Жаратылыс 24-те жазылған Ибраҳимниң хызметшисин Исаакқа ҳаял алыў ушын жибергени ҳаққындағы гүрриң бизге бул жақсы ҳәм садық хызметши ҳаққында көп қымбатлы сабақлар үйретеди. Биринши әҳмийетли ҳәм әмелий сабақ мынада: жақсы хызметши өз буйрықларын өз хожасынан алыўы керек. Ибраҳимниң хызметшиси тәжирийбели еди, себеби ол Ибраҳимниң барлық нәрсесине басшылық етер еди.
Ол исенерли ҳәм, ҳеш гүмансыз, ақыллы адам еди, бирақ ол өз тәжирийбесине исенбеди, ҳәм Ибраҳим оған: «Өз пикириңди қоллан», деп айтпады. Ҳаял оның менен барыўдан бас тартқан жағдайда не ислеў кереклиги ҳаққында сораўы болғанда, ол тиккелей өз хожасынан сорады. Ол өз хызметшилери менен кеңеспеди. Ол ҳақыйқатты ҳақыйқаттың дерегинен алғысы келди. Биз де Қудай Сөзи ҳәм мәрҳамат тахты арқалы ҳақыйқатқа ерисемиз. Бизде бизди барлық ҳақыйқатқа баслап баратуғын Мухаддес Руўх бар.
Нәтийже әжайып болды. Ибраҳим оған не ислемеў кереклигин, сондай-ақ не ислеў кереклигин анық айтты. Буннан тысқары, ол Қудайдың оған ҳәзирге шекем ислегенлерине ҳәм Қудайдың оған берген ўәделерине сүйенип, жоқарыдан жәрдем ўәде етти: «Аспанлардың Қудайы Жаҳўа … маған ант ишип, былай деди: Сениң урпағыңа бул жерди беремен – Ол Өз периштесин сениң алдыңнан жибереди, сонда сен мениң улым ушын сол жерден ҳаял аласаң» (7-аят). Садық хызметши өз садық хожасы Ибраҳимге бойсынды, ол садық Қудайға исенди. Биз ушын сабақ өте анық: исениң ҳәм бойсының. Ҳәм ўәде мынада: «Мен саған ақыл үйретемен ҳәм баратуғын жолыңды үйретемен» (Забур 32:8).
