Iyemiz jaqın — April 17, 2026: Еврейлерге 2:5–8

⁵ Quday bizler sóz etip atırǵan keleshek zamandı perishtelerge baǵınıshlı qılǵan joq. ⁶ Kerisinshe, Muxaddes Jazıwdıń bir jerinde birew bılay dep gúwalıq bergen edi: «Sen adam tuwralı oylaǵanday, ol kim bolıptı? Sen adamzatqa ǵamxorlıq qılǵanday, ol kim bolıptı? ⁷ Sen Onı perishtelerden az waqıtqa tómenirek qoydıń, Izzet-húrmet tajın oǵan kiygizdiń. ⁸ Hámme nárseni onıń ayaqlarına bas urǵızdıń». Quday hámme nárseni adamǵa baǵınıshlı qılıp, oǵan baǵınıshlı bolmaǵan hesh bir nárse qaldırmadı. Degen menen, hámme nárseniń adamǵa baǵınıshlı ekenin bizler elege deyin kórmey atırmız.

⁹ Biraq bizler perishtelerden az waqıtqa tómenirek qoyılǵan Iysanıń ólim azabın shekkeni ushın, dańq-húrmet tajın kiygenin kórip turmız. Awa, Ol Qudaydıń miyrimi menen hámme adamlar ushın ólimdi basınan keshirgen edi.

¹ Quday áyyemgi zamanlarda payǵambarlar arqalı kóp mártebe hám hár túrli jollar menen ata-babalarımızǵa sóylegen edi. ² Al bul sońǵı waqıtlarda bolsa, Quday bizlerge Óz Ulı Iysa arqalı sóyledi. Quday Óz Ulın pútkil barlıqtıń miyrasxorı etip belgilep, Ol arqalı pútkil dúnyanı jaratqan edi. ³ Qudaydıń Ulı – Qudaydıń saltanatınıń jarqıraǵan nurı bolıp, Ol Qudaydıń tábiyatınıń haqıyqattan qanday ekenin kórsetedi. Ul Óziniń qúdiretli sózi menen pútkil barlıqtı saqlap tur. Ol Ózin qurban etip, bizlerdi gúnalarımızdan tazalaǵannan soń, joqarıdaǵı qúdiretli Qudaydıń oń jaǵına otırdı. ⁴ Qudaydıń Ulı perishtelerden qanshelli joqarı attı alǵan bolsa, Ol olardan sonshelli ústin turadı. ⁵ Óytkeni Quday perishtelerdiń qaysı birine: «Sen Meniń Ulımsań, Búgin Men Saǵan Áke boldım». Jáne de: «Men Oǵan Áke bolaman, Ol Maǵan Ul boladı», – degen edi? ⁶ Jáne de, Quday tuńǵısh Ulın dúnyaǵa jiberip atırıp bılay degen: «Meniń barlıq perishtelerim Oǵan sıyınsın». ⁷ Al perishteler haqqında bolsa, Muxaddes Jazıw bılay deydi: «Quday Óz perishtelerin samalday, Xızmetshilerin ottıń jalınınday qıladı». ⁸ Biraq, Qudaydıń Ulı haqqında Muxaddes Jazıw bılay deydi: «Quday, taxtıń máńgi-baqıy turar, Seniń patshalıq hasań – ádalat hasasıdur. ⁹ Sen ádillikti súyip, nızamsızlıqtı jek kórdiń. Sonıń ushın, Quday, Seniń Qudayıń, Doslarıńnan góre kóbirek Seni, Quwanısh mayı menen mayladı». ¹⁰ Jáne de, bılay deydi: «O Iyemiz, Áwel basta jerdiń tiykarın Sen salǵansań. Kókler Seniń qollarıńnıń dóretpesi. ¹¹ Olar joq boladı, al Sen dawam eteseń. Olardıń hámmesi de kiyimdey tozıp qaladı. ¹² Olardı shapan sıyaqlı orap qoyasań, Olar kiyim sıyaqlı ózgertiledi. Biraq Sen ózgermeyseń, Hesh tawısılmaydı Seniń jıllarıń». ¹³ Quday perishtelerdiń hesh birine de: «Dushpanlarıńdı ayaǵıńnıń astına bastırmaǵanımsha, Meniń oń jaǵımda otır», – demegen. ¹⁴ Aqırı perishtelerdiń hámmesi qutqarılıwǵa iye bolatuǵınlarǵa xızmet qılıw ushın jiberilgen xızmetshi ruwxlar.

Evreyler 2:5–8 · Evreyler 2:9 · Evreyler 1 · QrqMK22