1 Bul – tez arada júz beriwi kerek bolǵan waqıyalardı Óz xızmetshilerine bildiriw ushın Qudaydıń Iysa Masiyxqa bergen ayanı. Al Ol Óz perishtesin jiberip, bul ayandı xızmetshisi Yuxanǵa bildirdi. 2 Yuxan Qudaydıń sózin hám Iysa Masiyxtıń gúwalıǵın, yaǵnıy ózi kórgen nárseleriniń hámmesin bayan etti. 3 Bul payǵambarshılıq sózlerdi oqıytuǵın hám bul jerde jazılǵanlardı tıńlap, orınlaytuǵınlar qanday baxıtlı! Sebebi bul waqıyalardıń bolatuǵın waqtı jaqın.
4-5 Men, Yuxannan, Aziya úlkesindegi jeti jámáátke sálem! Házir bar, burınnan bar bolǵan hám keleshekte keletuǵın Qudaydan, Onıń taxtı aldında turǵan jeti ruwxtan, isenimli gúwa bolǵan, óliler arasınan birinshi bolıp tirilgen hám jer júzi patshalarınıń Húkimdarı bolǵan Iysa Masiyxtan miyrim hám tınıshlıq sizlerge berilsin!
Ol bizlerdi súyip, Óz qanı menen gúnalarımızdan azat etti 6 hám bizlerdi Óz Patshalıǵına eristirip, Ákesi Qudaydıń xızmetindegi ruwxaniyler qıldı. Máńgi-baqıy ullılıq hám qúdiret Iysa Masiyxtiki bolsın!
Awmiyin.
7 «Mine, Ol bultlar menen kelmekte!
Hár bir kóz Onı kóredi,
Onıń denesin teskenler de kóredi.
Jer júziniń barlıq xalıqları,
Ol sebepli ókirip jılaydı».
Awa, usılay boladı, awmiyin.
8 Házir bar, burınnan bar bolǵan hám keleshekte keletuǵın Quday, Qúdireti kúshli Quday Iye bılay deydi: «Men – Alfa hám Omegaman».
9 Men, Iysanıń qayǵı-hásiretine, patshalıǵına hám sabırlılıǵına sizler menen birge sherik bolǵan tuwısqanıńız Yuxan, Qudaydıń sózi ushın hám Iysa haqqında járiyalaǵanım sebepli Patmos atawına súrgin etilgen edim. 10 Iyemizdiń kúninde, meni Muxaddes Ruwx basqarıp turǵanda, arqamnan kárnaydıń dawısına uqsaǵan bálent bir dawıstı esittim. 11 Bul dawıs: «Kórip turǵanlarıńdı kitapqa jaz hám jeti jámáátke, yaǵnıy Efes, Smirna, Pergam, Tiatira, Sardis, Filadelfiya hám Laodikiyaǵa jiber», – dedi.
12 Maǵan sóylep atırǵandı kóriw ushın, arqama burıldım. Burılıp, jeti altın shıra qoyǵıshtı kórdim. 13 Olardıń ortasında ústine uzınlıǵı ayaǵına túsetuǵın kiyim kiygen, kókiregine altın óńirshe baylaǵan Adam Ulına uqsaǵan Birew tur edi. 14 Onıń bası hám shashları aq jún sıyaqlı, qarday appaq edi. Kózleri bolsa, ottıń jalınınday jarqırap turǵan edi. 15 Onıń ayaqları peshte qızdırılǵan jıltıraq qolaǵa uqsaǵan bolıp, dawısı sarqırap aqqan suwdıń sestindey edi. 16 Oń qolında jeti juldız bar bolıp, awzınan eki júzli ótkir qılısh shıǵıp turǵan edi. Júzi kúshli jarqırap turǵan quyashtay edi.
17 Men Onı kóriwden-aq, óli sıyaqlı ayaqlarına jıǵıldım. Al Ol oń qolın ústime qoyıp, bılay dedi:
– Qorqpa! Men – Birinshi hám Sońǵıman.
18 Men tirimen. Ólgen edim, biraq, mine, máńgi-baqıy tirimen. Ólimniń hám óliler mákanınıń giltleri Mende.
19 Sonlıqtan kórgenlerińdi, házir júz berip atırǵan nárselerdi hám bunnan soń bolatuǵınlardı jaz. 20 Oń qolımda sen kórgen jeti juldızdıń hám jeti altın shıra qoyǵıshtıń sırı mınaw: jeti juldız – jeti jámááttiń perishteleri, jeti shıra qoyǵısh – jeti jámáát.
19 Sonlıqtan kórgenlerińdi, házir júz berip atırǵan nárselerdi hám bunnan soń bolatuǵınlardı jaz.
1 – Efes jámáátiniń perishtesine jaz.
Oń qolına jeti juldız uslaǵan, jeti altın shıra qoyǵıshtıń ortasında júretuǵın bılay deydi: 2 «Seniń islerińdi, awır miynetińdi hám sabırlılıǵıńdı bilemen. Jaman adamlardıń jamanlıq islewine jol qoymaytuǵınıńdı da bilemen. Elshi emes bolıp turıp, ózlerin elshi dep ataǵanlardı sınadıń hám olardıń ótirikshi ekenin bilip aldıń. 3 Awa, sen sabırlısań. Meniń atım ushın qıyınshılıqlarǵa shıdam berdiń hám sharshamadıń.
4 Biraq, saǵan bir qarsılıǵım bar: sen birinshi isengen waqtıńdaǵı súyispenshiligińdi joyttıń. 5 Solay etip, ne nársede aljasqanıńdı esińe túsir! Táwbe qılıp, dáslepki islerińdi dawam et. Eger táwbe qılmasań, saǵan kelip, shıra qoyǵıshıńdı ornınan alıp taslayman. 6 Degen menen, sende bir unamlı qásiyet bar: sen Nikolas uyımınıń islerin jek kóreseń. Olardı Men de jek kóremen.
7 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin. Jeńip shıqqanǵa Qudaydıń jánnetindegi ómir tereginiń miywesin jew huqıqın beremen».
8 – Smirna jámáátiniń perishtesine jaz.
Ólip, ólimnen qayta tirilgen, Birinshi hám Sońǵı bolǵan bılay deydi: 9 «Seniń qayǵı-hásiretińdi hám kámbaǵallıǵıńdı bilemen. Biraq, sen baysań. Ózlerin yahudiylermiz deytuǵınlardıń seni masqaralap aytqan sózlerin de bilemen. Biraq olar yahudiy emes, al shaytan jıyını. 10 Basıńa túsetuǵın qıyınshılıqlardan qorqpa! Mine, shaytan sizlerdi sınaw ushın arańızdaǵı bazılarıńızdı qamaqqa taslaydı. On kún azap shegesizler. Óliwge tuwra kelse de, Maǵan sadıq qal, sonda Men saǵan ómir tajın beremen.
11 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin. Jeńip shıqqan ekinshi ólimnen hesh qanday zálel kórmeydi».
12 – Pergam jámáátiniń perishtesine jaz.
Eki júzli ótkir qılıshqa iye bolǵan bılay deydi: 13 «Shaytannıń taxtı turǵan jerde jasaytuǵınıńdı bilemen. Atıma sadıq ekenińdi de bilemen. Hátte, sadıq gúwam Antipa arańızda, shaytan otırǵan jerde óltirilgen kúnlerde de sen Maǵan degen isenimińnen qaytpadıń.
14 Biraq, saǵan biraz qarsılıǵım bar: arańızda Bilam tálimatın tutıwshılar bar. Butlarǵa shalınǵan qurbanlıq góshin jewge hám buzıqshılıq qılıwǵa úyretiw ushın, Bilam Balaqtı Izrail xalqın joldan urıwǵa úgitlegen edi. 15 Sol sıyaqlı, sizlerdiń arańızda Nikolas uyımınıń tálimatın tutıwshılar da bar. 16 Bul ushın táwbe qıl! Bolmasa, tez janıńa kelip, olarǵa qarsı awzımdaǵı qılısh penen urısaman.
17 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin. Jeńip shıqqanǵa sırlı manna menen bir aq tas beremen. Bul tastıń ústine jańa at jazılǵan. Attı tastı alǵan adamnan basqa hesh kim bilmeydi».
18 – Tiatira jámáátiniń perishtesine jaz.
Kózleri lawlap janǵan otqa, ayaqları jıltıraǵan qolaǵa uqsaǵan Qudaydıń Ulı bılay deydi: 19 «Seniń islerińdi, súyispenshiligińdi, isenimińdi, xızmetińdi hám sabırlılıǵıńdı bilemen. Sońǵı islerińniń birinshi isengen waqtıńdaǵı islerińnen kóbirek ekenin de bilemen.
20 Degen menen, saǵan bir qarsılıǵım bar: ózin payǵambar dep ataǵan Izabel atlı hayalǵa shıdap atırsań. Bul hayal xızmetshilerimdi joldan urıp, buzıqshılıq islewge hám butlarǵa shalınǵan qurbanlıq góshin jewge úyretpekte. 21 Táwbe etiwi ushın oǵan máwlet bergen edim. Biraq ol buzıqshılıǵı ushın táwbe etiwdi qálemeydi. 22 Mine, Men onı kesellik tósegine qulataman. Onıń menen buzıqshılıq isleytuǵınlardı da onıń menen birge islegen jaman isleri ushın táwbe etpese, úlken qayǵı-hásiretke duwshar etemen. 23 Onıń izine ergenlerdi de ólimge duwshar etemen. Sonda pútkil jámáátler Meniń kewil hám júreklerdi sınawshı ekenimdi bilip aladı. Hár birińizge islerińizge qaray qaytaraman. 24-25 Biraq, Tiatiradaǵı basqalarǵa, yaǵnıy sol hayaldıń tálimatın tutpay, „shaytannıń tálimatınıń tereń sırların“ úyrenbegen sizlerge aytatuǵınım mınaw: „Men kelemen degenshe, ózlerińizde bar bolǵanlarǵa bekkem bolıńlar“. Sizlerge bunnan basqa awırmanlıq salmayman.
26 Jeńip shıǵıp, Meniń buyırǵanlarımdı aqırına deyin orınlaǵanǵa milletler ústinen biylik beremen.
27 „Ol olardı temir tayaq penen basqarıp,
Ílay ıdıs sıyaqlı sındırıp taslaydı“.
Ákemnen Men alǵan usınday biylikti ol da aladı. 28 Jeńip shıqqanǵa tań juldızın da beremen. 29 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin».
1 – Sardis jámáátiniń perishtesine jaz.
Qudaydıń jeti ruwxına hám jeti juldızına iye bolǵan bılay deydi: «Seniń islerińdi bilemen. Tiri jámáát degen atıń bar, biraq sen óliseń. 2 Sergek bol! Ele ólmey qalǵan, endi óleyin dep atırǵanlardı bekkemle. Sebebi Qudayımnıń aldında seniń islerińniń jetkiliksiz ekenligin kórdim. 3 Sonlıqtan óziń qabıl alıp esitken tálimatıńdı esińe túsir. Onı tutınıp, táwbe et! Eger sergek bolmasań, Men urı sıyaqlı kútilmegende kelemen. Meniń qashan keletuǵınımdı bilmey de qalasań.
4 Biraq Sardiste, sizlerdiń arańızda kiyimlerin kirletpegen ayırım adamlar bar. Olar aq kiyim kiyip, Meniń menen birge júredi. Óytkeni olar usıǵan ılayıqlı. 5 Jeńip shıqqan usınday aq kiyim kiyedi. Bunday adamnıń atın Ómir kitabınan hesh qashan óshirmeymen. Ákemniń hám Onıń perishteleriniń aldında bul adamnıń atın ashıq tán alaman. 6 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin».
7 – Filadelfiya jámáátiniń perishtesine jaz.
Muxaddes hám haqıyqat bolǵan, Dawıttıń giltine iye, Ol ashsa hesh kim jaba almaytuǵın, japsa, hesh kim asha almaytuǵın bılay deydi: 8 «Seniń islerińdi bilemen. Mine, seniń aldıńa hesh kim jaba almaytuǵın ashıq bir qapı qoydım. Kúshiń az bolsa da sózimdi orınlap, atımnan waz keshpediń. 9 Qara, shaytannıń jıyınınan bolǵanlardı, ózlerin yahudiymiz dep atap, biraq yahudiy bolmaǵan ótirikshilerdi saǵan tapsıraman. Olardı saǵan keliwge hám seniń ayaǵıńa bas urıwǵa májbúr etip, olarǵa Meniń seni súyetuǵınımdı kórsetemen. 10 Sabırlılıq penen shıda degen buyrıǵımdı orınlaǵanıń ushın, jer júzinde jasaytuǵınlardı sınaw maqseti menen pútkil dúnya júzine keletuǵın sınaq waqtınan Men de seni saqlayman.
11 Men jıldam kelemen. Tajıńdı hesh kim alıp qoymawı ushın, ózińde bar nársege bekkem bol. 12 Jeńip shıqqandı Qudayımnıń Ibadatxanasınıń sútini qılaman. Sol adam ol jerden hesh qashan shıqpaydı. Onıń ústine Qudayımnıń atın, Qudayımnıń qalasınıń atın, yaǵnıy aspannan, Qudaydıń janınan túsetuǵın jańa Erusalimniń atın hám Ózimniń jańa atımdı jazaman. 13 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin».
14 – Laodikiya jámáátiniń perishtesine jaz.
Awmiyin dep atalǵan, sadıq hám haqıyqıy gúwa, Qudaydıń jaratqanlarınıń Tiykarı bılay deydi: 15 «Seniń islerińdi bilemen. Sen ya suwıq, ya ıssı emesseń. Qáne endi, ya suwıq, ya ıssı bolsań! 16 Sen ıssı da, suwıq ta emes, al jıllı bolǵanıń ushın, seni qusıp jiberemen. 17 Bayman, bayıdım, hesh nársege mútáj emespen, deyseń. Biraq ózińniń baxıtsız, ayanıshlı, jarlı, soqır hám jalańash ekenligińdi bilmeyseń. 18 Sonlıqtan Meniń saǵan aytatuǵın másláhátim mınaw: bay bolıwıń ushın, Mennen otta tazalanǵan altın, jalańashlıǵıńnıń ayıbı kórinbew ushın aq kiyimler, kóriwiń ushın kózlerińe súrtetuǵın dári satıp al.
19 Men súygenlerimniń hámmesin áshkara etip, tárbiyalayman. Sol sebepli intalı bolıp, táwbe et. 20 Mine, Men qapı aldında qaǵıp turman. Eger kim de kim dawısımdı esitip, qapını ashsa, onıń úyine kiremen. Men onıń menen, ol Meniń menen birge awqat jeymiz.
21 Men jeńip shıǵıp, Ákem menen birge Onıń taxtına otırǵanımday, jeńip shıqqanǵa da Meniń menen birge taxtıma otırıw huqıqın beremen. 22 Qulaǵı bar adam Muxaddes Ruwxtıń jámáátlerge aytıp atırǵan sózlerin esitsin».
Ayan 1 · Ayan 1:19 · Ayan 2–3 · QrqMK22
Yoxan elshi tárepinen jazılǵan Ashıw, Qudaydıń adam menen bolǵan jollarınıń payǵambarlıq juwmaǵı. Geneziste taza jańalıq hám ápiwayılıq penen baslanǵan tariyx endi adamnıń jıynalǵan gúnası hám qasarıwshı tártipsizligi sebepli úlken qatnasıqlar hám qıyınshılıqlar menen tawsıladı. Biraq bizdiń ullı Qudayımız, tınısh, ullı oylanıw menen, shúbheli shálkemdi sheshedi hám Óziniń iláhıy danalıǵına sáykes kámil waqıtta hám tártipte húkim etedi.
1:19-bólimde berilgen kitaptıń úsh tiykarǵı bólimi student ushın úlken járdem boladı:
• «siz kórgen nárseler» (1-bólim);
• «bar bolǵan nárseler» (2–3-bólimler);
• «bunnan keyin bolatuǵın nárseler» (4–22-bólimler).
Birinshisi ótken; ekinshisi házirgi, Shirkew dáwirine tiyisli; hám úshinshisi keleshek. 2 hám 3-bólimlerde Rabbimiz Isa Kishi Aziyadaǵı jeti jıynalıstıń jaǵdayın ullı sudlıq túsiniwde kórinedi, bular Shirkewdiń baslanıwınan Rabbimizdiń keliwine, Rapturege shekemgi pútkil tariyxınıń payǵambarlıǵı bolıp tabıladı. Húkim Qudaydıń úyinen baslanıwı kerek.
Rabbimiz Isanıń barlıq nárseler ústinen jeńisi, Onıń mıń jıllıq patshalıǵı, Onıń Ullı Aq Taq húkimi, jańa aspanlar hám jańa jerdegi Qudaydıń máńgilik dańqı kitaptıń ullı máseleleriniń geyparaları. Qudaydıń ullı keńesleriniń dańqlı juwmaǵı! Qudaydan kelgen bul aqırǵı sózdiń onıń muqáddes haqıyqatların oqıytuǵınlar, esitiwshiler hám saqlawshılar ushın bereket járiyalaǵanı da qansha sáykes.
