Saturday, January 18, 2025

Muxaddes Jazıwda aytılǵanday: «Kóz kórip, qulaq esitpegen, Adamnıń oyına kirip te shıqpaǵan nárselerdi, Quday Ózin súyetuǵınlar ushın tayarlap qoyıptı». Biraq, Quday bunı bizlerge Óziniń Muxaddes Ruwxı arqalı ashıp berdi. Óytkeni Muxaddes Ruwx hámme nárseni, hátte, Qudaydıń tereń oy-pikirlerin de biledi.

1 Korinfliler 2:9-10

Biraq Ol, yaǵnıy Haqıyqat Ruwxı kelgende, sizlerdi tolıq haqıyqatqa qaray jeteleydi. Ol Ózliginen sóylemeydi, tek neni esitse, sonı sóyleydi hám keleshekte ne bolatuǵının sizlerge bildiredi.

Yuxan 16:13

«Mine, Ol bultlar menen kelmekte! Hár bir kóz Onı kóredi, Onıń denesin teskenler de kóredi. Jer júziniń barlıq xalıqları, Ol sebepli ókirip jılaydı». Awa, usılay boladı, awmiyin.

Ayan 1:7

Tuwısqanlar! Úmitsiz jasaytuǵın basqa adamlar sıyaqlı qayǵırmawıńız ushın, bul dúnyadan kóz jumǵanlar haqqında sizlerdiń xabarsız qalıwıńızdı qálemeymiz. Sebebi bizler Iysanıń ólip, qayta tirilgenine isenemiz. Sol sıyaqlı, Iysaǵa isenip, bul dúnyadan kóz jumǵanlardı Quday Onıń menen birge qayta alıp keletuǵınına da isenemiz.

1 Salonikalılar 4:13-14

Óytkeni Iyemizdiń Ózi buyırǵan bálent dawıs astında, bas perishteniń sesti hám Qudaydıń kárnayınıń hawazı menen aspannan kelgende, dáslep Masiyxqa isengen óliler tiriledi. Onnan soń, jasap atırǵan bizler, yaǵnıy tiri qalǵanlar olar menen birge Iyemizdi hawada kútip alıw ushın, bultlar ishine alınıp kóterilemiz. Solay etip, hámme waqıt Iyemiz benen birge bolamız.

1 Salonikalılar 4:16-17