1 Endi ruwxıy sıylarǵa kelsek, tuwısqanlarım, sizlerdiń bul haqqında xabarsız qalıwıńızdı qálemeymen. 2 Sizlerge málim, butparaz bolǵan waqtıńızda birew moynıńızǵa jip salıp súyregendey bolıp, tilsiz butlarǵa tabınatuǵın edińler. 3 Sonlıqtan mına nárseni biliwińizdi qáleymen: Qudaydıń Ruwxınıń basqarıwında sóyleytuǵın hesh bir adam: «Iysaǵa nálet jawsın», – dep aytpaydı. Jáne de, tek Muxaddes Ruwx basqaratuǵın adam ǵana: «Iysa – meniń Iyem», – dep ayta aladı.
4 Hár qıylı ruwxıy sıylar bar, biraq olardı beretuǵın Muxaddes Ruwx birew. 5 Hár túrli xızmetler bar, biraq bizler xızmet etetuǵın Iyemiz jalǵız. 6 Hár qıylı is-háreketler bar, biraq barlıq iseniwshi adamlardıń hár bir isinde háreket etiwshi Quday jalǵız. 7 Pútkil iseniwshiler jámáátiniń paydası ushın, Muxaddes Ruwx hár bir iseniwshige Óz sıyın beredi. 8 Muxaddes Ruwx birewge aqıl-danalıq sózlerin, birewge bilim sózlerin, 9 sol Muxaddes Ruwx birewge ayrıqsha isenim, birewge awırıwlarǵa shıpa beriw sıyın, 10 birewge káramatlar kórsetiw kúshin beredi. Jáne de, sol Muxaddes Ruwx birewge payǵambarshılıq aytıw, birewge ruwxlardı ayırıp biliw, birewge ruwxıy tillerde sóylew, birewge ruwxıy tillerdi túsindiriw sıyın beredi. 11 Bulardıń hámmesin iske asırıwshı bir nárse hám anıq sol Muxaddes Ruwx. Muxaddes Ruwx bul sıylardı Óz qálewi boyınsha hár kimge bólip beredi.
12 Adamnıń denesi birew bolǵanı menen, deneniń kóp músheleri bar hám músheler kóp bolsa da, olar bir deneni quraydı. Masiyxtıń denesi bolǵan iseniwshiler jámááti de sonday. 13 Sebebi bizler kim bolıwımızǵa qaramay, yahudiy bolsaq ta, grek bolsaq ta, qul yamasa azat adam bolsaq ta, hámmemiz Masiyxtıń denesi bolıwımız ushın, bir Muxaddes Ruwx tárepinen shomıldırıldıq. Quday bizlerdiń hámmemizge bir Muxaddes Ruwxtı berdi.
14 Dene bir emes, al kóp múshelerge iye. 15 Eger ayaq: «Men qol bolmaǵanım ushın, denege tiyisli emespen», – dese de, ol denege tiyisli emes bolıp qalmaydı. 16 Eger qulaq: «Kóz bolmaǵanım ushın, denege tiyisli emespen», – dese de, ol denege tiyisli emes bolıp qalmaydı. 17 Eger pútkil dene kóz bolsa, onda qalay esitiwge boladı? Eger pútkil dene qulaq bolsa, onda qalay iyis seziwge boladı? 18 Sonlıqtan Quday hár bir músheni denege Óz qálewi boyınsha jaylastırıp qoyıptı. 19 Eger múshelerdiń hámmesi birdey bolǵanda, onda dene qayaqta bolar edi? 20 Al haqıyqatında, músheler kóp bolsa da, dene birew.
21 Kóz qolǵa: «Seniń maǵan keregiń joq!» yamasa bas ta ayaqlarǵa: «Sizler maǵan kerek emessiz!» – dey almaydı. 22 Kerisinshe, deneniń hálsizirek kóringen músheleri anaǵurlım áhmiyetlirek boladı. 23 Deneniń itibarsızıraq dep sanalǵan múshelerine kóbirek ǵamxorlıq kórsetemiz. Kóriksiz múshelerimizge kóbirek sán beremiz. 24 Al kórikli múshelerimiz buǵan mútáj emes. Solay etip, Quday áhmiyetsiz bolǵan múshelerimizge áhmiyet berip, denemizdiń birligin saqladı. 25 Bunı Ol denede bóliniw bolmasın, al músheler bir-birine ǵamxorlıq kórsetsin dep isledi. 26 Eger bir múshe azap shekse, pútkil músheler birlikte azap shegedi. Bir múshe mártebege erisse, pútkil músheler birlikte quwanadı.
27 Solay etip, sizler birlikte Masiyxtıń denesisiz, al hár birińiz óz aldıńızǵa usı deneniń múshelerisiz. 28 Quday iseniwshiler jámáátinde birinshiden elshilerdi, ekinshiden payǵambarlardı, úshinshiden muǵallimlerdi, sońınan káramat kórsetetuǵınlardı, awırıwlarǵa shıpa beretuǵın sıyǵa iye bolǵanlardı, basqalarǵa járdem beriwshilerdi, jaqsı shólkemlestiriwshilerdi hám ruwxıy tillerde sóyleytuǵınlardı tayınladı. 29 Hámmesi elshi me? Hámmesi payǵambar ma? Hámmesi muǵallim be? Hámmesi káramat kórsetiwshi me? 30 Hámmesi awırıwlarǵa shıpa beretuǵın sıyǵa iye me? Hámmesi ruwxıy tillerde sóyley me? Hámmesi ruwxıy tillerdi túsindire me? Yaq, olay emes! 31 Biraq, sizler ullıraq sıylardı alıwǵa umtılıńlar.
Endi men sizlerge eń jaqsı joldı kórsetemen.
1 Eger men adamlardıń hám perishtelerdiń tillerinde sóylesem de, biraq súyispenshiligim bolmasa, onda meniń shıńǵırlaǵan mıstan hám dańǵırlaǵan dápten parqım bolmay qaladı. 2 Eger men payǵambarshılıq qúdiretine iye bolsam, pútkil sırlardı bilsem hám hár túrli bilimge iye bolsam, hátte, tawlardı kóshiretuǵın kúshli isenimim bolsa da, biraq súyispenshiligim bolmasa, onda men hesh nárse emespen. 3 Eger men pútkil mal-múlkimdi jarlılarǵa úlestirip bersem, hátte, ózimdi qurban etip, denemdi otqa jaǵıwǵa tapsırsam da, biraq súyispenshiligim bolmasa, bunnan maǵan hesh qanday payda joq.
4 Súyispenshilik sabırlı hám miyrimli. Súyispenshilik qızǵanbaydı, maqtanbaydı, menmenlik qılmaydı. 5 Súyispenshilik qopallıq islemeydi, óz paydasın gózlemeydi, tez ashıwlanbaydı, kek saqlamaydı. 6 Súyispenshilik nahaqlıqqa quwanbaydı, al haqıyqatlıqqa quwanadı. 7 Súyispenshilik hámme nárseni kóteredi, hámme waqıtta isenedi, hámme waqıtta úmit etedi, hámmesine shıdaydı.
8 Súyispenshilik hesh qashan tawısılıp qalmaydı. Biraq, payǵambarshılıqlar joq boladı, ruwxıy tillerde sóylew sıyı toqtap qaladı, bilim de joq boladı. 9 Óytkeni bizlerdiń bilimimiz de, payǵambarshılıqlarımız da ele tolıq emes. 10 Biraq, minsiz bolǵan tolıq nárse kelgende, tolıq emes nárse joq boladı. 11 Men bala bolǵan waqtımda bala sıyaqlı sóyleytuǵın, bala sıyaqlı pikir júrgizetuǵın hám bala sıyaqlı túsinetuǵın edim. Al eresek adam bolǵanımda, men balaǵa tán qásiyetlerdi tasladım. 12 Házir bizler hámmesin gúńgirt aynada kórgendey gúmilji kórip turmız. Biraq aqırǵı waqıt kelgende, júzbe-júz kóremiz. Házir men tolıq bilimge iye emespen, biraq aqırǵı waqıt kelgende, Quday meni tolıq bilgendey, men de Onı tolıq biletuǵın bolaman.
13 Solay etip, mına úsh nárse máńgige qaladı: isenim, úmit hám súyispenshilik. Biraq, bulardıń eń baslısı – súyispenshilik.
1 Súyispenshilik penen jasawǵa umtılıńlar hám ruwxıy sıylardı, ásirese payǵambarshılıq aytıw sıyın alıwǵa tırısıńlar. 2 Sebebi ruwxıy tilde sóylegen adam adamlarǵa emes, al Qudayǵa sóyleydi. Onı hesh kim túsinbeydi. Ol Muxaddes Ruwxtıń basqarıwında sırlardı aytadı. 3 Al payǵambarshılıq aytqan adam adamlardı bekkemlew, jubatıw hám ruwxlandırıw ushın sóyleydi. 4 Ruwxıy tilde sóylegen adam ózin ózi bekkemleydi. Al, payǵambarshılıq aytqan adam iseniwshiler jámáátin bekkemleydi. 5 Men sizlerdiń hámmeńizdiń ruwxıy tillerde sóylewińizdi qáleymen. Biraq onnan góre, payǵambarshılıq aytıwıńızdı kóbirek qáleymen. Ruwxıy tiller iseniwshiler jámáátiniń bekkemleniwi ushın túsindirilmese, onda payǵambarshılıq aytıwshı ruwxıy tillerde sóylegen adamnan artıǵıraq.
6 Solay etip, tuwısqanlarım, men sizlerge barıp ruwxıy tillerde sóylesem, biraq sizlerge ya Qudaydıń ayanın, ya payǵambarshılıq sózin túsindirmesem, ya bilim ya tálim bermesem, onda meniń sizlerge qanday paydam tiyedi? 7 Sırnay yamasa arfa sıyaqlı, ses shıǵaratuǵın jansız nárseler de anıq ses shıǵarmasa, sırnay yamasa arfanıń ne shertkenin kim túsinedi? 8 Eger kárnay urıstıń baslanǵanın járiyalap, anıq ses shıǵarmasa, kim urısqa tayarlanadı? 9 Sol sıyaqlı, sizler de ruwxıy tilde sóylep, túsiniksiz sózlerdi aytsańız, sóylegen sózińizdi kim túsinedi? Sizler qurı dalaǵa sóylegendey bolasızlar! 10 Dúnyada túrli-túrli tiller bar hám olardıń hár bir sózi óz mánisine iye. 11 Degen menen, eger men ózime aytılǵan sózdi túsinbesem, sóylep turǵan adam ushın men jat jerli adam bolaman, sóylep turǵan adam da men ushın jat jerli adam boladı. 12 Sol sebepten sizler ruwxıy sıylardı alıwǵa umtılǵanıńızda, iseniwshiler jámáátin bekkemleytuǵın sıylardı kóbirek alıwǵa tırısıńlar.
13 Sonlıqtan kim de kim ruwxıy tilde sóyleytuǵın bolsa, ol óziniń aytqanların túsindire alıwı ushın duwa etsin. 14 Óytkeni men ruwxıy tilde duwa etsem, ruwxım duwa etedi, biraq men bunı sana-sezimim menen túsinbeymen. 15 Olay bolsa, men ne islewim kerek? Men ruwxım menen de, sana-sezimim menen de duwa etiwim kerek. Ruwxım menen alǵıs-maqtaw qosıǵın aytsam, sana-sezimim menen de alǵıs-maqtaw qosıǵın aytıwım kerek. 16 Eger sen tek ruwxıń menen shúkirlik bildirseń, sol jerde turǵan túsinbeytuǵın adam seniń bildirgen shúkirligińe qalay «awmiyin» deydi? 17 Durıs, seniń shúkirlik bildirgeniń jaqsı, biraq bul arqalı basqa adam ruwxıy azıq almaydı. 18 Qudayǵa shúkir, men hámmeńizden góre, ruwxıy tillerde kóbirek sóyleymen. 19 Degen menen, iseniwshiler jámáátinde ruwxıy tilde on mıń sóz aytqanımnan góre, basqalarǵa tálim beriwim ushın túsinikli bes sóz aytqanım abzalıraq.
20 Tuwısqanlarım, aqıl-oyıńız benen baladay bolmańlar. Jamanlıq islewde gódek sıyaqlı, al aqıl-oyıńız benen eresek adam sıyaqlı bolıńlar. 21 Muxaddes Jazıwda bılay delingen:
«Jaratqan Iye bılay deydi: „Jat tillerde sóylegenler arqalı,
Jat adamlardıń awızları arqalı bul xalıqqa sóyleymen.
Olar sonda da Meni tıńlamaydı“».
22 Solay etip, ruwxıy tillerde sóylew iseniwshiler ushın emes, al isenbeytuǵın adamlar ushın berilgen belgi boladı. Al payǵambarshılıq isenbeytuǵın adamlar ushın emes, iseniwshiler ushın berilgen belgi boladı. 23 Eger pútkil iseniwshiler jámááti bir jerge jıynalıp, hámmesi birlikte ruwxıy tillerde sóylese, bul ruwxıy sıyǵa iye emes yamasa iseniwshi emes adamlar sol jerge kelse: «Sizler aqıldan azıpsız!» – demey me? 24 Biraq, hámme payǵambarshılıq qılǵanda, iseniwshi emes yamasa bul ruwxıy sıydı túsinbeytuǵın bir adam sol jerge kelse, esitken hár bir sózi onıń gúnakar ekenligin ashıp beredi hám húkim etedi. 25 Solay etip, onıń júregindegi jasırın nárseler ashılıp qaladı hám ol jerge jıǵılıp: «Quday haqıyqattan da, sizlerdiń arańızda eken!» – dep Qudayǵa sıyınadı.
26 Tuwısqanlarım, endi bunnan qanday juwmaq shıǵaramız? Sizler jıynalǵanıńızda, birińiz alǵıslaw qosıǵın aytasız, birińiz tálim beresiz, birińiz Quday bergen ayandı bildiresiz, birińiz ruwxıy tilde sóyleysiz hám jáne birińiz ruwxıy tildi túsindiresiz. Bulardıń hámmesi iseniwshiler jámáátiniń bekkemleniwi ushın islensin. 27 Ruwxıy tilde sóylegenińizde, eki yamasa eń kóp degende úsh adam sóylesin, biraq olar gezek penen sóylesin. Basqa bir adam aytılǵanlardı túsindirsin. 28 Eger túsindiretuǵın adam joq bolsa, ruwxıy tilde sóyleytuǵın adam jámáátte úndemesin, al ózi jalǵız qalǵanda ózi ushın Qudayǵa sóylesin. 29 Payǵambarshılıq aytıwshılardıń da ekewi yamasa úshewi sóylesin, al basqalar olardıń aytqan sózlerin tekserip kórsin. 30 Otırǵan basqa bir adamǵa sol waqıtta Qudaydan ayan berilse, sóylep turǵan payǵambarshılıq aytıwshı adam úndemey qalsın. 31 Jámááttegi hár bir adamdı úyretip, hár bir adamǵa jubanısh beriwińiz ushın, hámmeńiz gezek penen payǵambarshılıq aytıwıńızǵa boladı. 32 Payǵambarshılıq aytıw sıyı payǵambarshılıq aytıwshı adamlar tárepinen basqarıladı. 33 Sebebi Quday tártipsizlik Qudayı emes, al tınıshlıq Qudayı.
Barlıq muxaddeslerdiń jámáátlerinde bolǵanı sıyaqlı, 34 sizlerdiń jámáátińizde de hayallar jıynalıslarda úndemesin. Olardıń sóylewine ruxsat etilmegen. Muwsanıń Nızamında aytılǵanday, olar boysınıwı kerek. 35 Eger olar bir nárseni úyrenbekshi bolsa, úyde kúyewlerinen sorasın. Óytkeni hayaldıń jámáát jıynalısında sóylegeni uyat boladı.
36 Qudaydıń sózi sizlerden shıǵıp, tek jalǵız sizlerge jetip bardı ma? 37 Eger kim de kim ózin payǵambar yamasa ruwxıy jetik adam dep sanasa, sizlerge jazıp atırǵan bul sózlerimniń Iyemizdiń buyrıǵı ekenin bilsin. 38 Al kim de kim bulardı qabıl almasa, onıń ózi de qabıl alınbaydı.
39 Solay etip, tuwısqanlarım, payǵambarshılıq aytıwǵa umtılıńlar. Ruwxıy tillerde sóylewge tosqınlıq jasamańlar. 40 Biraq, hámmesi de ádep hám tártip penen islensin.
31 Biraq, sizler ullıraq sıylardı alıwǵa umtılıńlar.
Endi men sizlerge eń jaqsı joldı kórsetemen.
3 Al payǵambarshılıq aytqan adam adamlardı bekkemlew, jubatıw hám ruwxlandırıw ushın sóyleydi.
1 Korinfliler 12–14 · 1 Korinfliler 12:31 · 1 Korinfliler 14:3 · QrqMK22
1 Korinflilerge 12–14-ten úyrenemiz, Korinftegi máshiylikler ásirese tillerdiń ruwxıy sawǵasına qızıǵıwshılıq bildirgen. Anıǵı, belgisiz tillerde sóylegen múminler úlken itibarǵa iye bolǵan. Bul maqtanıshqa hám ruwxıy jaqtan paydasız jıynalıslarǵa alıp kelgen. 14-bap, bunıń ornına, úlken zárúrliktiń bir-birin ruwxıy jaqtan qurıw ekenligin atap ótedi: «Hámme nárse qurıw ushın islensin» (14:26). Joqarıdaǵı ayat bizdiń «eń jaqsı sawǵalardı shın júrekten qálewimiz» kerek ekenligin aytadı, hám bul 1 Korinflilerge 14:39-da qaytalanadı hám túsindiriledi: «payǵambarlıq etiwdi shın júrekten qáleń». Jańa Ósiyet tamamlanǵanǵa shekemgi dáwirde, payǵambarlıq etken adam «qurıw hám úgit hám teselli» (14:3) sóylegen, Qudaydıń táliymat hám máshiylik turmısı haqqındaǵı pikirin ashıqlaǵan. Solay etip, «eń jaqsı sawǵalar» hámme túsine alatuǵın, Qudaydan kelgen waqıtlı, úgit-násiyat beriwshi xabarlar bergenler edi. Waqıtlı, Bibliyalıq xızmettiń sol maqsetlerge sáykes keliwi búgingi kúnde de dawam etpekte.
Biraq, ruwxıy sawǵalardı qarastırǵanda eske alatuǵın «eń jaqsı jol» bar. Bul muhabbat jolı, 1 Korinflilerge 13 túsindiredi. Muhabbat ruwxıy sawǵalar arasında kórsetilmegen; kerisinshe, olardıń qaysı birin qollanıw ushın zárúrli ortalıq. Rimliklerge 12:6–8-degi uqsas bólim, ol da bir qatar ruwxıy sawǵalardı kórsetedi, onıń artınan 9-ayat keledi: «Muhabbat eki júzliliksiz bolsın».
Máshiylikler sıpatında, biz óz sawǵalarımızdı biliwge umtılıwımız kerek. Yakup ruwxıy oqıtıwshılar haqqında sóylegende, «biz» almasıǵın qollanǵan, bul onıń Qudaydıń onı sol qábilette qollanıwdı qálegenin bilgenin kórsetedi (Yakup 3:1). Biraq, eger biz óz sawǵalarımız haqqında isenimsiz bolsaq ta, biz birden muhabbatqa óte alamız, sebebi máshiylik muhabbat ortalıǵında biz hárdayım bir-birimizge xızmet etiwdi qáleymiz.
