Iyemiz jaqın — January 24, 2026: Баслама 3

¹ Quday Iye jaratqan jabayı haywanlardıń ishindegi eń hiylekeri jılan edi. Jılan hayaldan: – Haqıyqattan da, Quday baǵdaǵı hesh bir terektiń miywesinen jemeń dedi me? – dep soradı. ² Hayal jılanǵa bılay dep juwap berdi: – Bizler baǵdaǵı tereklerdiń miywelerinen jey alamız. ³ Biraq Quday: «Baǵdıń ortasındaǵı terektiń miywesinen jemeń, oǵan qol tiygizbeń, bolmasa ólip qalasız», – degen edi. ⁴ Jılan hayalǵa: – Yaq, hasla ólmeysiz! ⁵ Sebebi sol terektiń miywesinen jegenińizde kózlerińiz ashılıp, jaqsılıq penen jamanlıqtı biletuǵınıńızdı hám Quday sıyaqlı bolatuǵınıńızdı Quday biledi, – dedi. ⁶ Hayal terektiń miywesiniń jewge jaqsı hám kózge jaǵımlı ekenin kórip, onnan bilim alıwǵa bolatuǵının bilgenlikten, háwesi keldi. Sonlıqtan ol miyweni úzip alıp jedi hám janındaǵı kúyewine de berdi. Kúyewi de jedi. ⁷ Sol waqıtta-aq ekewiniń de kózleri ashılıp, ózleriniń jalańash ekenin bildi. Olar ánjir aǵashlarınıń japıraqların bir-birine tigip, ózleri ushın japqıshlar isledi. ⁸ Olar kúnniń ıssılıǵı qaytqan waqıtta, baǵdıń ishinde Quday Iyeniń júrgenin esitti hám Onnan tasalanıp, baǵdaǵı tereklerdiń arasına jasırındı. ⁹ Biraq Quday Iye adamdı dawıslap shaqırıp: – Qay jerdeseń? – dedi. ¹⁰ Sonda adam: – Baǵda júrgenińdi esitkenimde qorqıp kettim. Men jalańash bolǵanlıqtan jasırındım, – dedi. ¹¹ Quday Iye adamnan: – Jalańash ekenligińdi saǵan kim ayttı? Ya bolmasa, Men jeme dep buyırǵan terektiń miywesinen jediń be? – dep soradı. ¹² Adam: – Sen maǵan bergen hayal terektiń miywesinen berdi, men de jedim, – dep juwap berdi. ¹³ Quday Iye hayalǵa: – Bul ne qılǵanıń? – dedi. Hayal: – Jılan meni aldadı, sonlıqtan men jedim, – dedi. ¹⁴ Sonda Quday Iye jılanǵa bılay dedi: – Sen bul isiń ushın barlıq mallar hám jabayı haywanlar arasınan shetletilip, náletiy bolasań. Ómiriń boyı jer bawırlap, topıraq jeyseń. ¹⁵ Men seniń menen hayaldı, onıń urpaǵı menen seniń urpaǵıńdı bir-birine dushpan etip qoyaman. Onıń urpaǵı seniń basıńdı ezedi, al sen onıń tabanın shaǵasań. ¹⁶ Sońınan Quday Iye hayalǵa: – Hámiledarlıq waqtıńda awır azap shektiremen, qıynalıp tuwatuǵın bolasań. Sen kúyewińe qushtar bolasań, ol seni basqaratuǵın boladı, – dedi. ¹⁷ Al adamǵa bılay dedi: – Hayalıńnıń sózin tıńlap, Men jeme dep buyırǵan terektiń miywesinen jegeniń ushın, jer sen sebepli náletlenedi. Ómiriń boyı awır miynet etip, jerden azıǵıńdı tawıp jeytuǵın bolasań. ¹⁸ Sen dala shóplerin awqat eteseń, jer sen ushın sheńgel hám oshaǵan ósiredi. ¹⁹ Jerge qaytqanıńsha, nanıńdı mańlay terińdi tógip tabatuǵın bolasań. Óytkeni sen topıraqsań, topıraqtan jaratılǵanıń sebepli jáne topıraqqa aylanasań. ²⁰ Adam óziniń hayalın Hawa dep atadı, sebebi ol pútkil adamzattıń túp anası boldı. ²¹ Quday Iye Adam hám onıń hayalı ushın teriden kiyim islep, olardı kiyindirdi. ²² Sońınan Quday Iye bılay dedi: «Mine, adam jamanlıq penen jaqsılıqtı bilip, Bizlerdiń birimiz sıyaqlı boldı. Endi ol ómir teregine qolın sozıp, onıń miywesin alıp jemesin hám máńgilik ómir súrmesin». ²³ Solay etip, óz denesi jaratılǵan topıraqtı tárbiyalaw ushın, Quday Iye adamdı Eden baǵınan shıǵarıp jiberdi. ²⁴ Ol adamdı quwıp shıǵarıp jiberdi hám ómir teregine baratuǵın joldı qorǵaw ushın Eden baǵınıń shıǵıs tárepine kerublardı hám hár tárepke aylanıp turatuǵın otlı qılıshtı qoydı.

² Pavel óz ádeti boyınsha májilisxanaǵa bardı. Úsh hápte olar menen Muxaddes Jazıwlardı talqıladı. ³ Masiyxtıń azap shegip, ólimnen qayta tiriliwi tiyis ekenin túsindirip, dáliller keltirdi de: – Men sizlerge járiyalap atırǵan bul Iysa – Masiyx, – dedi ol.

⁵ Biraq yahudiyler kúnshillik etip, bazarda bos júrgen ayırım jaramas adamlardı jıynadı da, qalada topalań kóterdi. Pavel menen Silanı tawıp, olardı xalıqtıń aldına shıǵarıw ushın, Yasonnıń úyine topılıp kirdi. ⁶ Biraq olardı taba almay, Yason menen basqa geybir tuwısqanlardı qala basshılarınıń aldına súyrep aparıp: – Pútkil dúnyanı astan-kesten etken bul adamlar usı jerge de kelipti. ⁷ Yason olardı qabıl qıldı. Olardıń hámmesi Iysa degen basqa bir patsha bar ekenin aytıp, Rim imperatorınıń pármanlarına qarsı háreket etip júr, – dep baqırdı. ⁸ Bul sózlerdi esitken xalıq hám qala basshıları qattı tınıshsızlandı. ⁹ Biraq olar Yasonnan hám basqalardan kepillikke aqsha alıp, bosatıp jiberdi. ¹⁰ Tuwısqanlar dárriw sol túni Pavel menen Silanı Beriyaǵa jiberdi. Olar Beriyaǵa kelip, yahudiylerdiń májilisxanasına kirdi.

Jaratılıs 3 · Elshiler 17:2–3 · Elshiler 17:5–10 · QrqMK22