«Иегованыӊ саўғасы» дегенди аӊлатқан Матфей, Жаӊа Ўасыяттың биринши китабы, еврей көзқарасынан жазылған ҳәм Ески Ўасыят пенен тамаша даўамлылықты сақлаған. Ол Ийе Ийса Масихти Исраилдиӊ көптен күтилген Мәсиҳи, олардың Патшасы сыпатында усынады. Сонлықтан Оның шежиреси Даўыт ҳәм Ибрайымға барып тақалады. Бул шежире Юсуптың шежиреси. Сонлықтан ол Масихтиӊ Даўыт тахтына болған рәсмий ҳуқықын белгилейди.
Матфей – Мухаддес Жазыўда «аспан патшалығы» деген сөз айқасын қолланған жалғыз китап. Бул бизге Муса Нызамы астында Иегова патшалығының ҳүкими еврейлерге берилген болса да, Иерусалим оның орайы болғанын көрсетеди. Бирақ Исраилдиӊ толық сәтсизлиги себепли, Қудай буны бийкар етти ҳәм Оның патшалығы енди аспанда өз орайына ийе болады. Ол бир ўақытлары жерде еврейлер арасында сөйлеген; енди Ол аспаннан сөйлеп атыр. Усы себепли Матфей көп ўақыт Қудай патшалығын «аспан патшалығы» деп атайды. Бул Инжил Қудайдың диспенсациялық жолларында еӊ таӊқаларлық ҳәм толық өзгериўди белгилейди; себеби Масих, ҳақыйқый Патша, келди ҳәм аспанға қайтты.
Буған сәйкес, биз Матфейдиӊ Ийе Ийсаныӊ суверенлик ҳүкимине толық бағыныў ҳәм бойсыныўды талап етиўин күтиўимиз керек, нызамға емес, ал нызамнан жоқары болған Биреўге. «Мениӊ бойынтырығымды өзлериӊизге алыӊ ҳәм Меннен үйрениӊ». Сонлықтан ислерге – әлбетте исеним ислерине – басым жасалады, себеби Матфейдиӊ үлкен темасы ҳүкимдарлық, Лукадағыдай мийрим емес. Егер бундай сабақлар жүреклеримизге тереӊ сиӊсе, қандай жақсы болар еди.
