Friday, December 20, 2024

Iysa olarǵa juwap berip: – Qudayǵa isenińler.

Mark 11:22

Isenim bolmasa, Qudayǵa unaw múmkin emes. Óytkeni kim de kim Qudayǵa jaqınlamaqshı bolsa, Onıń bar ekenine hám Onıń Ózin izlegenlerdi sıylıqlaytuǵınına iseniwi tiyis.

Evreyler 11:6

Al Iysa olarǵa qarap: – Bul adamlardıń qolınan kelmeydi, biraq Quday ushın múmkin emes nárse joq, – dedi.

Matta 19:26

Kelgenimde, ne ushın hesh kim joq edi? Shaqırǵanımda, ne ushın hesh kim juwap bermedi. Sizlerdi azat etiw ushın qolım sonday-aq qısqa ma edi? Yamasa sizlerdi qutqarıwǵa Mende kúsh joq pa? Bir aybat etsem, teńiz qurıydı, Dáryalardı shólge aylandıraman. Balıqlar suwsızlıqtan sasıp, shólden óledi.

Iyshaya 50:2

«Meniń pikirlerim sizlerdikinen ózgeshe, Meniń jolım sizlerdikinen basqa, – deydi Jaratqan Iye. – Aspan jerden qansha joqarı bolsa, Meniń jollarım da sizlerdikinen sonsha joqarı, Meniń oy-pikirlerim de sizlerdikinen júdá biyik.

Iyshaya 55:8-9

Úyimde azıq-awqat bolıwı ushın, barlıq onnan birlerińizdi zatlar saqlanatuǵın bólmege alıp kelińler. Meni usılayınsha sınap kórińler», – deydi Álemniń Jaratqan Iyesi. «Sonda aspan qaqpaqların ashaman, sizlerdiń ústińizge bereket jawdırıp, tolıp tastıraman.

Malaxiya 3:10

Bilip qoyıń, Jaratqan Iyeniń qolı qutqara almaytuǵınday qısqa emes, Qulaǵı da esitpeytuǵınday, awır emes.

Iyshaya 59:1

Asa óz Qudayı Jaratqan Iyege: – Jaratqan Iye! Kúshliniń aldında turǵan kúshsizge Sennen basqa hesh kim járdem bere almaydı. Qudayımız Jaratqan Iye, bizlerge járdem bere gór! Sebebi bizler Saǵan súyenemiz hám Seniń atıń menen mına sansız láshkerge qarsı shıǵıp turmız. Jaratqan Iye, Sen bizlerdiń Qudayımızsań, insan zatınıń Ózińdi jeńiwine jol qoyma! – dep jalbarındı.

2 Jılnama 14:11

Ishimizden ózimizdi ólimge húkim etilgendey sezdik. Biraq bul ózlerimizge emes, al ólilerdi tiriltetuǵın Qudayǵa súyeniwimiz ushın boldı.

2 Korinfliler 1:9