Rabbiy jaqın — June 6, 2025: 2 Тимутей 1:8

⁸ Solay etip, Iyemiz haqqında gúwalıq beriwden hám Ol sebepli tutqın bolǵan mennen arlanba. Kerisinshe, Qudaydıń bergen kúshi menen Xosh Xabar ushın meniń menen birge qıyınshılıq kór.

¹ Ulım, al sen Iysa Masiyx arqalı beriletuǵın miyrim menen kúshke tolıp bar. ² Kóplegen gúwalar aldında mennen óziń esitken sózlerdi isenimli adamlarǵa jetkiz. Sonda olar da basqalarǵa úyrete aladı. ³ Masiyx Iysanıń jaqsı áskeri bolıp, meniń menen birge qıyınshılıqqa shıda. ⁴ Xızmettegi ásker ózin áskerlikke shaqırǵan áskerbasınıń kewlinen shıǵıw ushın, turmıs isleri menen baylanbaydı. ⁵ Jarısqa túsken adam da qaǵıyda boyınsha jarıspasa, jeńis tajın kiymeydi. ⁶ Awır miynet etken diyxan zúráátten birinshi bolıp úles alıwı tiyis. ⁷ Aytqanlarım haqqında jaqsılap oylap kór. Iyemizdiń Ózi saǵan hámmesin túsindiredi. ⁸ Dawıttıń urpaǵınan shıqqan hám ólimnen qayta tirilgen Iysa Masiyxtı yadıńda saqla! Men járiyalap atırǵan Xosh Xabar – usı. ⁹ Men usı Xosh Xabar ushın azap shegip, hátte, jınayatshı sıyaqlı tutqın bolıp baylandım. Biraq, Qudaydıń sózi baylawlı emes. ¹⁰ Sonlıqtan men tańlap alınǵanlardıń da Masiyx Iysa arqalı qutqarılıwdı máńgilik saltanat penen alıwı ushın, hámme nársege shıdap atırman. ¹¹ Bul sóz isenimli: «Eger Onıń menen birge ólgen bolsaq, Onıń menen birge jasaymız da. ¹² Eger sabırlılıq qılsaq, Onıń menen birge patshalıq etemiz. Eger Onnan waz keshsek, Ol da bizden waz keshedi. ¹³ Biz sadıq bolıp qalmasaq ta, Ol sadıq bolıp qaladı. Sebebi Ol Ózinen Ózi waz keshe almaydı». ¹⁴ Usılardı iseniwshilerge esletip tur. Sózler tuwralı tartıspawdı olarǵa Quday aldında eskertip qoy. Tartıslar tıńlawshılardı aynıtıwdan basqa hesh nársege jaramaydı. ¹⁵ Haqıyqat sózlerin durıs úyretetuǵın hám óz isi ushın uyatqa qalmaytuǵın, Qudayǵa unamlı, jaqsı xızmetshi bolıwǵa jan-tániń menen tırıs. ¹⁶ Jaramas hám bos sózlerden awlaq bol. Óytkeni bunday sózler Qudaydan barǵan sayın uzaqlastıradı ¹⁷ hám juqpalı jara sıyaqlı tarqaladı. Usınday sózlerdi aytıwshılar arasında Himeney hám Filit te bar. ¹⁸ Olar haqıyqat jolınan adastı hám ólimnen qayta tiriliw álle qashan boldı dep, ayırım adamlardıń isenimin joq qılmaqta. ¹⁹ Biraq Quday salǵan kúshli negiz bekkem turıptı. Sol negiz «Jaratqan Iye Ózine tiyisli bolǵanlardı biledi» hám «Jaratqan Iyege tiyislimen, degen hár bir adam jamanlıqtan awlaq júrsin», – degen sózler menen tastıyıqlanǵan. ²⁰ Úlken bir úyde tek altın hám gúmis ıdıslar emes, al aǵash hám ılay ıdıslar da bar. Olardıń birewleri sıylı, al birewleri sıysız is ushın qollanıladı. ²¹ Solay etip, eger kim de kim ózin jamanlıqlardan tazalasa, onda ol sıylı, muxaddes qılınǵan, xojayınına paydalı hám hár bir jaqsı iske tayın ıdıs boladı. ²² Al sen jaslıqtıń jaman háweslerinen awlaq bol. Iyemizge taza kewil menen sıyınatuǵınlar menen birlikte haqıyqatlıq, isenim, súyispenshilik hám tınıshlıqqa umtılıp jasa. ²³ Aqılsız hám mánissiz tartıslardan qash. Sebebi bulardıń jánjel tuwdıratuǵının bileseń. ²⁴ Iyemizdiń xızmetshisi jánjelpaz bolmawı kerek. Kerisinshe, ol hámme menen múláyim, tálim beriwge qábiletli hám sabırlı bolıwı tiyis. ²⁵ Jáne ol ózine qarsı bolǵanlarǵa álpayımlılıq penen jol-jorıq beriwi lazım. Sonda, múmkin, Quday sol adamlardıń da táwbege kelip, haqıyqatlıqtı biliwi ushın jol ashar. ²⁶ Solay etip, olardıń aqılı kiredi hám qálegenin isletiw ushın ózlerin tutqın qılǵan shaytannıń duzaǵınan qutıladı.

¹⁵ Haqıyqat sózlerin durıs úyretetuǵın hám óz isi ushın uyatqa qalmaytuǵın, Qudayǵa unamlı, jaqsı xızmetshi bolıwǵa jan-tániń menen tırıs.

2 Timofey 1:8 · 2 Timofey 2 · 2 Timofey 2:15 · QrqMK22