1 Jaratqan Iyege alǵıslar ayt, háy janım!
Qudayım Jaratqan Iye, Sen oǵada ullısań!
Saltanat hám ullılıqqa bólengenseń,
2 Shapanday etip nurǵa oranǵansań,
Kóklerdi shatırday etip jayǵansań,
3 Sarayıńdı joqarıdaǵı suwlardıń ústine qurǵansań,
Bultlardı Ózińe sawash arbası qılǵansań,
Samal qanatlarına minip keteseń.
4 Samallardı Ózińe xabarshı,
Ot jalınların xızmetker qılasań.
5 Sen jerdi tiykar ústine ornattıń,
Ol máńgi-baqıy ornınan qozǵalmas.
6 Oǵan tuńǵıyıqtı kiyim sıyaqlı kiygizdiń,
Hátteki, tawlardıń joqarısın da suw qaplaǵan.
7 Seniń keyislerińnen suwlar qashtı,
Gúrkiregen dawısıńnan olar shegindi.
8 Tawlardan asıp, oypatlıqlarǵa tústi,
Solar ushın Óziń belgilegen jerlerge aqtı.
9 Suwlar tasımasın, jer júzin jáne qaplamasın dep,
Olar ushın shegara qoydıń.
10 Bulaqlardı saylarǵa qaray,
Tawlar arası menen aǵızasań.
11 Olar barlıq jabayı haywanlardı suwǵaradı,
Qulanlardıń shólin qandıradı.
12 Quslar suw boylarında jasaydı,
Putalar arasınan olar sayraydı.
13 Kóktegi úyińnen tawlardı suwǵarasań,
Jer júzi islerińniń miywesinen toyadı.
14 Mallardı shópler menen támiyinleyseń,
Adamlar miynet penen azıǵın alsın dep,
Jerge eginler ósireseń.
15 Kewillerin kóteretuǵın sharaptı,
Júzlerine nur beretuǵın záytún mayın,
Kúsh-quwat beretuǵın nandı Sen bereseń.
16 Jaratqan Iyeniń terekleri,
Ózi tikken Lebanondaǵı kedr aǵashları suwǵa qanadı.
17 Quslar tereklerde uya quradı,
Láylektiń uyası bar sárwi aǵashlarında.
18 Taw eshkileri biyik tawlarda jasaydı,
Jartaslarda damanlardıń inleri bar.
19 Waqıttı belgilesin dep, aydı,
Batatuǵın waqtın biletuǵın quyashtı jarattıń.
20 Qarańǵılıq shóktirgenińde, tún boladı,
Sonda toǵay haywanları gezip júredi.
21 Arıslanlar aqırıp, olja izleydi,
Qudaydan azıǵın soraydı.
22 Quyash shıqqanda, olar izine qaytadı,
Ózleriniń inlerine barıp jatadı.
23 Adam óz jumıslarına shıǵadı,
Keshke deyin jumısı menen bánt boladı.
24 Qanshelli isler qıldıń, Jaratqan Iye!
Hámmesin danalıq penen jarattıń,
Jer júzi jaratqanlarıń menen tolı.
25 Mine, ushı-qıyırı joq teńizler,
Ishinde qaynaǵan sansız janzatlar,
Úlken-kishi janıwarlar.
26 Ol jerde kemeler júzedi,
Ishinde oynasın dep, jarattıń Liwyatandı.
27 Waqtında ırısqımızdı bersin, dep,
Olardıń hámmesi Saǵan kóz tigedi.
28 Írısqısın bergenińde, olar jıynap aladı,
Qollarıńdı ashqanıńda, olar jep toyadı.
29 Júzińdi jasırǵanıńda, olar sasqalaqlap qaladı,
Janların alsań, olar ólip, topıraqqa qaytadı.
30 Jan berseń, olar jaratıladı,
Jańadan ómir bereseń jer júzine.
31 Jaratqan Iyeniń saltanatı máńgi dawam etsin!
Jaratqan Iye shadlansın Óz jaratqanlarına!
32 Ol jer betine kóz taslasa, jer titireydi,
Tawlarǵa qol tiygizse, tawlar túteydi.
33 Ómirim boyı Jaratqan Iyeni jırlayman,
Bar ekenmen, saz shertip, Qudayıma alǵıslar aytaman.
34 Oy-pikirlerim Oǵan maqul bolsın,
Jaratqan Iyede quwanaman!
35 Jer júzinen gúnakarlar joq bolsın,
Bunnan bılay jawızlar bolmasın!
Jaratqan Iyege alǵıslar ayt, háy janım!
Haliluya!
1 Jaratqan Iyeni alǵıslap, atın aytıp shaqırıń,
Onıń islerin xalıqlarǵa bildiriń!
2 Onı jırlap, saz shertip alǵıs aytıń,
Barlıq ájayıp islerin bayan etiń!
3 Onıń muxaddes atı menen maqtanıń,
Jaratqan Iyeni izleytuǵınlardıń júrekleri shadlıqqa tolsın!
4 Jaratqan Iyeni hám Onıń qúdiretin izleń,
Bárqulla Onıń dárgayında bolıwǵa umtılıń!
5 Este saqlań Onıń islegen ájayıp islerin,
Káramatların hám awzınan shıqqan húkimlerin,
6 Háy, Onıń qulı Ibrayımnıń urpaqları,
Ol tańlap alǵan Yaqıptıń balaları!
7 Ol – Jaratqan Iye, bizlerdiń Qudayımız!
Húkimleri pútkil jer júzin qaplaǵan.
8 Máńgi este saqlaydı Óz kelisimin,
Mıń-mıńlaǵan áwladlarǵa bergen sózin,
9 Ibrayım menen dúzgen kelisimin,
Ísaqqa bergen antın.
10 Bunı Yaqıp ushın bir qaǵıyda etip tastıyıqladı,
Izrail ushın máńgilik kelisim qılıp:
11 «Áwladlarıńnıń payına tiygen múlik etip,
Qanan jerin saǵan beremen», – dedi.
12 Sol waqıtta olar sanı jaǵınan az edi,
Sol jerde az sanlı hám kelgindi edi.
13 Olar bir xalıqtan ekinshisine,
Bir patshalıqtan ekinshisine gezip júrgen edi.
14 Jaratqan Iye hesh kimniń olardı eziwine jol qoymadı,
Olar ushın patshalarǵa eskertiw berip:
15 «Meniń maylaǵanlarıma tiymeń,
Payǵambarlarıma jamanlıq qılmań!» – dedi.
16 Elge ashlıq jiberdi,
Bir tislem nanǵa zar qıldı.
17 Olardıń aldınan bir adamdı jiberdi,
Awa, Yusup qul bolıp satıldı.
18 Onıń ayaqları shınjırlandı,
Moynına buǵaw salındı.
19 Onıń aytqanları orınlanǵansha,
Jaratqan Iyeniń sózi onı sınadı.
20 Patsha adam jiberip, Yusupti bosattı,
Xalıqlardıń húkimdarı onı azat qıldı.
21 Onı óz sarayınıń basqarıwshısı,
Pútkil iyeliginiń húkimdarı etip tayınladı.
22 Qálese, xızmetkerimdi shınjırlasın,
Aqsaqallarıma danalıq úyretsin, dedi.
23 Keyin Izrail Mısırǵa keldi,
Yaqıp Mısırǵa, yaǵnıy Xam úlkesine ornalastı.
24 Jaratqan Iye onıń xalqın bereketledi,
Dushpanlarına qaraǵanda, olardıń sanın kóbeytti.
25 Keyin Iyemiz Mısır xalqınıń júreginde,
Óz xalqına degen jek kóriwshilik oyattı.
Mısır xalqı Onıń qullarına qarsı,
Hiylekerlik qıla basladı.
26 Ol Óz qulı Muwsanı,
Ózi tańlap alǵan Xarondı jiberdi.
27 Olar kórsetti Jaratqan Iyeniń káramatlı belgilerin,
Xam úlkesinde ájayıp islerin.
28 Jaratqan Iye qarańǵılıq jiberip, eldi tas túnek qıldı,
Muwsa menen Xaron Onıń sózlerine qarsı shıqpadı.
29 Olardıń suwların qanǵa aylandırdı,
Ondaǵı balıqlardı nabıt qıldı.
30 Mısır jeri qurbaqalarǵa tolıp ketti,
Hátteki, patshasınıń bólmesine kirdi.
31 Jaratqan Iye buyırǵanda, iytshıbınlar ushıp keldi,
Shirkeyler pútkil eldi qapladı.
32 Jawınnıń ornına burshaq jawdırdı,
Shaqmaq shaqtırdı olardıń elinde.
33 Júzimzarların hám ánjir aǵashların qurttı,
Eldegi barlıq tereklerdi sındırdı.
34 Ol buyırǵanda, shegirtkeler keldi,
Sansız shekshekler payda boldı.
35 Olar eldegi barlıq ósimliklerdi,
Atızlardaǵı eginlerdi jep tawıstı.
36 Jaratqan Iye eldegi tuńǵıshlardıń hámmesin,
Hár biriniń belindegi kúshiniń birinshi jemisi bolǵan balaların óltirdi.
37 Izraillılardı elden gúmis hám altın menen shıǵardı,
Urıwlarınıń ishinde súrnikkeni bolmadı.
38 Olar shıǵıp ketkende, Mısır quwandı,
Mısır xalqı Izraildan qorqıp qalǵan edi.
39 Jaratqan Iye Izraildı bult penen jawdı,
Túnde jaqtı bolsın, dep ot berdi.
40 Xalıq soraǵanda, olarǵa bódeneler jiberdi,
Aspannan nan jawdırıp, olardı toydırdı.
41 Tastı jardı, suw atlıǵıp shıqtı,
Quwraǵan jerlerden dárya bolıp aqtı.
42 Ol Óz muxaddes wádesin,
Qulı Ibrayımǵa bergen sózin yadına aldı.
43 Xalqın quwanısh ishinde,
Tańlaǵanların shadlıq penen elden alıp shıqtı.
44 Basqa milletlerdiń jerlerin olarǵa berdi,
Sol xalıqlardıń miynetin múlik qılıp aldı.
45 Solay etip, Onıń qaǵıydaların orınlap,
Nızamlarına boysınıwı ushın isledi.
Haliluya!
1 Haliluya!
Jaratqan Iyeni táriyipleń, Ol iygilikli,
Sadıqlıǵı máńgi dawam etedi.
2 Jaratqan Iyeniń ullı islerin kim aytıp bere aladı?
Kim Oǵan ılayıqlı túrde alǵıs ayta aladı?
3 Qanday baxıtlı ádalatlıq penen is tutqanlar,
Hámme waqıtta tuwrı islerdi qılǵanlar!
4 Jaratqan Iye, xalqıńa rehim etkenińde, esle meni,
Qutqarǵanıńda, meni de itibarǵa al.
5 Tańlaǵanlarıńnıń baxıtın kóreyin,
Xalqıńnıń quwanıshın kórip, quwanayın,
Xalqıńnıń maqtanıshın birge bóliseyin.
6 Ata-babalarımız sıyaqlı, bizler de gúna isledik,
Ayıp isler hám jawızlıq qıldıq.
7 Ata-babalarımız Mısırda bolǵan waqıtta,
Islegen ájayıp islerińe itibar bermedi,
Seniń mol súyispenshiligińdi eslemedi,
Teńiz boyında, Qızıl teńizde qozǵalań kóterdi.
8 Biraq Jaratqan Iye qúdiretin kórsetiw ushın,
Óz atı ushın olardı qutqardı.
9 Qızıl teńizge baqırdı, teńiz qurıp qaldı,
Qurǵaq jerden júrgizgendey,
Olardı teńiz túbi arqalı ótkerdi.
10 Olardı jek kóretuǵınlardıń qolınan qutqardı,
Dushpanlarınıń qolınan azat qıldı.
11 Jawların suw bastı,
Olardıń hesh biri aman qalmadı.
12 Sonda ata-babalarımız Onıń sózine isendi,
Onı alǵıslap, qosıq ayttı.
13 Degen menen, olar Jaratqan Iyeniń islerin dárhal umıttı,
Onıń kórsetetuǵın jol-jorıǵın kútip otırmadı.
14 Shólde olar nápsixorlıqqa berildi,
Izsiz dalada Qudaydı sınadı.
15 Quday olardıń soraǵanın berdi,
Biraq olarǵa awır kesellik jiberdi.
16 Ordada olar Muwsanı,
Jaratqan Iyeniń muxaddesi bolǵan Xarondı kúnledi,
17 Jer jarılıp, Datandı jutıp jiberdi,
Abiram menen onıń sheriklerin jalmadı.
18 Olardıń izinen júrgenlerge ot tústi,
Jalın jandırıp jiberdi jawızlardı.
19 Xoreb tawında tananıń músinin islep aldı,
Sol quyıp islegen butına tabındı.
20 Shóp jeytuǵın tananıń músinine,
Qudaydıń ullılıǵın almastırdı.
21 Olar umıttı ózlerin qutqarǵan Qudaydı,
Mısırda ullı islerdi islegendi,
22 Xam úlkesinde ájayıp islerdi kórsetkendi,
Qızıl teńizde tań qalarlıq islerdi qılǵandı.
23 Sonıń ushın, Quday olardı joq qılatuǵının ayttı,
Biraq tańlaǵan adamı Muwsa araǵa túsip,
Onı qurtaman degen ǵázebinen qaytardı.
24 Keyin ájayıp elden júz burdı,
Qudaydıń bergen wádesine isenbedi.
25 Óz shatırlarında tońqıldadı,
Jaratqan Iyeniń aytqanlarına qulaq salmadı.
26 Sonıń ushın, Jaratqan Iye ant iship:
«Sizlerdi shólde qurtıp taslayman,
27 Urpaqlarıńızdı milletler arasına tarqataman,
Ózge ellerge shashıp jiberemen», – dedi.
28 Olar Peordaǵı Baalǵa baylanıp qaldı,
Ólilerge berilgen qurbanlıq góshinen jedi.
29 Olar óz qılmısları menen Jaratqan Iyeni ǵázeplendirdi,
Sonlıqtan oba keselligi olardıń arasına jayıldı.
30 Pinexas turıp, araǵa tústi,
Sonda apat ta toqtadı.
31 Onıń bul isi ádillik sanalıp,
Áwladtan-áwladqa máńgi dawam etedi.
32 Meriba suwları janında olar Jaratqan Iyeni jáne ǵázeplendirdi,
Olar sebepli Muwsanıń basına qayǵı tústi.
33 Olar Muwsanıń ashıwına tiydi,
Ol da oylanbastan sóyledi.
34 Jaratqan Iye joq etiwdi buyırsa da,
Olar joq etpedi xalıqlardı.
35 Basqa xalıqlar menen aralastı,
Olardıń úrp-ádetlerin úyrendi.
36 Olardıń butlarına tabındı,
Butlar olar ushın duzaq boldı.
37 Ul hám qızların,
Jinlerge qurbanlıq qıldı.
38 Qanan butlarına qurbanlıq bolsın dep,
Ul hám qızlarınıń qanın,
Ayıpsızlardıń qanın tókti.
El tógilgen qan sebepli haramlandı.
39 Olar isleri menen haram boldı,
Qılmısları menen opasızlıq qıldı.
40 Jaratqan Iyeniń ǵázebi lawladı xalqına qarsı,
Jerkendi Óziniń menshik xalqınan.
41 Olardı basqa xalıqlarǵa táslim qıldı,
Jek kóretuǵınları olarǵa húkimdar boldı.
42 Dushpanları olardı ezdi,
Olardıń qol astında basları iyildi.
43 Jaratqan Iye olardı kóp márte qutqardı,
Biraq olardıń aqıl-esi qozǵalań kóteriw boldı,
Gúnaları sebepli páske urıldı.
44 Sonda da, Jaratqan Iye xalıqtıń qıyınshılıǵına itibar berdi,
Dad-páriyadına qulaq saldı.
45 Olar haqı Óz kelisimin esledi,
Ullı súyispenshiligi sebepli olarǵa rehim qıldı.
46 Olardı tutqınǵa alǵanlardı,
Rehimli bolıwǵa iytermeledi.
47 Qutqar bizlerdi, Qudayımız Jaratqan Iye,
Basqa xalıqlar arasınan bizlerdi jıyna.
Muxaddes atıńdı táriyipleyik,
Saǵan alǵıs ayta alǵanımız ushın maqtanayıq.
48 Izraildıń Qudayı Jaratqan Iyege,
Áwel bastan, máńgige deyin alǵıslar bolsın!
Pútkil xalıq: «Awmiyin!» – desin.
Haliluya!
Zabur 103 · Zabur 104 · Zabur 105 · QrqMK22
Zabur 104, 105 hám 106-da tálim beriwshi gúrriń bar. Zabur 104 dúnyanı jaratqan danalıq Qudayın maqtaǵan; Zabur 105 Onıń qutqarıwshı kúshin hám miyrim-shápáátin ulıqlaǵan. Biraq Zabur 106 Onıń xalqı, óz Jaratıwshısı hám Qutqarıwshısına qarsı qayta-qayta bas kótergenin moyınlaǵan. Ádillik penen Ol olardı sudlaǵan, olardı tutqınlıqqa jibergen.
Bizim Bibliyalarımız jıynalǵan 150 Zaburdı bes bólimge, yamasa kitapqa bólgen, hám Zabur 106 tórtinshi bólimdi juwmaqlaydı. Bul birqansha qayǵılı juwmaq. Ol jerde tabılǵan jalǵız úmit – Qudaydıń taǵı da miyrim kórsetip, Óz xalqın qayta jıynawı (Zab. 106:47) . Biraq keyin Zabur 107-niń quwanıshı keledi! «Rábbiniń qutqarǵanları, Onıń qutqarǵanları... hám jerlerden jıynaǵanları, bunı aytsın» (107:2–3) , Zabur 106-nıń jazıwshısı duwa etkenindey.
Zabur 107 qutqarıwdıń tórt mısalın beredi. Geybir adamlar shólde hálsiz jánler menen adasıp júrgen, biraq Rábbi olardı qalaǵa baslap barǵan (4–9-ay.) . Geybirleri ózleriniń bas kótergenligi sebepli shınjırlar hám awır miynetke shıdaǵan, biraq Rábbi olardı qarańǵılıqtan shıǵarıp, shınjırların úzgen (10–16-ay.) . Basqalar ózleriniń aqılsız gúnáları sebepli fizikalıq qıyınshılıqlardan azap shekken, biraq Rábbi olardı Óz sózi menen emlegen (17–22-ay.) . Taǵı basqalar dawıllı teńizlerge dúsh kelgen hám ne islerin bilmey qalǵan, biraq Rábbi tolqınlardı tınıshlandırıp, olardı qáwipsizlikke alıp kelgen (23–32-ay.) . Hár bir jaǵdayda, zaburshı bylay dep járiyalaǵan: «Áh, adamlar Rábbige Onıń jaqsılıǵı ushın hám adam balalarına kórsetken ájayıp isleri ushın shúkir etse edi!»
Zabur 107-degi qutqarılǵanlar tariyx hám payǵambarlıq penen baylanıstırılıwı múmkin, biraq álbette biz ózimiz ushın da sabaq tabıwımız kerek. Biz hesh qashan Qudaydıń jaratqanlarına tańlanıp, Onı qutqarıwı ushın maqtaǵanbız ba – biraq keyin Oǵan qarsı bas kótergenbiz be? Oǵan jalbarayıq! Eger biz bul nárselerdi baqlasaq, Rábbiniń múráttiligin túsinemiz.
