Sunday, June 28, 2026

Sebebi bizler Qudaydıń dushpanı bolsaq ta, Onıń Ulınıń ólimi arqalı Quday menen jarastıq. Endi Quday menen jarasıp, Onıń Ulınıń ómiri arqalı qutqarılatuǵınımız da anıq.

Rimliler 5:10

Biraq Iysa máńgi jasaytuǵın bolǵanlıqtan, Onıń ruwxaniyligi de máńgi. Sonlıqtan Ol Ózi arqalı Qudayǵa kelgenlerdi pútkilley qutqaratuǵın kúshke iye. Sebebi Ol máńgige tiri bolıp, Qudaydan olar ushın ótinip soraydı.

Evreyler 7:24-25

Birazdan keyin, dúnya Meni qaytıp kórmeydi. Biraq sizler Meni kóresizler. Óytkeni Men qayta tirilemen, sizler de qayta tirilesizler.

Yuxan 14:19

Eger bizler tek bul dúnyadaǵı ómirimizde ǵana Masiyxtan úmit etetuǵın bolsaq, onda bizler hámme adamlar ishindegi eń ayanıshlı adamlar bolǵanımız. Biraq, Masiyx haqıyqattan da ólimnen qayta tirildi! Ol óliler ishinen birinshi bolıp tiriliwi arqalı ólilerdiń tiriletuǵının dálilledi.

1 Korinfliler 15:19-20

«Men Ámeńgeri sıpatında Sionǵa, Yaqıptıń urpaqlarınıń táwbe qılǵanlarına kelemen», – deydi Jaratqan Iye.

Iyshaya 59:20

Masiyx penen qatnasta bolǵan bizler Onıń qanı arqalı qutqarıldıq, yaǵnıy Qudaydıń bay miyrimi boyınsha gúnalarımız keshirildi.

Efesliler 1:7

Xabarıńız bar, ata-babalarıńızdan qalǵan paydasız ómir tárizinen gúmis yamasa altın sıyaqlı ótkinshi nárseler menen satıp alınbadıńlar. Al Qudaydıń minsiz hám kemshiliksiz Qozısı bolǵan Masiyxtıń biybaha qanı menen satıp alınıp qutqarıldıńlar.

1 Petr 1:18-19