimi menen, Iysa Masiyxtıń qanı arqalı esheyin aqlanadı.
1 Masiyxqa tiyisli adam sıpatında haqıyqatın aytıp atırman, ótirik sóylep turǵanım joq. Muxaddes Ruwxqa boysınatuǵın hújdanım da buǵan gúwa: 2 júregimde úlken bir qayǵım hám tawısılmas bir dártim bar. 3-4 Qanımız bir bolǵan tuwısqanlarımnıń, yaǵnıy izraillılardıń qutqarılıwı ushın, men Qudaydıń ǵarǵısına ushırap, Masiyxtan alaslatılıwım kerek bolsa, qayıl bolar edim. Quday Izrail xalqın balaları qılıp asırap alǵan, olarǵa Óz ullılıǵın berip, olar menen kelisim dúzgen. Olarǵa Muxaddes Nızamın hám Qudayǵa xızmet etiw qaǵıydaların tapsırıp, wádelerin de bergen. 5 Olar ullı ata-babalarımızdıń urpaqları hám Masiyx ta adam denesinde olardıń urpaǵınan kelip shıqqan. Masiyx – hámmeniń ústinen húkimdar bolǵan, máńgi alǵıslarǵa ılayıq Qudaydıń Ózi. Awmiyin.
6 Men Qudaydıń sózi orınlanbadı, demekshi emespen. Sebebi Izraildıń urpaǵı bolǵanlardıń hámmesi de haqıyqıy izraillılar emes. 7 Jáne de, Ibrayımnıń urpaǵınan bolǵanlardıń hámmesi de Ibrayımnıń haqıyqıy balaları emes. Quday Ibrayımǵa: «Seniń urpaǵıń Ísaq arqalı dawam etedi», – degen edi. 8 Demek, Ibrayımnıń urpaǵınan bolǵanlardıń hámmesi de Qudaydıń balaları emes. Al Qudaydıń Ibrayımǵa bergen wádesi boyınsha tuwılǵanlar ǵana Ibrayımnıń haqıyqıy urpaqları bolıp esaplanadı. 9 Óytkeni Qudaydıń Ibrayımǵa bergen wádesi mınaday edi: «Kelesi jılı usınday waqıtta janıńa qaytqanımda, Sara ullı boladı».
10 Sonıń menen birge, Rebekka da babamız Ísaqtan hámiledar bolıp, egiz ul tuwdı. 11-12 Biraq, bul balalar tuwılmastan aldın hám olar ele jaqsı yamasa jaman bir nárse islemesten burın Quday Rebekkaǵa: «Úlkeni kishkenesine baǵınıshlı bolar», – degen edi. Solay etip, Quday usı eki baladan birewin tańlap alǵanda, onı islerine qarap emes, al belgilegen jobasınıń iske asıwı ushın, Óz erki menen tańlap aldı. 13 Hátte, Quday Muxaddes Jazıwda: «Yaqıptı súydim, al Esawdı jek kórdim», – degen.
14 Olay bolsa, ne deymiz? Quday ádalatsız bolǵanı ma? Hesh qashan! 15 Sebebi Quday Muwsaǵa bılay degen:
«Kimge miyrim-shápáátimdi beriwdi qálesem, soǵan miyrim-shápáátimdi beremen. Kimge rehim etiwdi qálesem, soǵan rehim etemen».
16 Solay etip, buǵan erisiw adamnıń qálewine yamasa tırısıwına emes, al Qudaydıń miyrim-shápáátine baylanıslı. 17 Óytkeni Quday Muxaddes Jazıwda faraonǵa bılay degen:
«Qúdiretimdi sen arqalı kórsetiw ushın hám atım pútkil jer júzine járiyalanıwı ushın, seni mártebeli qıldım».
18 Solay etip, Quday qálegen adamına miyrim-shápáátin beredi hám qálegen adamın tas bawır qıladı.
19 Endi sen mennen: «Eger Quday usılay islese, Ol nege adamdı ayıplaydı? Onıń erkine kim qarsı tura aladı?» – dep sorawıń múmkin. 20 Biraq, háy adam, Qudayǵa qarsılıq kórsetetuǵınday, sen kimseń? Dóretilgen nárse ózin dóretkenge: «Meni nege bunday qılıp dórettiń?» – dey me? 21 Ya bolmasa, gúlalshı bir ılaydan eki ıdıs soqqanda, birewin qımbatlı is ushın qollanılatuǵın ıdıs, al ekinshisin ápiwayı is ushın qollanılatuǵın ıdıs qılıp soǵıwǵa haqılı emes pe?
22 Quday da usılay is tutadı. Ol nabıt qılınıwǵa hám Óziniń ǵázebine ushırawǵa ılayıqlı adamlarǵa ǵázebin tógip, kúshin kórsetiwdi qálese de, olarǵa úlken sabırlılıq kórsetti. 23 Jáne de, Quday mártebege eristiriw ushın Ózi aldın ala tayarlap qoyǵan adamlarına rehim etip, Óziniń sheksiz ullılıǵın kórsetti. 24 Tek yahudiyler arasınan emes, al basqa milletler arasınan da Quday tańlaǵan usı adamlar – bizlermiz. 25 Hoshea payǵambardıń kitabında Quday bılay degen:
«Xalqım bolmaǵan xalıqtı, „xalqım“ dep,
Súymegenimdi „súyiklim“ dep atayman».
26 «„Sizler meniń xalqım emessiz“, – degen jerde,
Tiri Qudaydıń balaları dep atalasız».
27 Iyshaya payǵambar da Izrail tuwralı bálent dawıs penen bılay deydi:
«Izrail xalqınıń sanı teńiz qumınday kóp bolsa da,
Tek olardan aman qalǵanları ǵana qutqarıladı.
28 Sebebi Jaratqan Iye shıǵarǵan húkimin,
Jer júzinde tez hám tolıq ámelge asıradı».
29 Iyshaya payǵambardıń boljap aytqanınday:
«Eger Álemniń Jaratqan Iyesi,
Bizlerden násil qaldırmaǵanda,
Bizler Sodomday bolar,
Gomoraǵa megzer edik».
30 Olay bolsa, ne deymiz? Quday aldında aqlanıwǵa tırıspaǵan basqa millet adamları óz isenimi arqalı aqlandı. 31 Al Muxaddes Nızamdı orınlawı arqalı aqlanıwǵa tırısqan Izrail xalqı Muxaddes Nızamdı orınlawı arqalı aqlana almadı. 32 Ne ushın? Óytkeni olar aqlanıwǵa isenimi arqalı emes, al sawap isleri arqalı erisiwge tırıstı. Sonlıqtan olar súrniktiretuǵın tasqa súrnigip quladı. 33 Muxaddes Jazıwda:
«Minekey, Men Sionda bir tastı,
Súrniktiretuǵın tas, qulatatuǵın jartastı ornataman.
Biraq, Oǵan isengen adam hesh qashan uyatqa qalmaydı», – delingen.
1 Tuwısqanlarım! Meniń júregimdegi ármanım hám Qudaydan jalbarınatuǵın tilegim – bul xalqım bolǵan izraillılardıń qutqarılıwı. 2 Olardıń Qudayǵa intalı ekenine ózim gúwaman. Biraq, bul inta haqıyqıy túsinikke tiykarlanbaǵan. 3 Sebebi olar Qudaydıń aqlaw jolın túsinbey, aqlanıwǵa Muxaddes Nızamdı orınlaw arqalı erisiwge tırısıp, Qudaydıń aqlaw jolın qabıl etpedi.
4 Masiyx Muxaddes Nızamnıń talapların tolıq orınlaǵanlıqtan, Oǵan isengen hár bir adam Quday aldında aqlanadı.
5 Muxaddes Nızamdı orınlaw arqalı aqlanıw haqqında Muwsa mınalardı jazadı: «Muxaddes Nızamdaǵı buyrıqlardı orınlaǵan adam olar arqalı jasaydı». 6 Al isenim arqalı aqlanıw bılay deydi: «Kewlińde: „Masiyxtı jerge túsiriw ushın kim aspanǵa shıǵadı?“ 7 yamasa: „Masiyxtı ólimnen tiriltiw ushın kim tuńǵıyıqqa túsedi?“ – deme». 8 Biraq, Muxaddes Jazıw ne demekte? «Qudaydıń sózi saǵan jaqın. Ol seniń awzıńda hám júregińde». Bizler járiyalap atırǵan isenim haqqındaǵı sózler – usılar boladı. 9 Eger sen Iysanı «Iyem» dep awzıń menen ashıq tán alsań hám Qudaydıń Onı ólimnen tiriltkenine shın júrekten isenseń, qutqarılasań. 10 Óytkeni adam shın júrekten isengeni arqalı aqlanadı hám isenimi haqqında awzı menen ashıq tán alǵanı arqalı qutqarıladı. 11 Muxaddes Jazıwda aytılǵanday: «Oǵan isengen hesh bir adam uyatqa qalmaydı». 12 Sebebi yahudiy menen grektiń arasında ayırmashılıq joq. Olardıń hámmesiniń Iyesi bir. Ol Ózin shaqırǵanlardıń hámmesine saqıy. 13 Muxaddes Jazıwda aytılǵanday: «Jaratqan Iyeniń atın aytıp shaqırǵan hár bir adam qutqarıladı».
14 Biraq, Qudayǵa isenbey turıp, Onı qalay shaqırıwǵa boladı? Ol tuwralı esitpey turıp, Oǵan qalay iseniwge boladı? Quday haqqında sózdi járiyalawshı bolmasa, qalay esitiwge boladı? 15 Sózdi járiyalawǵa jiberilmese, onı qalay járiyalaydı? Muxaddes Jazıwda aytılǵanday: «Xosh Xabardı járiyalawshılardıń ayaqları qanday ájayıp!»
16 Degen menen, Xosh Xabarǵa izraillılardıń hámmesi de isene bermedi. Iyshaya payǵambardıń aytqanınday: «Iyem! Bizler aytqan xabarǵa kim isendi?» 17 Demek, isenim esitiw arqalı payda boladı, al esitiw Masiyx haqqında sózdiń járiyalanıwı arqalı boladı. 18 Biraq, meniń soraytuǵınım mınaw: izraillılar esitpedi me? Álbette, esitti.
«Xabarları hár tárepke tarqaldı,
Sózleri dúnyanıń tórt tárepine jetip bardı».
19 Men jáne bir nárseni soramaqshıman: Izrail túsinbedi me? Dáslep Muwsa arqalı Quday bılay degen edi:
«Men de xalıq bolmaǵan bir xalıq penen,
Sizlerde qızǵanısh oyataman.
Aqılsız bir xalıq penen, sizlerdiń ǵázebińizge tiyemen».
20 Sońınan Iyshaya payǵambar Qudaydıń sózlerin batırlıq penen aytıp:
«Izlemegenler Meni taptı,
Meni soramaǵanlarǵa Ózimdi ayan ettim», – degen edi.
21 Al, Izrail xalqı haqqında Quday bılay deydi:
«Sózimdi tıńlamaytuǵın qaysar bir xalıqqa,
Kúni boyı qushaǵımdı ashıp turdım».
1 Olay bolsa, men mına nárseni sorap atırman: Quday Óz xalqınan júz burdı ma? Hesh qashan! Men de Ibrayımnıń urpaǵınan, Benyamin urıwınan shıqqan izraillıman. 2 Quday Ózi burınnan tańlaǵan xalqınan júz burmadı. Muxaddes Jazıwdıń Iliyas payǵambar tuwralı jazılǵan jerinde ne aytılǵanın bilmeysizler me? Iliyas Izrail ústinen Qudayǵa shaǵım jasap bılay degen edi: 3 «Iyem! Olar Seniń payǵambarlarıńdı óltirdi, qurbanlıq orınlarıńdı buzıp tasladı. Tek jalǵız men ǵana qaldım. Olar meni de óltiriwge háreket etpekte».
4 Oǵan Quday ne dep juwap bergen edi? «Baaldıń aldında dize búkpegen jeti mıń adamdı Men Ózim ushın ajıratıp aldım». 5 Sol sıyaqlı, házirgi waqıtta da izraillılar arasında Qudaydıń miyrimi menen tańlanǵan az ǵana adamlar bar. 6 Olar sawap isleri sebepli emes, al Qudaydıń miyrimi menen tańlap alındı. Eger olar sawap isleri sebepli tańlap alınǵanda, miyrim miyrim bolmas edi. 7 Solay etip, ne júz berdi? Izrail xalqınıń kópshilik bólegi izlegen nársesin taba almadı. Tek olardıń arasınan tańlap alınǵanlar ǵana taptı. Al qalǵanlarınıń júrekleri tas etildi. 8 Muxaddes Jazıwda aytılǵanday:
«Quday olarǵa Óziniń sózin túsinbewi ushın biypárwalıq ruwxın berdi. Sonlıqtan olar usı kúnge deyin kózleri bolsa da, kórmeydi, qulaqları bolsa da, esitpeydi».
9 Dawıt bılay deydi:
«Aldındaǵı dasturxanı ózlerine qaqpan hám duzaq bolsın,
Olar qulap, jazasın alsın.
10 Kózlerin qarańǵılıq basıp, kórmey qalsın.
Belleri máńgige búgilip qalsın!»
11 Olay bolsa, men mınanı sorap atırman: izraillılar tolıq nabıt bolıw ushın súrnikti me? Hesh qashan! Biraq, izraillılardıń qulaǵanı sebepli, Quday basqa milletlerge qutqarılıw berdi hám bul arqalı olarda qızǵanısh oyattı. 12 Eger izraillılardıń gúna islep qulawı dúnyadaǵı basqa milletlerge baylıq alıp kelip, olardı bayıtsa, onda pútkil izraillılardıń qutqarılıwı dúnyadaǵı basqa milletlerge qanshelli kóp baylıq alıp keledi!
13 Basqa milletlerden bolǵan sizlerge aytıp atırman: basqa milletler ushın elshi bolıp tayınlanǵan men óz xızmetimdi mártebeli dep esaplayman. 14 Usı xızmetim arqalı milletim bir bolǵan tuwısqanlarımda qızǵanısh oyansa hám olardıń ayırımları bolsa da qutqarılsa eken. 15 Óytkeni olardıń Quday tárepinen qabıl etilmegeni dúnyadaǵı basqa milletlerdiń Quday menen jarasıwına sebepshi bolǵan bolsa, onda olardıń Quday tárepinen qabıl etiliwi dúnyadaǵı basqa milletlerdiń qutqarılıp, ólimnen ómirge ótiwine sebepshi bolmay ma? 16 Eger qamırdıń birinshi bólegi Qudayǵa baǵıshlanıp, muxaddes bolsa, onda pútkil qamır da muxaddes boladı. Eger terektiń tamırı muxaddes bolsa, onda shaqaları da muxaddes.
17 Biraq, eger záytún aǵashınıń ayırım shaqaları, yaǵnıy yahudiylerdiń ayırımları kesilip taslanıp, jabayı záytún aǵashınıń shaqası bolǵan sen, yaǵnıy basqa millet adamı olardıń ornına jalǵanıp, aǵashtıń shireli tamırınan nár alsań, 18 kesilgen shaqalar aldında maqtanıp ketpe! Eger maqtanıp ketseń, umıtpa, sen tamırǵa emes, al tamır saǵan nár berip turıptı. 19 Sen: «Meniń jalǵanıwım ushın shaqalar kesilip taslandı», – dewiń múmkin. 20 Durıs. Olar isenbegenlikten kesip taslandı. Al sen isenimiń sebepli jalǵanıp turıpsań. Sen maqtanba, al qorq! 21 Sebebi Quday tábiyǵıy shaqalardı ayamaǵan bolsa, onda seni de ayamaydı.
22 Solay etip, sen Qudaydıń miyrim-shápáátin hám qatallıǵın kórip qoy: Quday isenimnen qaytqanlarǵa qatal. Biraq sen Onıń miyrim-shápáátine sadıq qalsań, Ol da saǵan miyrim-shápáátli. Olay bolmasa, sen de kesip taslanasań! 23 Degen menen, eger yahudiyler de isenbewshilikten bas tartsa, aǵashqa jáne qayta jalǵanadı. Óytkeni Quday olardı qaytadan jalǵap qoyıwǵa qúdiretli. 24 Jabayı záytún aǵashınan kesip alınǵan shaqa bolǵan sen tábiyatqa qarsı túrde jaqsı záytún aǵashına jalǵandıń. Solay eken, tábiyǵıy shaqalardıń óz aǵashına qaytadan jalǵanıwı bunnan da ańsatıraq!
25 Tuwısqanlarım, bilgishsinip ketpewińiz ushın, sizlerdiń mına sırdan xabarsız qalıwıńızdı qálemeymen: basqa milletlerden qutqarılatuǵınlardıń sanı tolmaǵansha, Izrail xalqınıń bir bóleginiń júregi tas bolıp qala beredi. 26 Biraq aqırında pútkil Izrail qutqarıladı. Muxaddes Jazıwda bılay delingen:
«Qutqarıwshı Sionnan keledi,
Ol Yaqıptıń urpaǵı bolǵan izraillılardı qudaysızlıqtan qutqaradı.
27 Olardıń gúnaların keshirgenimde,
Meniń olar menen dúzetuǵın kelisimim usı boladı».
28 Xosh Xabardı qabıl etpegeni sebepli, yahudiyler Qudayǵa dushpan boldı. Bul sizlerdiń paydańız ushın xızmet etpekte. Degen menen, Quday olardıń ata-babaların tańlap alǵanlıqtan, olardı súyedi. 29 Sebebi Quday Óziniń sıyların qaytarıp alıp, shaqırıǵın biykarlamaydı. 30 Sizler bir waqıtları Qudayǵa boysınbaytuǵın edińler, biraq endi yahudiyler boysınbaǵanı sebepli, sizler Qudaydıń miyrim-shápáátine eristińler. 31 Sol sıyaqlı, yahudiyler házir boysınbay atırǵan bolsa da, sizlerdiń Qudaydıń miyrim-shápáátine eriskenińiz sebepli, olar da Qudaydıń miyrim-shápáátine erisedi. 32 Óytkeni Quday hámme adamlardı olardıń boysınbaytuǵın tábiyatına tutqın qılıp, olarǵa Óz miyrim-shápáátin kórsetti.
33 O, Qudaydıń baylıǵı, danalıǵı hám bilimi qanday tereń! Onıń sheshimlerine hesh kimniń aqılı jetpeydi, jolların da hesh kim izertlep shıǵa almaydı!
34 «Jaratqan Iyeniń oy-pikirlerin kim bile aladı?
Kim Oǵan másláhátshi bolǵan?»
35 «Qudaydan qaytarıp alıw ushın,
Kim Oǵan aldın ala bir nárse bergen?»
36 Sebebi Quday pútkil barlıqtı jaratqan. Hámmesi Ol arqalı hám Ol ushın bar bolǵan. Oǵan máńgige dańq bolsın! Awmiyin.
Rimliler 3:19 · Rimliler 3:24 · Rimliler 9–11 · QrqMK22
Римлилерге, яғный «күшлилер», мәсихшиликтиң тийкарында турған ҳақыйқатты береди. Бул жерде Қудай Егемен Ҳүкимдар, әдалатлылықта абсолют, барлық инсанияттың гүнасын анықлап ҳәм әшкарлап атыр. Ол ҳеш қандай сылтаўға жол қоймайды, ҳеш қандай дәрежедеги жаманлықты аямайды. Ҳәмме «Қудай алдында айыплы» (3:19) етип көрсетти. Бирақ таза әдалатлылықта Ол айыптан толық ақланыўды усынады, себеби бул «Мәсих Исадағы қутқарылыўға» (24-аят) тийкарланған, Ол Өзи гүнаның жазасын Өзин қурбан етиў арқалы көтерген уллы Орынбасар сыпатында көринеди. Оған исениўши ҳәр бир ҳақыйқый исениўши сол арқалы ҳәр бир айыплаўдан тазаланады ҳәм Қудай алдында әдалатлы етип есапланады. Айқыштың әҳмийети, сондай-ақ, ишиндеги гүнаның күшинен азат болыўға байланыслы да көринеди. Ҳақыйқат гүнакарды басында турған жеринде ушырасыў ушын усынылған, ҳәм оны жанның әмели арқалы қуллиқтан ҳәм қараңғылықтан азатлыққа ҳәм жарыққа алып барады. Аяқлар әдалатлылық жолларында беккемленеди.
9-11-баптарда Қудайдың Исраилге байланыслы кеңеслери ҳәм жоллары мәсихшиликте енди ашылған бул ҳақыйқатларға сәйкес екени көрсетти. Қудай уллы Жеңимпаз. Сонлықтан Оған исенгенлердиң ҳәммеси бахытлы болады.
12-баптан баслап, Қудайдың ақлаўшы мәрҳәметиниң беккем ҳәм мәңги тийкарына тийкарланған әмелий жүрис-турыс ҳаққында көрсетпелер берилген. Жанды беккемлеў ҳәм тынышландырыў, ҳәм ҳәр бир тақўалы пазыйлетти хошаметлеў ушын қандай уллы китап.
