1 Bunnan soń, yahudiylerdiń bir bayramı bolıp, Iysa Erusalimge ketti. 2 Erusalimdegi Qoy dárwazası qasında evreyshe Beytzata dep atalǵan bes aywanlı bir háwiz bar edi. 3-4 Bul jerde soqır, aqsaq hám láń bolǵan júdá kóp kesel adamlar jatatuǵın edi. 5 Sol jerde otız segiz jıldan beri kesel bolǵan bir adam bar edi. 6 Iysa onıń jatırǵanın kórgende, uzaq waqıttan beri usı awhalda ekenin bilip, onnan:
– Táwir bolıwdı qáleyseń be? – dep soradı.
7 Kesel adam Oǵan:
– Mırza, suw qozǵalǵanda, meni háwizge túsiretuǵın hesh kimim joq. Men baraman degenshe, basqa adam mennen burın túsip aladı, – dedi.
8 Iysa oǵan:
– Ornıńnan tur, tósegińdi al da, júr, – dedi.
9 Ol adam sol waqıtta-aq shıpa taptı hám tósegin alıp júrip ketti. Bul Shabbat kúni edi. 10 Sonlıqtan yahudiy basshıları shıpa tapqan adamǵa:
– Búgin Shabbat kúni-ǵo, tósegińdi alıp júriwge bolmaydı, – dedi.
11 Biraq, sol adam olarǵa bılay dep juwap berdi:
– Maǵan shıpa bergen Adam: «Tósegińdi al da, júr», – dedi.
12 – Saǵan: «Tósegińdi al da, júr», – degen Adam kim? – dep soradı olar.
13 Al shıpa tapqan adam Onıń kim ekenin bilmeytuǵın edi. Sebebi Iysa sol jerdegi xalıqtıń arasında kórinbey qalǵan edi.
14 Sońınan Iysa sol adamdı Ibadatxanada ushıratıp qaldı hám oǵan:
– Mine, sen shıpa taptıń. Saǵan ele de jamanıraq nárse bolmawı ushın, bunnan bılay gúna isleme, – dedi.
15 Sol adam barıp, ózine shıpa bergen Adamnıń Iysa ekenin yahudiy basshılarına aytıp berdi.
16 Bunday islerdi Shabbat kúni islegeni ushın, yahudiy basshıları Iysanı quwdalay basladı. 17 Biraq Iysa olarǵa bılay dep juwap berdi:
– Ákem usı kúnge deyin miynet etip kiyatır, Men de miynet etip atırman.
18 Sol sebepli yahudiy basshıları Onı óltiriw ushın jáne de kóbirek háreket etti. Óytkeni Ol tek Shabbat kúnin buzıp ǵana qoymay, Qudaydı Ákem dep, Ózin Qudayǵa teńlestirgen edi.
19 Iysa yahudiylerge bılay dedi:
– Sizlerge shının, haqıyqatın aytaman: Ul Ákeniń qılǵan islerin kórmegenshe, Ózliginen hesh nárse isley almaydı. Áke neni islese, Ulı da sonı isleydi. 20 Sebebi Áke Ulın súyedi hám islegenleriniń hámmesin Oǵan kórsetedi. Sizlerdi hayran qaldıratuǵın bulardan da ullıraq islerdi Oǵan kórsetedi. 21 Ákeniń ólilerdi tiriltip, olarǵa ómir bergeni sıyaqlı, Ulı da qálegen adamına ómir beredi. 22 Áke hesh kimdi húkim qılmaydı, Ol pútkil húkimdi Ulına tapsırǵan. 23 Solay etip, hámme adam Ákeni húrmet etkeni sıyaqlı, Uldı da húrmet etsin. Uldı húrmet etpegen Onı jibergen Ákeni de húrmet etpegen boladı.
24 Sizlerge shının, haqıyqatın aytaman: Meniń sózlerimdi tıńlap, Meni Jibergenge isengen adamda máńgilik ómir bar. Ol húkim etilmey, ólimnen ómirge ótti. 25 Sizlerge shının, haqıyqatın aytaman: ólilerdiń Qudaydıń Ulınıń dawısın esitetuǵın waqtı keledi hám ol házir keldi de. Onıń dawısın esitkenler tiriledi. 26 Óytkeni Ákeniń Ózi ómirdiń tiykarı bolǵanı sıyaqlı, Uldıń Ózine de ómirdiń tiykarı bolıwdı inam etti. 27 Oǵan húkim etiw biyligin de berdi. Sebebi Ol – Adam Ulı.
28 Buǵan hayran qalmańlar. Qábirdegilerdiń hámmesiniń Onıń dawısın esitetuǵın waqtı kiyatır. 29 Olar qábirlerden shıǵadı. Jaqsılıq qılǵanlar jasaw ushın, jamanlıq qılǵanlar húkim etiliw ushın qayta tiriledi. 30 Men Ózligimnen hesh nárse isley almayman. Qalay esitsem, solay húkim qılaman hám Meniń húkimim ádil. Óytkeni Men Óz erkimdi emes, al Meni jibergen Ákemniń erkin orınlayman.
31 Eger Men Ózim tuwralı Ózim gúwalıq bersem, gúwalıǵım haqıyqıy bolmaydı. 32 Biraq Men tuwralı gúwalıq beriwshi basqa Birew bar, Onıń Men tuwralı berip atırǵan gúwalıǵınıń haqıyqat ekenin bilemen.
33 Sizler Yaqıyaǵa adamlardı jiberdińler, ol haqıyqat haqqında gúwalıq berdi. 34 Men adamnıń gúwalıǵına mútáj bolmasam da, bulardı sizlerdiń qutqarılıwıńız ushın aytıp atırman. 35 Yaqıya – janıp, nur shashıp turǵan shıra edi. Sizler onıń nurında az waqıt quwanıwdı qáledińler.
36 Biraq Mende Yaqıyanikinen ullıraq gúwalıq bar. Sebebi Ákemniń Maǵan orınlawım ushın tapsırǵan isleri, usı islep atırǵan islerimniń ózi Meni Ákemniń jibergeni haqqında gúwalıq berip atır. 37 Meni jibergen Ákemniń Ózi Men tuwralı gúwalıq berip tur. Sizler hesh qashan Onıń dawısın da esitpegensizler, júzin de kórmegensizler. 38 Onıń sózleri de sizlerde jaylaspaydı, óytkeni sizler Onıń Jibergenine isenbey atırsızlar. 39 Sizler Muxaddes Jazıwlardı izertleysizler, sebebi olar arqalı máńgilik ómirge iye bolamız, dep oylaysızlar. Al olar Men tuwralı gúwalıq beredi. 40 Biraq sizler máńgilik ómirge iye bolıw ushın, Maǵan keliwdi qálemeysizler.
41 Men adamlardan maqtaw qabıl qılmayman. 42 Biraq sizlerdi bilemen, júregińizde Qudayǵa degen súyispenshilik joq. 43 Men Ákemniń atınan kelsem de, Meni qabıl etpey atırsızlar. Eger basqa birew óz atı menen kelse, onı qabıl etesizler. 44 Sizler bir-birińizden maqtaw esitiwdi jaqsı kóresizler, biraq jalǵız Qudaydıń maqtawına erisiwge umtılmaysızlar. Olay bolsa, Maǵan qalay isene alasızlar?
45 Meni Ákemniń aldında sizlerdi ayıplaydı, dep oylamańlar. Sizlerdi ayıplawshı ózlerińiz úmit etetuǵın Muwsa boladı. 46 Muwsaǵa isengenińizde, Maǵan da isener edińler. Óytkeni ol Men tuwralı jazǵan edi. 47 Biraq Muwsanıń Jazıwlarına isenbeseńler, Meniń sózlerime qalay isenesizler?
22 Áke hesh kimdi húkim qılmaydı, Ol pútkil húkimdi Ulına tapsırǵan. 23 Solay etip, hámme adam Ákeni húrmet etkeni sıyaqlı, Uldı da húrmet etsin. Uldı húrmet etpegen Onı jibergen Ákeni de húrmet etpegen boladı.
25 Sizlerge shının, haqıyqatın aytaman: ólilerdiń Qudaydıń Ulınıń dawısın esitetuǵın waqtı keledi hám ol házir keldi de. Onıń dawısın esitkenler tiriledi.
Yuxan 5 · Yuxan 5:22–23 · Yuxan 5:25 · QrqMK22
Юхан 5 адамзаттың толық әззи жағдайының суўретин бериўден басланады. Бир наўқас адам Бетхесда ҳәўизиниң жанында көп санлы наўқас, соқыр, ақсақ ҳәм қуўраған адамлар менен жатқан еди. Ийса одан жазылғысы келе ме деп сорағанда, ол: «Мырза, мениң ҳеш кимим жоқ», – деп жуўап берди. Ол өзине жәрдем бере алмады, ҳәм оған жәрдем беретуғын басқа ҳеш ким де жоқ еди. Бирақ, Улдың Өзин қутқара алмайтуғын әззилерди қутқарыў ушын Адам болып келгени қандай таңқаларлық!
Оны бийкар еткенлер ҳаққында не айтыўға болады? Көбинесе айтылғандай, егер мәрҳамат бийкар етилсе, тек ғана ҳүким қалады. Салмақлы ой!
5-бапта еки мәрте ҳүким ҳаққында айтылған. Бириншиден, 22 ҳәм 23-аятларда, барлық ҳүким Улға берилген, сонда ҳәмме Оны ҳүрметлеўи ушын. Ул Адам болғанда, Ол адамлар Оны қорлайтуғын ҳәм ҳәтте Оған түкиретуғын жерге келди! Әке ҳәммениң Өзиниң Улын ҳүрметлеўин тәмийинлейди, я қутқарылыўда Ол тәрепинен берекетленген сыпатында, яки Оны бийкар еткен сыпатында Ол тәрепинен ҳүким етилген сыпатында.
27-аятта, бизге барлық ҳүкимди әмелге асырыўға ҳүким Улға берилген, себеби Ол Адам Улы. Адам Улы сыпатында, Ол келешек күнде бул жерде ҳүкимди әмелге асырады, сол күнде Ол барлық нәрсени Өзине бағындырады. Соңынан, ақыр аяғында, барлық исенимсизлер уллы ақ тахт алдында турғанда, оларды мәңгилик жоғалғанлыққа қуўып жиберетуғын МәсихАдам Улы болады. Сол жерде ҳәр бир аўыз жабылады, себеби олар ҳәрдайым Әкесине унамлы болған ислерди ислеген Адам тәрепинен ҳүким етиледи.
