Ҳабыл, Енох ҳәм Нух Ибранийлерге 11-баптағы ийман бабында аталған үш патриарх болып, олар жер жүзин басқан үлкен суў тасқынынан алдын жасаған. Биринши аталған Ҳабыл, Қудайға жақынласыўдың жалғыз жолы қурбанлық арқалы екенлигин түсинген. Сонлықтан, ийман менен, Ҳабыл қозыны қурбан етти, ҳәм Қудай оның қурбанлығын қабыл етти. Бул Қудай менен қатнасықтың баслаў ноқаты.
Енох ийман менен жүрди, ҳәм одан биз Қудайсыз дүньяда Қудайды разы етиў ушын биздиң жүрисимиз бизди қоршаған ҳәзирги жаманлықтан айырылыўы керек екенлигин үйренемиз. Енохтың Қудай менен садық жүриси Қудайдың жүрегине қуўаныш алып келди, сонда ҳүким келместен бурын, Қудай оны алып кетти ҳәм ол өлимди көрмеди.
Нухтың әкеси Ламех Қудайдан қорқатуғын адам еди, оның тәсири астында Нух өсти. Қудайдан қорқатуғын үйде жасаў үлкен имтияз ҳәм бахыт. Нухтың әкеси, атасы ҳәм үлкен атасы барлығы ийманлы адамлар еди. Нух Қудайдың таңлаған ыдысы болып, оны ҳәм оның үйин жер жүзине болған Қудайдың ҳүкими болған суў тасқынында қутқарған кемени таярлады. Нух, ийман менен ҳәрекет етип ҳәм өзин садық екенлигин дәлеллеп, қурылықта кеме қурыўдың бул үлкен жойбарын өз мойнына алыўға таяр еди. Қудай оған жобаны берди. Кеме қурылып атырған 120 жыл даўамында, Нух Қудайдың ҳақлықлы келетуғын ҳүкиминиң ўағызшысы еди. Өкинишке орай, ҳеш ким Қудай берген ескертиўге қулақ салмады. Тек Нух ҳәм оның шаңарағы Қудай тәмийнлеген кемениң қәўипсизлигине кирди.
Бүгин де Қудай келетуғын ҳүкимнен қашыў жолын тәмийнлегенлиги ҳақыйқат. Ийса Мәсих Ийемиз, биздиң Қутқарыўшымыз, Қудайдың тәмийнлеўи. Ол биздиң қәўипсизлигимиз ҳәм мәңгилик бахытымыз ушын қәўипсизлик кемеси.
