Iyemiz jaqın — June 10, 2026: Musa qızǵın shapaat duwasınıń úlgisi

¹⁸ Sonnan keyin, men kóp gúnańız sebepli, jáne Jaratqan Iyeniń aldında uzaq waqıt, qırıq kún, qırıq tún hesh nárse iship-jemey, et betimnen jerge jatıp, sizler ushın jalbarındım. Sebebi Jaratqan Iyeniń názerinde jawız bolǵan isti islep, Onıń ǵázebin keltirgen edińiz.

²⁵ Jaratqan Iye sizlerdi joq etetuǵının aytqanlıqtan, men Onıń aldında sol qırıq kún, qırıq tún boyı et betimnen jerge jatıp alǵan edim.

¹ Sońınan Izrail xalqınıń pútkil jámiyeti Jaratqan Iyeniń buyrıǵı boyınsha Sin shólinen shıqtı da, bir jerden ekinshi jerge kóship-qonıp júrip, Refidimge ornalastı. Degen menen, ol jerde ishetuǵın suw joq edi. ² Olar Muwsaǵa: – Bizlerge ishetuǵın suw ber, – dep urıstı. – Nege maǵan urısıp atırsızlar? Nege Jaratqan Iyeni sınap atırsızlar? – dedi olarǵa Muwsa. ³ Biraq xalıq shóllegenlikten, Muwsaǵa narazı bolıp: – Bizlerdi ne ushın Mısırdan alıp shıqtıń? Bizlerdi, balalarımızdı hám mallarımızdı shólden óltiriw ushın ba? – dep tońqıldadı. ⁴ Muwsa Jaratqan Iyege dad salıp: – Bul xalıqqa ne isleyin? Birazdan soń, olar meni tas boran qılıp óltiredi-ǵo! – dedi. ⁵ Jaratqan Iye Muwsaǵa bılay dedi: – Xalıqtıń aldına ót. Nil dáryasın urǵan tayaǵıńdı al da, Izrail aqsaqallarınıń ayırımların izińe ertip, alǵa qaray júr. ⁶ Mine, Men Xoreb tawındaǵı bir jartastıń ústinde, seniń aldıńda turaman. Sen jartastı urǵanıńda, suw atlıǵıp shıǵadı hám xalıq suw ishedi. Muwsa Izrail aqsaqallarınıń kóz aldında solay isledi. ⁷ Solay etip, ol sol jerdi Massa hám Meriba dep atadı. Sebebi izraillılar sol jerde Muwsa menen urısıp: «Aramızda Jaratqan Iye bar ma eken, ya joq pa eken?» – dep Jaratqan Iyeni sınaǵan edi. ⁸ Amalekler kelip, Refidimde izraillılarǵa urıs ashtı. ⁹ Sonda Muwsa Eshuaǵa: – Xalıq ishinen adamlardı saylap al da, barıp, amalekler menen urıs. Erteń men qolıma Qudaydıń tayaǵın uslap, tóbeshiktiń basında turaman, – dedi. ¹⁰ Eshua Muwsanıń aytqanın islep, amalekler menen urıstı. Sol waqıtta Muwsa, Xaron hám Xur tóbeshiktiń basına shıqtı. ¹¹ Muwsa qolın kótergende izraillılar, al túsirgende amalekler ústin kele berdi. ¹² Biraq Muwsanıń qolları sharshap qaldı. Sonda olar bir tas ákelip, Muwsanıń astına qoydı. Muwsa tastıń ústine otırdı. Bir jaǵında Xaron, ekinshi jaǵında Xur Muwsanıń qolların joqarı kóterip turdı. Quyash batqansha, Muwsanıń qolları bekkem kóterilip turdı. ¹³ Solay etip, Eshua amaleklerdi qılıshtan ótkizip, olardı jeńdi. ¹⁴ Sońınan Jaratqan Iye Muwsaǵa: – Estelik bolıp qalıwı ushın, bunı kitapqa jazıp qoy. Eshuanıń qulaǵına quyıp qoy, Men amaleklerdiń atın jer júzinen pútkilley joq qılaman, – dedi. ¹⁵ Muwsa bir qurbanlıq orın qurıp, onıń atın «Jaratqan Iye meniń bayraǵım» dep qoydı. ¹⁶ Keyin ol bılay dedi: «Jaratqan Iyeniń taxtına qarsı qol kótergeni ushın, Ol áwladlar dawamında amaleklerge qarsı urısadı».

Nızamnıń qaytalanıwı 9:18 · Nızamnıń qaytalanıwı 9:25 · Shıǵıw 17 · QrqMK22